بين الثراء والبادية

الحلقة 10

🌓 بيـــــن الثـــــراء والباديـــــة 🌓
❤︎ ☕︎ 𝐵𝑦 : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎

🌖 حينما نتقبل الاختلاف ، نحصد أجمل ثمار الحب والتناغم 🌘

الحلقـــــة : 10
• نزلت راسها للأرض وهيا كتحس بواحد الغصة فحلقها ، هزات راسها فيها لقات دموعها نازلين...

يامنة : وعودك ليا كعما وفيتي بيهم كان كل مرة كيجي باباك راسوا كيبقى فيا الحال حيت كنت متوقعة غادة تجي معاه ومكتجيش

• تلاحت عليها غيمة معنقاها وهيا كتبكي وتشهق ، بادلاتها لعناق ودموعها نازلين بصمت مع كل كلمة كتقولها...

غيمة : عفاك سمح ليا وراه والله حتا راك عزيزة عليا وراه من نهار ماتت ماما مبقيتش كنعرف راسي ، وانا والله مكنت باغا نخلف بوعدي ليك [بعدتها عليها] وهانتي شوفي انا جيت عندك يعني وعدي ليك وفيت بيه
يامنة [شافت فيها بعينيها المغرغرين وهضرت بهدوء] : كون مكان باباك جابك بزز مكنتيش غادة تجي
غيمة : مجيتش بزز [نزلت راسها] ولكن كون مكان بابا مبقى عندوا والو بصح مكنتش غادة نجي [هزت راسها فيها وهيا مبتاسمة] ولكن صافي نقدروا دابا نرجعوا صداقتنا كيف كانت ياك ؟!

• تلاحت عليها يامنة معنقاها كأنها موافقة على كلامها ، بادلاتها غيمة العناق وهيا كتبكي وضحك...

يامنة [بعدتها عليها وهيا كضحك] : علاش كتبكي صافي ضحكي

• وسط بكاهم وضحكهم تحل عليهم الباب ودخلت خديجة لي غير شافتهم وقرنت حواجبها...

خديجة : اويلي على الهيشات مالكم كتبكيو
يامنة : غا المعزة ايِّما
خديجة [وهيا كضحك] : باقين نتوما هوما نتوما ، موهيم نوضوا بدلوا حويجكم اجيو عونوني راه جايين عندنا ناس
غيمة : خالتي بغيت باليزاتي راه هوما لي فيهم حويجي
خديجة : باباك راه خرج ودا معاه سوارت تاع طموبيل
غيمة : وباش غادي نبدل حويجي ؟!
يامنة [ببتسامة] : انا نعطك شي حاجة من عندي كيف ديما
خديجة : يله عطيها متلبس وتبعوني باش تعونوني

• خرجات خديجة وخلاتهم ، مشات يامنة للماريو جبدت منوا بيجامة طويلة وسبنية تاعها...

يامنة : هانتي هاكي هادوا وراني مزال عمرني لبستهم
غيمة [وهيا كتقلب فيهم] : انا مكنلبسش بحال هدشي
يامنة : انا عندي بحال هدشي واش معجبوكش
غيمة [بتاسمات ليها فوجهها] : لا غير هاريهم انا غادة نلبسهم

• خداتهم منها وقررت تلبسهم حتا يجي بابها وتبدل حويجها بدكشي لي جابت معاها ، بدلات حويجها بالبيجامة وطلقات شعرها...

غيمة [مدات ليها سبنية] : هاكي هادي مكنديرهاش
يامنة : ولكن حنا غادين ندلوا للكشينة وخاص شعرك يكون مغطي
غيمة : لا مكيعجبنيش نغطيه
يامنة : وراه تقدر طيح شي شعرة فالطعام
غيمة : وراه اصلا مكنعرفش نقادها
يامنة : قربي عندي نقادها ليك

✍︎ من تأليف والكتابات : 𝑂𝑢𝑚𝑎𝑖𝑚𝑎 𝑀𝑎𝑟𝑖𝑝𝑜𝑠𝑎 ☕︎ ❤︎