🌖 حينما نتقبل الاختلاف ، نحصد أجمل ثمار الحب والتناغم 🌘
الحلقـــــة : 130 • خرج رضوان هوا سميرة من البيت وخلاو إبتسام متكية باش ترتاح ، مشاو هوا وياها للكوزينة وبركوا وهوما كل تفكيرهم فشنو ممكن يكون واقع ليها...
رضوان [وهوا منزل راسوا وشادوا بيديه] : شنو ممكن يكون واقع ليها سميرة [تنهدت وهيا كتشوف لبعيد] : والله اولدي معرفت شنو ممكن يكون طاري ليها رضوان : ترتاح وسوليها باش نعرفوا مالها سميرة : اه ضروري ودابا اولدي نوض سير رتاح ليك شوية راه قريب لفجر يوذن رضوان [تنهد وناض وقف غادي] : اه انا غادة نرتاح واحد ساعتين ونوض نمشي
• مشا للبيت تاعوا وهوا كيفكر فالبنت لي جاب وشنو ممكن يكون واقع ليها ، تكا فبلاصتوا وبقا كيفكر لمدة حتا ستسلم لنعاس أما سميرة فهزات المانطة لي كانت محطوطة فوق سداري لي فالكوزينة وتغطات بيها ونعسات...
•"بعــد مــدة زمنيـــة طويلـــة"•
▪︎ عند خديجة لي كانت فاقت هيا والبنات بكري وطيبوا لبوشعيب وعزيز لفطور لي غير فطروا وتحركوا شادين طريق باش يقضيو شغلهم ، أما خديجة والبنات فبقاو باركين كيهضروا وكيكملوا فطورهم...
خديجة : يله البنات فطروا خلاص ونوضوا جمعوا دار راه شوية وتجي عندنا سعاد نورة : إيه بصح يامنة [جمعت الوقفة وقفات] : يله البنات نوضوا خليونا نقسموا شغل
• ناضوا لبنات بعدما كانوا قسموا شغل باش كل وحدة دير حاجة أما خديجة فمشات وجدات الخضرة لي غادة دير بيهم كسكسو من يقرب الوقت تاع الغداء...
▪︎ عند سميرة لي كانت فاقت وجدات لولدها لفطور لي غير فطر وخرج وخلاها كتوجد فالحسوة باش تديها لإبتسام حيت مزال مكلات والو ، بعدما طابت الحسوة لي كان فيها بزاف تاع العشوب كبات ليها فزلافة وداتها لعندها للبيت...
سميرة [وهيا هازة زلافة فيدها وداخلة لعندها] : بنتي إبتسام فقتي إبتسام [بدات كتقاد فبلاصتها وهيا مبتاسمة] : سمح ليا اخالتي معدباك معايا سميرة [حطات ليها لبلاطوا قدامها] : هانتي كوليها محدها سخونة باش تسخن ليك ذاتك راه فيها العشوب لي مزيانين ليك إبتسام : الله يعطك صحة كتبان كتشهي سميرة [بركات حداها فطرف ناموسية] : ونتي بعدا ذقتيها باش تحكمي إبتسام [هزات المعلقة كتاكل] : لا زوينة شكرا ليك سميرة [بإبتسامة] : بصحتك ابنتي
• بقات باركة حداها وهيا كتاكل بشوية عليها كانت كتراقبها بنظرات لي حاملين بزاف تاع الأسئلة ، بقات كتفكر كيفاش تجبد معاها الموضوع وتسولها على حالها ، بعدما بانت ليها قريبة تكمل جبانية قررات تزعم وتسولها ، حطات يدها على فخذها كتحاول طمأن فيها...
