بين الثراء والبادية

الحلقة 129

🌓 بيـــــن الثـــــراء والباديـــــة 🌓
❤︎ ☕︎ 𝐵𝑦 : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎

🌖 حينما نتقبل الاختلاف ، نحصد أجمل ثمار الحب والتناغم 🌘

الحلقـــــة : 129
• لثواني قليلة بدات كتستوعب شكون هيا وشنو اخر حاجة طرات معاها ، ناضت فاقزة حتا تعوعتات فرجلها شي لي خلاها تغوت بأحر من جهدها ، فاقت سميرة كتجري لعندها على صوتها لي كان مرتافع...

سميرة [وهيا شادة فيها] : بنتي واش نتي بخير
البنت [وهيا كدور عينيها فالبيت بخوف] : فين كينة انا شنو طرى ليا
سميرة [وهيا كتحاول تخليها تكا فبلاصتها] : غير تهدني ابنتي راه موقع والو
البنت [كتقلب فجسدها] : شنو درتوا ليا فين حويجي
سميرة [تكاتها وهيا شاداها من كتافها] : تهدني ابنتي حنا مدرنا ليك والو راه جابك ليا ولدي وانا داويت ليك رجلك وبدلت ليك حويج بهدشي لي لابسة

• بدات البنت كتهدن شوية بشوية وهيا كتشوف فيها ، بعدات عليها سميرة شوية وبدات كتغطي فيها حتا بدات كتسمع دقان فالباب ، مشات فتحات لباب وهيا تلقى رضوان واقف مخلوع...

رضوان : واش نتوما بخير سمعت عندكم الغوات
سميرة : بخير بخير راه غير البنت فاقت [بعدات ليه على لباب شوية] دخل

• دخل لداخل حتا ستقروا عينيه على لبنت لي كانت مسطحة فوق ناموسية وشعرها البني المموج كان مطلوق شي لي مخلي ووجهها دائري يبانوا ملامحوا كلهم...

رضوان [تقدم بخطوات حداها] : سلام واش نتي بخير
البنت [هزات ليه راسها بأه] : اه بخير و واش نتا لي جبتيني هنا ياك
رضوان : اه انا لي جبتك لهنا [سكت لثواني عاد نطق بتساؤل] شنو كنتي كديري تما
سميرة [بركات حداها وشدات ليها فيديها] : وشنو اسمك ابنتي

• هزات عينيها كتشوف فيهم بجوج وكتفَكر واش دير ثقة فيهم وتهضر ولا لا ، من بعد نطقات بتردد والكلمات متقطعين ليها...

البنت : سميتي إبتسام
سميرة : ايه ونتي من اشمن دوار ابنتي ، قولي لينا غا اسموا وغدا ولدي يمشي يقولها لعايلتك

• ناضت وقفات رغم ألمها وهيا كترجف وتردد بكلمات نفسها " لا ، لا،" ، بداو كيشدوا فيها وهوما مفاهمينش مالها وعلاش تخلعات هاكا ولات ذاتها كلها كترجف...

رضوان [وهوا شاد فيها باش مطيحش] : مالك شنو وقع ليك غير تهدني
إبتسام [هزات راسها فيه وهيا عينيها دامعين] : عفاك لا انا مبغيتش نرجع عفاك غير طلقوني نمشي بحالي ومغادينش تشوفوني مرة خرى
سميرة [وهيا كتحاول تخليها تبرك] : بركي ابنتي غا بركي راك مريضة
إبتسام [وهيا كتبكي وتشوف فيها] : عفاك متخليوهمش يديوني
رضوان [تكاها فبلاصتها] : غير رتاحي مغادين نخليو حد يدّيك صافي [غطاها وهوا كيحاول يهديها] رتاحي ليك دابا ونعسي ومني يصبح الحال نهضروا وان شاء الله مغادي يوقع غير لي بغيتي نتي

• بتاسمت ليه فوجهوا وغمضات عينيها باش تنعس كيف قال ليها ، أما هوا فهز عينوا فسميرة ودار ليها اشارة باش تخرج معاه لبرى...

✍︎ من تأليف والكتابات : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎