بين الثراء والبادية

الحلقة 59

🌓 بيـــــن الثـــــراء والباديـــــة 🌓
❤︎ ☕︎ 𝐵𝑦 : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎

🌖 حينما نتقبل الاختلاف ، نحصد أجمل ثمار الحب والتناغم 🌘

الحلقـــــة : 59
   ▪︎ اما عند خديجة لي دخلات ولقات غيمة كتقاد يامنة فبلاصتها حيت كانت نعسات ، قاداتها ووقفت كتشوف فخديجة...

خديجة [فتحات يديها وهيا كتشوف فيها بحزن] : اجي عندي
غيمة [مشات لعندها عنقاتها] : سمحيليا اخالتي انا مكنتش باغا ليامنة هدشي عارفة بلي كلشي وقع بسبابي
خديجة [زيرت عليها كتر لعندها وهيا كتبكي] : متقوليش هاكا ابنتي هدشي مكتاب يوقع ونتي مكان عندك حتا ذنب فيه
غيمة [بعدت عليها وهيا كتشوف فيها] : يامنة مني غادي تفيق غادة تسامحني ياك
خديجة [شدات ليها فوجهها] : يامنة اصلا مكتشدش فقلبها وهيا عارفة بلي نتي مدرتي والو يعني مغاداش تقلق عليك ابنتي
غيمة [بإبتسامة] : كنتمنى
خديجة [بعدت عليها وهيا منزلة راسها] : موهيم راه سعيد قالك جمعي حويج حيت غادين تمشيو
غيمة [قرنات حواجبها بعدم فهم] : علاش فين غادين
خديجة : معرفتش هدشي لي قاليا انا [هزات عينيها فيه بترجي] عفاك ابنتي خرجي عندوا وطلبيه يبقى هنا

• خرجات غيمة من البيت وهيا كتعتر فجليلها وقفت حدا بوشعيب لي كان بارك وحاط يدوا على راسوا...

غيمة : عمي فينوا بابا
بوشعيب [هز راسوا فيها] : راه خرج برى

• خرجات كتجري وخديجة تابعاها من لور ، وقفت قدام الباب وهيا كترجع نفس تاعها من بعد كملات جراها عند الأب تاعها لي بان ليها موقف طموبيل برى وواقف حداها...

غيمة [وهيا كتنهج] : بابا فين غادين نمشي
سعيد : غادين بحالنا [طلعها ونزلها] فين حويجك
غيمة : فين غادين نمشيو ابابا الى خرج من عندهم
سعيد [بدا كيغوت وهوا كيضرب فصدروا] : واش بغيتي باك يولي يتهان قدام شي حد قد ولادوا ويبقى بارك عندوا [هز صبعوا فوجهها] كلشي نقدر نسكت عليه الى حاجة وحدة هيا انه شي حد يحاول ينقص منك ، نهزك بسناني ومنخليش شي حد يمن عليك دغمة تاع الخبز
خديجة [قربت لحداهم وهيا كتبكي] : وا خويا واش حنا منينا عليك شي حاجة وعزيز راه غلط انا عارف ولكن والله حتا مني يجي حتا نخليه يعتاذر ليك ولغيمة غير دخل ونعل شيطان
سعيد [شاف فغيمة وهوا معصب] : دخلي جمعي حويجك مغاديش خاصنا نمشي
غيمة : ولكن ابابا
سعيد [وهوا مقاطعها] : مكين ما ولكن قلت ليك دخلي جمعي حويجك هيا دخلي جمعي حويجك

• دخلات وهيا كتبكي ومباغاش هاد المشاكيل كلها طرى بسبابها ، مشات دخلات وبدات كتجمع فحويجها وهيا كتبكي وتشهق....

✍︎ من تأليف والكتابات : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎