👑 حسناء الآغا 👑

|| الحلقة 104 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 104 Il
غير سمع جملتو هدر بصعوبة ..
محمد : م م موتك ع على ي يدي ..
و فقد وعيو .. و ترخف جسمو .. خزر هيثم فرجالو و هدر ..
هيثم : خرجوه و حطوه فطونوبيل و تبعوني ..
طبقو واش قاللهم .. راحو خرجوه .. و تعاونوا عليه و رفدوه .. و توجهو بيه لطونوبيل مور هيثم ..
طلع هيثم و عصام ملقدام .. و حطو محمد مغمى عليه ملور و رجعو لسياراتهم و رجعو بسرعة كبيرة للقصر .. و هوما فطريق هدر عصام ..
عصام : اغا واش راح دير ..
هيثم : راح نستجوبو و نشوف ..
عصام : مشكيتش يهدر ..
هيثم : يهدر بسيف عليه عندي طرقي الخاصة ..
وصلو للقصر .. حبطو كلهم كأنهم جيش بنفس الخطوات .. توجهو لسيارة هيثم رفدو محمد منهة و حبط هيثم من سيارتو بكل فخامتو ووهرتو .. حاط نواضر على عينيه .. لابس تريكو كحل .. لحيتو كانت كبيرة .. و شعرو كان مخبل و يهبل .. باختصار كان كتلة رجولة ..
هيثم : حبطوه للقبو ..
حبطوه للقبو و حبط موراهم هيثم و عصام .. حطوه فكرسي و ربطوه .. دخل هيثم للقبو و خزر فيه .. تبسم على جنب و هدر معا رجالو ..
هيثم : يعطيكم الصحة تقدرو تنساحبو دوك ..
هزولو براسهم و خرجو .. هوما غير خرجو هيثم غلق الباب الحديدية تاع القبو و بقا لداخل معا عصام ..
هيثم : عصام .. عارف انو مراحش يفيق دوك .. راح نرجع لسبيطار و فليل نجي .. عقمولو جروحو و ردو بالكم يهدرب ولا تحطو اسلحة قراب ليه راهو خبير فيهم ..
عصام : حاضر اغا ..
فتح هيثم لباب و خرج .. ركب فسيارتو و هو متبسم و المورال طالعلو عندو مدة مفرحش هاكا .. اما عصام بدا خدمتو فتعقيم الجروح ..
تعدا الوقت و هيم معا حسناء فالسبيطار كعادتو يحكيلها واش دار فنهارو .. و يتعامل معاها كانو انسان واعي و راه يقصر معاه و يرجعلو .. احيانا كي يشوفوه يديرو فبالهم هبل .. بعدها هز سيارتو و رجع للقصر ..
وصل ليل .. و بدا محمد يفطن .. حس بوجيعة كبيرة فراسو ..حاول يتحرك مقدرش .. رؤيتو كانت مضببة .. و كان يحس بالدوخة .. قاعد يحس فروحو مربوط .. مقدرش يوقف .. مقدرش يحرك يديه و رجليه ..
خذا شي خمس دقايق باش استوعب لي صرا و تذكر لي صرا معاه ..
زير على سنانو بعصب و هدر و هو يتوعد..
محمد : موتك على يدي يا ط*** ..
و بقا يحاول يفك روحو اما مقدرش .. كان مربوط باحكام ..
وصل هيثم للقصر و توجه ديراكت للقبو ..
كان قاعد يتحرك يحاول يحرر روحو حتا سمع صوت خطوات يقربوا من الباب .. هدا روحو .. و قطع نفسو باش يسمع مليح..
دخل المفتاح فالباب و بدا يتفتح .. حتا لمح عينيه .. عينيه لي يعرفهم .. بعدها ظهرلو وجهو كامل و عليه تبسيمة ..
هدر هيثم و هو يخزر فيه متبسم بعد ما دخل ..
هيثم : عجبك الحال .. راك تبان مستمتع ..
محمد : راك تلعب بالنار يا ن** ..
تغيرت ملامحمو من تبسيمة لجدية .. رجعت نظرتو حادة .. و تعقدو حواجبو .. قرب ليه بسرعة و حكمو من فكو بقوة حتا رحع يتوجع و هدر ..
هيثم : اياك تعاودها .. اقسم برب الكعبة غير نفرغ فيك سلاحي بلا ميرفلي جفن ..
و طلقو .. حط يديه فيزوج على يدين الكرسي .. و رجع وجه هيثم مقابل وجه محمد و هدر ..
هيثم : من وين تعرف معاد .. واش علاقتك بين و علاه كنتو تتلاقاو ..
حس سطل ما بارد تكب عليه .. متوقعش انو يعرف .. للحظة سفار لون وجهو .. بلع ريبو يحاول يخبي توتورو و هدر ..
محمد : ......
#ليلوشة
—————————————————
اوبالاتي 💜
فرايكم راح يستعرف تمتم ولا لازملو تعذيييب .. و متنسااوش حيزية مثلا كيفاه راح يفيقلها .. و واش رااح يصرا بعدها .. حطووولي توقعاتكم طواال عراض و اسناوني نكتب الحلقة لي موراها و نحطها .. بالمناسبة نهاية غدوة ماشي ليوم بسك ليوم مكتبتش صباح كنت نتفرج لاكاز و طوكيو ماتت هههه
كثرووو تعليقات فالرد باش تطلع لكرو
#ليلوشة