Pinakatatagong Lihim (COMPLETED)

13

SA parking ng Shakey's sa may Acropolis, naghihintay si Cyndi sa loob ng kotse habang umoorder ng take-out sa loob ng pizzeria si Archie. Para hindi mainip sa paghihintay, nag-browse muna sa Facebook si Cyndi gamit ang Blackberry Curve, kapareho ng unit ni Archie, pero ang gamit na unit ng dalaga ay kulay pink . May notification na lumabas na isang Facebook user na may username na Nightmare Stalker ang nag-post ng video sa public group ng Saint Therese Academy. Alanganin siyang i-click ang video para panuorin at baka virus lang ang laman nito. Lalo pa't nakakatakot ang ginamit na profile picture ng uploader, GIF image ni Ghostface mula sa Scream movie na may hawak na kutsilyo na umuumang sumaksak. Pero hindi niya mapigilang di ma-curious sa title ng video na ina-upload ni Nightmare Freak: "Saint Therese Scandal".

Bahala na nga. Pero nang itapat niya duon ang cursor ng browser niya para i-click ang ang video ay buffer lang ito ng buffer. Biglang kumislap ang napakaliwanag na kidlat na sinabayan ng dumadagundong na kulog. 'Di napigilang mapasigaw ni Cyndi.

Sakto namang palabas na ng pizzeria si Archie bitbit ang apat na boxes ng pizza at plastic bag na may kasamang mga Mojos at fried chicken.

"I'm back!" Nakangiting sabi ni Archie nang buksan ang door ng passenger side ng kotse.

"Baka nakalimutan mo 'yung Manager's Choice. Magtatampo ako." Sabi ni Cyndi habang tinutulungan si Archie sa mga food na binili nito.

"Ako pa! Unang-una nga 'yun sa inorder ko eh." Nakangiti pa ring tugon ni Archie.

Nang maipasok na nila sa kotse ang mga inorder nilang food, pumuwesto na ng upo si Archie sa harap ng manibela. Bago paandarin ang kotse, napansin ni Archie na titig na titig sa phone si Cyndi habang pindot ng pindot sa phone nito.

"Bagong game ba 'yan at hindi maalis ang tingin mo sa phone mo?" Tanong ni Archie.

"Hindi. May nag-upload sa Saint Therese Facebook group. Scandal video sa Saint Therese ang nakalagay. Pero nagba-buffer lang eh. Baka nagloloko 'yung network ko." Sabi ni Cyndi na tuloy pa rin sa pagpindot ng phone.

Tumingin si Archie sa nagdidilim na kalangitan. Pahapyaw-hapyaw itong lumiliwanag sa kidlat na sinasabayan agad ng malakas na kulog. "Papaulan na kasi. Kaya humihina 'yung signal. Kina Dennis na lang natin panuorin 'yan. Sa laptop niya. Mahirap nang maabutan tayo ng malakas na ulan sa daan."

At pinaandar na ni Archie ang kotse papunta sa bahay ni Dennis sa may White Plains.