👑 حسناء الآغا 👑

|| الحلقة 82 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 82 Il
دار ليه هيثم متبسم و هدر ..
هيثم : نظن نتا لي راك متخلي على حياتك .. راك فارضي و نقدر نشكي بيك اما نفضل مندخلوش الشرطة فالوسط مزالك صغير ماشي مليح تجوز حياتك فالحبس ..
ضحك محمد و رجع هدر ..
محمد : هادا التهديد الثاني .. التهديد الثالث اتأكد انو راح تصرا حاجة متعجبكش ..
صونا تيليفون تاع هيثم .. فهم بلي وصلو .. و تمركزو فمواقعهم .. اما صدمو محمد وقت هدر ..
محمد : وصلو رجالك لالا ههه
طلع راسو و خزر فيه .. عقد حواجبو و هدر ..
هيثم : مكنتش علابالي بلي راك تراقب فيا ..
محمد : راني نراقب فيك لدرجة انو علابالي بلي حسن...
ملحقكش يكمل هدرتو ضربو بدبزة للوجه .. خرجو رجال محمد من ورا لحشيش و خرجو رجال هيثم زادة .. هازين فوجه بعضاهم السلاح ..
حكم هيثم محمد من الكول تاع شوميز تاعو و هدر ..
هيثم : اياك تجبد اسمها على لسانك .. ندفنك حي هنا .. ( ولي ولي على مغيااار .. )
تبسم محمد و دم يسيح من نيفو و هدر ..
محمد : راح تغيضني غير يماك لي دفنت وليدها و بعد اسبوعين تدفن الثاني هههه
كأنو واحد جا خبطو فكف .. بقا فاتح عينو و يخزر فيه .. طلقو بلعقل لدرجة انو خلا محمد يستغرب علاه راهو مصدوم هاكا ..
هيثم : اسبوعين .. اسبوعين .. معاد عندو اسبوعين من لي مات .. يعني ... ( تحللللللب يويويويويويوييييييي فاااق .. )
رجع خطوة للور .. زاد الثانية .. و دار يجري متوجه للطونوبيل .. رفد تيليفونو و عيط لثاحبو فالسبيطار ..
هيثم : الو جمال ..
جمال : وي هيثم ..
جمال : كاين تما تحاليل مرتي .. حسناء ال ضافر .. نحتاجهم يخرجو ليوم .. مسافة ساعة و نكون عندك ..
جمال : مريقلة صاحبي ..
قص عليه الاتصال .. ركب فسيارتو و طار بيها بقوة .. ركبو موراه رجالو و طارو موراه مفهموش واش صرا ..
يسوب و يهدر وحدو .. ماشي مستوعب لي قاعد يصرا ..
هيثم : يا رب لي نخمم فيه يكون صح يا رب تكون غلطة من عندهم ..
و كمل طريقو طاااير ..
نرجعو عند حسناء لي زاد قوا عليها السطر .. متحملاتوش .. ناضت شادة فالحيط .. حبطت للكوزينة .. هزت كاس ما و رجعت لغرفتها باش تشرب دوا ..
قابلاتها حيزية لتحت ..
حيزية : خير يا لالة كانو راكي فقصر .. نوضي تخدمي شغلك ..
خزرت فيها حسناء ملفوق للتحت و هي تتوجع و هدرت ..
حسناء : اخطيني .. و جات فايتة عليها .. اما شدتها حيزية من يدها و هدرت ..
حيزية : وشبيك ..
حسناء : واش دخلك .. و نحاتلها يدها و كملت طريقها طالعة .. دارت حيزية باش تراقبها و هي طالعة .. شافت بقعة دم ملور .. طاح منها النص .. رجعت صفرة .. هدرت بلا متحس ..
حيزية : العادة .. ( ياااك فهمتووو .. ) ..
نروحو لعند هيثم لي وصل لسبيطاار .. حبط يجري لدرجة خلا طونوبيل مفتوحة .. دخل لقا صاحبو يسناه و فيدو ورقة تحاليل ..
خزر فيه هيثم و هدر ..
هيثم : افتحهم و شوفلي الا راهي حامل ..
و فنفس الوقت عيطت حيزية باسم حسناء ..
حيزية : حسناء ..
دارت حسناء فنص دروج ليها .. و هدرت مستغربة ..
حسناء : واش تسحقي ..
مهدرتش حيزية و طلعت لعندها تجري ..
فتح جمال الظرف و بدا يقرا فيها .. خزر فهيثم و هدر ..
جمال : لالا مكاش حمل ..
و فنفس اللحظة حيزية طبعت حسناء من على دروج و طاحت ملفوق للتحت .. و خبطت راسها و طاحت مغمى عليها و راسها ينزف بقوة .....
#ليلوشة
—————————————————
اوبالاتي 💜
لنقرأ الفاتحة على روح اختنا حيزية ههههه كانت شريرة بامتياااز .. قلتلكم بلي راح تشكروووها على عملتها ههههه
حطووولي توقعاااتكم بردة فعل هيثم كي عرف و الاهم حسناء واش راح يصرا فيها .. اتخايلو بعد هاد التمرميد كامل نديرلكم نهاية حزينة هههه
#ليلوشة