بين الثراء والبادية

الحلقة 41

🌓 بيـــــن الثـــــراء والباديـــــة 🌓
❤︎ ☕︎ 𝐵𝑦 : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎

🌖 حينما نتقبل الاختلاف ، نحصد أجمل ثمار الحب والتناغم 🌘

الحلقـــــة : 41
• خرجات خديجة من لبيت ومشات لعند سعيد لي كان متكي فالبيت تاع الجلوس ، بركات حداها وبدات تفيق فيه...

خديجة : نوض راه بغيت نهضر معاك
سعيد [ناض برك وهوا كيحك على راسوا] : مالك اختي
خديجة : راه هضرت معا لهاشمي على غيمة وصافي راه هوا كيف قلت مكيقدرش يقوليا لا على شي حاجة واصلا بينة عليه بلي عجباتوا يعني دابا باقا خاصك تهضر غا معا غيمة
سعيد : اه صافي دابا نهضر معاها فالليل
خديجة : تبغيني نهضر معاها انا ؟!
سعيد : لا غير خليها حتا نهضر معاها انا
خديجة : صافي على خاطرك يله تكا رتاح ليك اخويا

• رجع سعيد تكا فبلاصتوا باش ينعس اما خديجة حتا هيا رجعات دخلات للبيت وتكات حدا بوشعيب باش ترتاح ليها شوية...

   ▪︎ عند لهاشمي لي كان وصل لدار عند زينة وعطاها لقفف دخلتهم للكشينة من بعد حطات ليهم لغداء وبركوا كياكلوا مجموعين...

لهاشمي [هز عينوا فزينة] : مالك ساكتة
زينة [وهيا مكتشوفش فيه] : والو
لهاشمي : عارف راسي غلطت حيت مديتكش لدار عندهم ولكن راه فقت بكري وبنتي ليا ناعسة ومقدرتش نفيقك
زينة : واش انا تشكيت عليك قلت ليك خليني نبقى ناعسة
لهاشمي : صافي هانتي غدا نديك دوزي معاهم نهار كلوا ومني نبغي نجيبك صافي
زينة [بتاسمت برضى] : صافي شكرا ولكن شكون غادي يطيب ليك لغدا مني تجي
لهاشمي : غادي نطيب راسي الآلة غا كوني هاني
زينة : وعنداك تاكل من عند ضاوية وشريفة
لهاشمي : علاش هوما جاو
زينة : اه قبيلا شفتهم جاو
لهاشمي : صافي كوني هانية مغاديش ناكل من عندهم
زينة : شوف انا كنوصيك الى خديتي من عندهم شي حاجة متاكلهاش يصدقوا دايرين ليك شي حاجة
لهاشمي [وهوا كيضحك] : صافي كوني هانية

• سكت لمدة طويلة وهوا كيفكر واش يهضر ويسولها ولا لا ، هز عينوا فيها بعد تردد كبير عاد نطق...

لهاشمي : بغيت نسولك
زينة [هزت عينها فيه] : اه سولني
لهاشمي : لبنت لي كانت معاكم نتي ويامنة فالفرح عرفتيها
زينة : شكون واش غيمة
لهاشمي : يمكن هيا معقلتش على اسمها ولكن راها ماشي من هنا وخالتي خديجة كتجيها بنت خوها
زينة : اه هيا غيمة مالها
لهاشمي : موهيم راه خالتي خديجة قالت بلي راها بنت مزيانة وكدا وبغاتني نتزوج بيها ولكن فصارحة انا معرفتش واش هيا مزيانة ولا لا وواش كتعرف مبينها وبين الله وكدلك واش مفيهاش الخفة
زينة [بإبتسامة] : لا لا اخويا راها والله حتا ضريفة قسما بالله وشحال فرحتيني والله فاش قلتي ليا هاكا صافي دابا نتا قررتي تزوجها
لهاشمي : الى كتاب علاش لا المهم عندي هوا انك اكدتي ليا هضرت خالتي بلي راها مزيانة وصافي
زينة [ناضت كدور] : ليوم دوار كلوا يعرف باش لي خاطة عليك لعين تنزلها [ضارت شافت فيه] وحتا ديك شريفة ومها يخففوا رجلهم عندهم شوية
لهاشمي [وهوا كيضحك] : بركي بركي اديك لمجحومة وخلي هدشي مستورة راه سترة زوينة
زينة [رجعات بركات فبلاصتها] : ومال اش فيها الى قلتها ليهم
لهاشمي : وخلي غير حتا نقادوا الأمور بعدا والى ميسرش الله فهدشي كاع
زينة [وهيا كتحرك راسها بلا] : لا لا غا كون هاني غادي يسر الله

✍︎ من تأليف والكتابات : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎