👑 حسناء الآغا 👑

|| الحلقة 49 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 49 Il
صوت الرصاصة خلا البلاصة ترجع هااادية .. صوت الانفاس رجع مسموع ..
بعد هاديك الرصاصة .. خرجو رصاصات بزاااف من رجال هيثم و اخترقوا جسم اسماعيل .. لي طاح جثة فوسط الساحة غارق فدمو ..
كان رايح مور حسناء تحت نظراتهم .. اما وقفو صوت عيط باسمو و فور .. صوت يعرفو اما معرفش شكون ..
دار يشوف شكون و للاسف غدرو قبل ما يثبت فوجهو اصلا ..
اخترقت الرصاصة كرشو .. حس بحاجة سخونة فكرشو .. نفسو تقطع و مقدرش يردوا ..
وجيعة كبيرة و قاعدة تزيد فكرشو .. حس بنسمة باردة تعدات عليه ..
رجع كأنو غايب عن الوعي .. حس بيدين صغار تحاوطوا عليه ..
خانوه رجلو و طاح بين يديها ..
كانت رايحة و ماشي عارفة وين المهم تبعد عليه .. تبكي براحتها .. تخرج شهقتها لي كاتمتها اما هي زادة حبسها صوت تعرفو و تعرفو مليح .. مزال ملحقتش دارت تشوف فيه .. سمعت صوت رصاصة .. قلبها توقف اللحظة هاديك .. هدرت بلعقل ..
حسناء : هيثم ..
دارت خزرت فيه شافتو كيفاه بدا يفقد توازنو .. بدون متحس لقات روحها معنقاتو .. رجعت تبكي بصوت ..يشوف فيها كأنو يشوف فالفراغ ..
طاح عليه و طاحو فيزوج فلرض و هو بين يدها ..
خرج اسمو من فمها و هي تبكي ..
حسناء : لالا هيثم .. شوف فيا شوف ..
هدر و متبسم معاها و شادها فيدها و صوتو يتقطع ..
هيثم : مت خافيش منموتش .. شكون لي يعشق فعينيك ..
ملحقتش تهدر كانو كااامل دارو عليه .. كان يهدر و هو غايب عن الوعي تماما .. حتا بداو عينيه يتغمضو .. حيزية و يماه داخو ديراكت .. شوية دايرين عليهم و شوية على هيثم .. جابو طونوبيل بسرعة .. طلعو هيثم و طلعت معاهم حسناء و لاغوب تاعها كامل دم .. لي يشوفها للمرة الاولى يقول هي لي تصاوبت ..
قلعو لسبيطار طيارة .. حسناء شادة هيثم و تحاول تفيق فيه .. قلبها خلاص مبقالوش و يحبس صدمة مور صدمة ..
يد حاطتها على خدو و يد حاطتها على بلاصة الجرح تمنع فالنزيف .. هدرت و هي تبكي ..
حسناء : ماشي من قلبي كي وكلت عليك ربي ولله .. هيثم نوض ..
اما مكاين حتا ردة فعل .. حتا نبضو قاعد يتناقص .. وصلو للمشفى بعد مدة و دخلوه ديراكت لغرفة العمليات ..
حسناء كانت فحالة يرثى لها لي يجوز يقعد يخزر فيها .. تبكي و الكحل ساح على وجها .. لاغوب بلونش و يديها كلهم بالدم ..
رايحة جاية فهاداك الرواق تسنا خبر من عند الطبيب ..
بعد ساعتين من العملية خرج الطبيب .. طارت ليه حسناء حتا خلعاتو ..
حسناء : تعيش قولي ما بيه والو تعيش الله يسترك ...
الطبيب : للاسف ....
#ليلوشة
—————————————————
اوبالاتي 💙
معلاباليش كيفاه جات الحلقة ان شاء الله برك منكونش عميتها بسك نعست ههههه مدووولي توقعلتكم على واش قال طبيب و بصحتكم قتلتلكم اسماعيل و اسفة كي باصيت هيثم علابالي راح تسبوني ههههه دوك احكولي كيفاه راح تتخلط بين ضراير تان نتلاقاااو غدوة تصبحوا بخير بيبياااااتي
#ليلوشة