👑 حسناء الآغا 👑

|| الحلقة 56 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 56 Il
قعد يقرب ليها اكثر .. حست جسمها تخدر .. جسمها خانها مقدرتش تبعد .. حتا عينها خانوها و تغمضو وحدوهم .. تحس فنفسو يقرب اكثر ..
و حتا هو مكانش اقل منها .. جسمو كان يتحرك وحدو .. قلبو كان سيد الموقف .. ( قلبي علاه راهو يخبط انا ؟؟ تحمست هههه ) ..
و اوووب تفتح الباب .. و بحركة خفيفة بعدت حسناء قبل ما يدخل الشخص لي فتح الباب ..
حس بنسمة باردة وقت بعدت عليه .. فتح عينو و استوعب لي صرا .. خزر لجيهة الباب .. شاف حيزية داخلة ..
فتحت الباب .. حت بحركة خفيفة .. دخلت و اول واحد خزرت فيه حسناء .. كانت مرتكبة .. شادة الكاس فيدها و تبان رعشتها .. شكت اما محبتش تبين .. حبت تبان الشخص لمليح قدام هيثم و مور ظهرو دير رايها ..
دخلت غلقت الباب موراها .. خذات نفس عميق .. رسمت ابتسامة مزيفة و راحت عندهم .. وصلت راحت ديراكت عند هيثم و باستو من خدو و حسناء تشوف .. حتا هو اتفاجأ من حركتها .. قعد يخزر فحسناء لي رجع وجها صفر .. لثاني مرة تحس روحها زيادة .. قلبها وجها ..
حيزية : حمدلله فطنت خلعتني عليك حبيبي ..
و رمات يدها و شدت يدو ..
حسناء عيناتحلو على وسعهم من كلمة " حبيبي " .. قعدت تخزر فيها و هي شادتلو يدو .. مقدرتش تتحمل المنظر .. وقفت و هدرت ..
حسناء : نروح نجيبلك لاسوب و نجي ..
خرجت تجري .. طاحو دموعها .. لثاني مرة تتحشالها .. لثاني مرة يجرحها .. اكيد دايرها لعبة فيدو .. تمشي و تهدر وحدها ..
حسناء : واش حسبتلك نتي .. راهي هي لي مرتو ماشي نتي .. نتي راكي زيادة .. اصلا مكانش فاطن مقبيل يالجايحة .. افطني راح تتعلقي بحاجة مستحيل تكون تاعك ..
مسحت دومعها .. خذات نفس عميق و رجعت هدرت معا روحها ..
حسناء : مليوم متسمحي لحتا واحد يتعدى حدودو معاك .. و حيزية انا لي نربيها واش مترباتش فدار باباها ..
حبطت و راحت للكوزينة ..
نرجعو عند هيثم و حيزية .. قعدت حيزية على طرف السرير و هي شادتلو يدو و تتمسكن ..
حيزية : شحال خفت عليك مقدرتش نرقد .. نجي نرقد معاك احسن ..
دور وجهو منها و نحا يدو من يدها و هدر ..
هيثم : من وين جات كلمة حبيبي هادي ..
حيزية : عادي اي وحدة تقولها لراجلها ولا خفت عليها ..
هيثم : بركاي ما تخلطي فالهدرة ..
حيزية : مالا علاه معجبتكش ..
هيثم : جاتني غريبة و متقوليهاش قدام العايلة شوية احترام ..
حيزية : ايه علابالي ..
رمات يدها باش ترجع تشدلو يدو .. اما هو سبقها و حكم الكاس بيديه فيزوج ..
تفتحت الباب تاع الغرفة .. دخلت حسناء هازت فيدها سنيوة تاع ماكلة فيها طبسي لاسوب و كاس ما ..
وصلت لسريرو .. وقفت حيزية و داتهالها و هدرت حاولت طيحلها من قيمتها ..
حيزية : ملقري هادي خدمة الخدامات مي يعطيك الصحة ..
تبسمت حسناء فوجها .. ضمت يدها ليها و هدرت ..
حسناء : نحب انا نتهلا فراجلي منخليش الخدامات يتهلاو فيه مالا هكاك علاه جابني .. و غمزتلها غمرة صغيرة .. نفس حركة هيثم ..
حبط راسو و تبسم على جنب .. عجباتو غيرتها .. و عجباتو زادة كلمة راجلي من عندها ..
نطقت حيزية بغضب و هي تخزر فهيثم ..
حيزية : تقدري تتفضلي انا نوكلو ..
حسناء : يزيد فضلك .. و دارت خارجة و ماشي عارفة وين تروح .. حتا غرفتها متعرفهاش..
حبسها صوت هيثم وقت هدر ..
هيثم : حسناء ارواحي نتي وكليني ..
حيزية : كيفاه !! راني هنا ..
هيثم : معليش هي بدات تهتم بيا خلي هي تكمل ..
حيزية : معليش ..
حطت السنيوة .. و راحت لجيهة لوخرا و تكسلت على اساس راح ترقد تما ..
رجهعت حسناء .. هزت سنيوة حطتها فحجرها .. كانت راح توكلو حتا رجع هدر و هو يخزر فحيزية ..
هيثم : متروحيش ترقدي ..
حيزية : هنا بلاصتي ..
هيثم : هادي بلاصة حسناء .... ( اححح و كي نحبوو كي يحاامي عليها ... )
#ليلوشة
—————————————————
اوبالاتي 💙
الحلقة الجاية شااابة فيها القليل من الرومنسية هههه علابالكم نحشم .. نعسسست مي نحاااول نكتب قد ما نقدر ماشي حسارة فحسناواتي ..
حطووولي تشو توقعاتكم بعد ما دار هيثم هاكا لحيزية كيفاه راح يكون موقفها ..
#ليلوشة