كرونيك :💕عنيد_&_عنيدة💕

الحلقة16

الحلقة16
اياد يحكي بين روحه: حبس ويشراك دير علاش راك تبع فيها. و هي وحدها والله لوكان تشوفك غير تفضحك نييت وش دارت فيك ستنى نروح نجيب واحد من ولاد علياء باش نلقى السبة و نجي معاه
كوبات على حنان و رجعت تتمشى فتحت باب الحظيرة شافت الارانب الصغار تبسمت و قربت عندهم
قعدت فالارض و حطت واحد فحجرها تهدر معاه:يا عمري شحال صغير حتى شعرك ناعم بزاف
سمعت صوت خوها جود
قال بفرح: خالو بليز فتحلي لباب ندخل حاب ندير كيما شمس
اياد خزر فشمس. و تبسم قال :وك نفتحلك يا روح خالو
هو ما حبش يخليها وحدها راح بسرعة جاب جود و رجع يطمن عليها
فتح الباب و دخلو
شمس عدلت روحها و قالت بقهر و هي تحط الارنب: فففففف وش هاد اللصقة يا ربي و ناضت حابة تروح
قال و هو يمسح على الارنب لي عند جود:مدام علابالك بلي نجي معاكم علاش مرفضتيش و قعدتي
شمس بغضب: والله كنت رافضة على جال ختك هااو بلاني ربي بخوها تاني بعدلي من الطريق دزاته و خرجت تخرنن
اياد اه علاجال ختي هااو ختي مسكينة ما تقدرش تهدر معاك تاكليها يا الضبعة و قعد يلعب مع جود
~~~اليوم الثاني~~~
فيقها صوت المنبه كانت الستة تاع الصباح هي تحب تنوض بكري و تقعد مع جدها
دوشت و صلات الفجر و لبست روبة قصيرة افلور فردت شعرها حطت مسكارا و قلوز و خرجت

كرهاتو لهاد لي وسمو اياد تنهدت و قالت: راني حاساتو مقيدني ما يخلنيش علىى راحتي ففف
قررت تعيط لجداتها تسقسي عليها قبل ما تهبط
~~~عند جدها~~~
كان قاعد فصالون يترشف من قهوتو هادي عادتو ينوض بكري ملي ينوض يصلي لفجر ميوليش للفراش
طل على اياد لقاد رجع رقد بعد ما نوضو يصلي معاه
رجع قعد كان يتمنى تنوض عجوزتو و تجي تشرب معاه القهوة حتى بانتله شمس جاية لعندو
شمس بابتسامة و هي تدخل فلباب:صباح الخير جدو
جدها بسرور :صباح النور يا روح جدو ارواحي قعدي قدامي
قربت منو وهي تتبسم بصح حبسها العبد لي راقد تما عوجت فمها كان راقد على ظهرو و مغطي عينيه بذراعو قالت بنرفزة:افف حتى هنا راه ورايا
جدها باستغراب: شكون لي وراك
شمس شاورت لعندو و قالت : هاد البغل لي راقد هنا و كملت بنفاق:تصدق يا جدي انو بابا كان راح يضربني بسبتو هو prsqجا لعندي يحوس فتلفوني و يعيط عليا و كي لميت عليه الناس با يخلصوني منو لعب دور الاخ لي خايف على اخته و نصحها باش تستر روحها وانا ما حشمتش و سبيت زريعته سب
هبطت عينيها و كملت تهدر: يا جدي زعما انا لي نقدر نخلي كاش واحد يتعدا عليا مستحيل
خزرت فاياد بغش
شاف فيها جدها و كانو عرف في واش راها تفكر قال باصرار: شمس يا بنتي احشمي شوية و احتارميه اياد راه ضيفنا متنسايش و حنا الضيف نكرموه ماشي نذلوه فتحكمي فلسانك الطويل شوية
قالت بغضب وهي نايضة: وهو علاش ما يحترمكمش و يبعد على بنتهم
حكمها جدها من يدها و قعدها:دوكا نتي جيتي تقعدي معايا ولا تشكيلي على اياد
قالت بقهر: لا والله غير جيت لعندك بصح كي شفت هاد البغل علابالي دخلت و خرجت فلهدرة
الجد بغضب: شمس عيب و سكريلنا هاد السوجي
شمس بدلع و هي تضحك:هههه خلاص جدو علاجالك نسكت ههه
اياد راح عليه النوم كان راح ينوض يقعد مع الجد مي كي سمع صوتها قعد في بلاصتو

و بين روحو راقد باش يسمع كلامها بقى مصدوم من هدرتها ملي بدات وهي تسب و تشتم فيه تعصب و كان حاب ينوض ليها و يكسرلها فمها على سبها ليه و لي زاد قهره جدها لي كان يترجى فيها تسكت
رجع يسمع فيها تقول: هيه وقتاش يوصل
جدها: يمكن ليوم ولا غدوة لهاد الدرجة راكي فرحانة!
شمس بفرح: تقددر تقول طايرة بالفرحة
اياد حس بلغيرة من هاد لي راح يجي
انتبه للجد كي راح باش يطلب من الخدم يوجدو لفطور
استغل الموقف باش يرجع حقو منها ناض و تقعد في بلاصتو: صباح الخير باين هاد النهار من وجهو كي داير يعني كي صبحت على هاد الوجه المنحوس و ناض يعدل في فراشو
شمس و هي تخنزر فيه: المنحوس نتا بغل تاع وذني
اياد قرب لعندها و حكمها من كتافها و ضغط عليها:مايسمونيش راجل الى ما عودلكش التربية و قصيتلك هاداك اللسان
دزاته بقرف: دير ما فيك هفف
كنت راح تكمل تهدر مي هو سبقها كي حط يدو على فمها بقوة و قال: لك حرف خرج من فمك راح دفعي حقه
وكمل يحكي بغرور: انتي مزال ماتعرفينيش كي داير راح نخليك تبكي تحت رجليا دم راح نخليك مذلولة و بعد عليها
كي كان قريب منها كان يحس باحساس غريب اول مرة يحسو ما فهمش شنو هو
ملي شافها و حالته نقلبت هو بعمرو ما تحرش على شي بنت ولا فرض رايه عليها مي هاد الطفلة ما يقدرش يتحكم باعصابه عليها
شاف جدها جاي لعندهم قال: جربي حكيلو و تشوفي و راح للدوش يغسل
شمس حاسة روحها كيما البركان لي راح ينفاجر فأي لحضة وش يقصد هدا والله ما نعديهالك يا حقير و جات بش تروح
حبسها جدها: وين رايحة دوك يوجد الفطور
شمس: ما نحبش نفطر و طلعت بسرعة
شاف اياد واقف و توقع انها تعصبت كي شافتو
~~~عند علي~~~
كان رايح هو و مرته لدار ختو هبة باش يتفاهمو على تجهيزات الخطبة و العرس
هبة بفرح:و الله لي تقرروا يا خويا رانا راضيين بييه
علي: ان نقول الخطبة تكون بعد اسبوعين و العرس يكون بعد عيد الفطر نشاله
هبة: نشاله كيما تحب بصح البنت عندها شرط
علي باستغراب : واش هو
هبة:حابة تكمل قرايتها
علي هدر رايه بلا ما يشاور ولدو خالد: اكيد رانا موافقين هدا من حقها