👑 حسناء الآغا 👑

|| الحلقة 5 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 5 Il
قبل ساعة و نص فعشيرة آل ضافر ..
كان جابر واقف معا رجالو برا يتفاهموا على القمح كيفاه يوصلوه ..
جابر : ارفد نص الكمية .. وصلها للمدينة و السعر يبقا هو هو ..
الراجل : بصح آغا قالولي الا منقصتلناش فالسعر مندوش عليك ..
جابر : عيطلو قولو قولو بطلنا منبيعوش روح شوف جيهة وحدوخرا تشري منها ..
قاللهم قرارو و دار يمشي متوجه للاسطبل .. هاز فيدو سبحتو ..
دخل للاسطبل تفقد حصانو .. قعد معاه شوية حتا دهلت عليه سمر ..
سمر : جابر راك هنا مصبح وانا نحوس عليك .. ياسمين راهي تبكي حبت تجي عندك ..
هدر جابر بصوت شوية عالي و كان يبان من نبرتو بلي راهو معصب ..
جابر : سمر راني مشغول اومبعد نجي و نريح معاها ..
قدمت ليه بلعقل و حطت يدها على ظهرو لانو كان عاطيها و بظهر و هدرت ..
سمر : جابر علاه وليت تهدر معايا هاكا .. عارفة انو ضغط العشيرة و الخظمة .. اما زادة انا معندي دخل ..
هدرتها فيقتو على روحو .. للحظة ندم على طريقة كلامو معاها .. صح هي ماعندها حتا دخل ..
دار ليها و حط يديه فيزوج على خدها و قرب وجهو لوجها و هدر ..
جابر : سامحيني يا روحي .. عارف اني غلطت فحقك اما انتي تان اعذريني راني مضغوط ..
سمر : معليش راك معذور ..
و تبسمت معاه بتمسيمتها لي يعشقها ..
قدم ليها و باسها على جبهتها .. و هوما هكاك دخل سماعيل ..
شافهم هكاك حمحم و حبط راسو ..
سماعيل : احمم آغا ..
جابر فاق على روحو و بعد على سمر و هدر ..
جابر : وي سماعيل ..
سماعيل : اغا حسناء ملقاوهاش فالدار.. قلبو عليها فكل بلاصة ملقاوهاش ..
قلبو دق بالقااوي .. قرب ليه بلا ما يحس و شدو من شوميز ديالو ..
جابر : واش راك تقول .. واش راك تهدر وين راهي ..
سماعيل : ولله ما راني عارف اغا الخظم كانو يحوسو عليها جاو يسقساوني باش نسقسيك قلت مكلاه نتعبك طلبت مالرجال يحوسو عليها ملقيناهاش ..
طلقو بقوة و مشا ديراكت لحصانو و يهدر بصوت عاالي ..
جابر : ياا ر** وين رااحت ..
طلع فوق حصانو و تبعو سماعيل طااايرين ..
و هوما فالطريق شافو سيارات عشيرة شعابني طايرين و قبلهم هيثم بحصانو ..
تبعوهم حتا وصلو لبلاصة ضيقة .. شافهم يهدرو .. قرر انو يدخل قبلهم للبلاصة هاديك ..
دخل لقاها خااالية و فيها مجموعة من صخرات كبار فالوسط ..
بدون ميخمم قدم لتما اما هو كان فالجهة المعاكسة لي كان فيها هيثم ..
وصل جابر للبلاصة هاديك قبل هيثم بدقيقة وحدة برك ..
هو زادة سمع صوت انين و حركة .. هز سلاحو فيدو جهز روحو و دخل بين صخور ..
و تما نفسو تقطع .. روحو فلحظة طلعت .. حس كأنو شخص طعنو فقلبو .. شاف ختو عرضو و شرفو تحت راجل .. شاف دمعتها .. سمع عياطها ..
بلا ميحس طاحت دمعة من عينو .. دمعة الآغا لي مطيحش بالساهل ليوم طاحت على ختو ..
بدون ما يخمم هز سلاحو و وجهو لراجل لي كان فوقها ..
فهاداك الوقت و فجأة دخل هيثم لنفس المكان ..
طاحت عين الاغوات فبعضهم بعض ..
و ضغط جابر على سلاحو مرة و اثنين و ثلاثة ..
لوكان مش سلاحو لي فرغ كان راح يزيد .. ثلث رصاصات مسكتوش غضبو .. محبسوش وجيعة قلبو ...
#ليلوشة
—————————————————
اوبالاتي 🔥🔥
نظن راااهي بانت شكوون لي تيرا على معاد .. فرايكم راح يعيش و لا يموت و الا عاش مصيرو كيفاه راح يكون .. و مصير حسناء لي تلطخ شرفها كيفاه .. و هيثم واش راح يدير ..
خلولي توقعاااتكم طواااال عراض فالرد تاع التعليق هنا 🔥🔥
و منساوش خلو تعليق فالرد هنا غير نحط نديرلكم جاادوغ على تعليقكم
#ليلوشة