بين الثراء والبادية

الحلقة 106

🌓 بيـــــن الثـــــراء والباديـــــة 🌓
❤︎ ☕︎ 𝐵𝑦 : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎

🌖 حينما نتقبل الاختلاف ، نحصد أجمل ثمار الحب والتناغم 🌘

الحلقـــــة : 106
• رجعات للكوزينة كتجري وهزات الحكاكة وغسلاتها عاد هزات الكوكوط وحكات فيها دوك ماطيشات وثومة من بعد وقفت لثواني كتفكر شنو قالت ليها تزيد معا هدشي...

غيمة : قالت ليا العطرية [هزات راسها فالقراعية لي معلقين فوق راسها] هوما هادوا

• هزات من القراعي كلهم لي كانوا تم محطوطين لي كل حاجة وشنو كان فيها ، الخرقوم ، السكينجبير ، التحميرة ، الكامون ، سودانية ، البزار ، كل قرعة هزات منها معلقة صغيرة عامرة وكباتها فالكوكوط...

• من بعد رجعات لقراعي كلهم وشعلات البوطة وحطات الكوكوط فوق العافية وضارت حاطة يديها على البوطاجي وهيا كتفكر واش هدشي غادي مزيان حتا بانت ليها قرعة تاع الملحة والزيت محطوطين وهيا تفكر بلي راها مزال مدارت منهم...

غيمة [مشات تجري طفات البوطة وهيا كتعير] : اويلي على مكلخة انا ويلي راها قالت ليا الملحة هيا لي كتبنن كلشي وانا كنت غادة نديروا ليهم باسل [هزات الملحة وكمشات بيدها فالقرعة وكبات فالكوكوط] يمكن باركة ولا نزيد شوية

• رجعات هزات شوية بيدها وحتا كانت غاة تلوحوا فالكوكوط وقررت بلاما تزيد ، رجعات الملحة لبلاصتها وهزات زيت وكبات داك نص كاس لي بقات فالقرعة كلها وشعلات البوطة ومن بعد مشات هزات معلقة وبدات كتشحر فدكشي كيف قالت ليها...

غيمة [هبطات كتشم ريحة] : امم ناري صافي تعلمت من ليوم زينة مبقيتش غادي نخليها دخل للكوزينة [حبسات من تحركات وهيا كدور فعينيها] قالت ليا كبي الماء مني ديري هدشي ايه

• حطات المعلقة وسط الكوكوط ومشات هزات البوديزة لي كتشوف زينة كتكب منها فالمرقة وكبات الماء منها فالكوكوط تا قربات تعمر بعدما كانت حيدات المعلقة...

غيمة : باركة خلي اغيمة فين تحط شعرية اويلي

• رجعات القرعة فبلاصتها وبدات كتقلب على شعرية ، مشات لبلاكار وهزات واحد الميكة فيها الشعرية وبقات كتشوف فيها ولكن فالأخر طرات تمشي تسول زينة...

غيمة [وهيا كتوريها] : واش هادي هيا ديك لي غادة ندير
زينة : اه هادي هيا شعرية ديري الميكة كلها وسدي الكوكوط
غيمة : واخا

• رجعات لكوزينة وحركات دكشي من بعد خوات الشعرية كلها كيف قالت ليها زينة وسدات على الكوكوط ورجعات لعندها وهيا فرحانة...

غيمة : شتي راني قلت ليك نعرف وهانا دغيا كملت العشاء بقا خاصوا غا يطيب
زينة [بإبتسامة] : تبارك الله عليك

✍︎ من تأليف والكتابات : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎