KAAGAD na lumabas ng The Coffee Bean & Tea Leaf sa may Eastwood pa rin si Gio pagkakuha ng inorder nitong Ice Blended drink. Nakasimangot si Gio palabas ng coffee shop. Halatang bad trip pa rin sa kinalabasan ng date niya kanina. Napalitan na rin niya ng malinis na collared shirt ang narumihang damit kanina ng magpang-abot sila ni Archie kanina. Sa katabing Uniqlo store lang siya bumili. Pero kahit napalitan ang damit, hindi pa rin nito maitatago ang namumuong pasa sa gilid ng labi kung saan siya tinamaan ng kamao ni Archie.
Nilalakad na ni Gio ang Eastwood Mall papunta sa parking. Pauwi na siya at pipilitin niyang matulog kaagad kahit punong-puno pa rin ng pagkabugnot ang nararamdaman.
May makakasalubong si Gio ng dalawang pares sa maliit na bridge malapit sa fountain. Nakaramdam siya ng pagkaasar sa nakikitang masuyong pag-uusap ng dalawa habang naglalakad. Sa pagkainis, sinadyang bungguin ni Gio ang lalaki.
"Hey! What's your problem, man!" Sigaw ng lalaking binunggo niya. Pero tuloy-tuloy lang naglakad si Gio palayo. Pinigilan naman ng babaeng kasama ng lalaki na balak pa sanang siyang sundan.
Malapit na sa Eastwood Mall si Gio nang matigil siya sa pagsipsip ng kanyang dessert coffee. Tiyempong nakita niyang palabas ng diner sina Nadine at Archie, masaya pang nag-uusap. Nagawa pang akbayan ni Archie si Nadine habang papasok sa mall. Marahil papunta na rin ng parking ang dalawa.
Nagngingitngit na ngayon sa galit si Gio. Sa sobrang konsentrasyon niya sa pagsunod sa tingin sa dalawa, nagulat siya ng may kumalabit sa kanya.
Isang naka-costume ng Iron Man pala ang nangalabit sa kanya, nagpakita ng konting dancing moves saka sabay turo sa buslo ng pera sa paanan nito. Kaagad namang ibinigay ni Gio ang hawak na Ice Blended drink sabay iwan sa natitigilang Iron Man impersonator.
Inangat ng impersonator ang Iron Man mask niya, nagtatakang napatingin sa dessert coffee na hawak saka sinundan ng tingin ang naglalakad na palayong si Gio. "Gagong 'to, ah! Hindi naman ako umiinom ng kape."
BINABASA MO ANG
Pinakatatagong Lihim (COMPLETED)
RomanceLihim na itinatangi ni Nadine ang popular heartthrob na college jock at star basketball player sa school nila na si Archie. Ngunit meron nang nobya si Archie, ang equally popular na student babe na si Cyndi. Pero hindi lang iyon ang problema ni Nadi...
