كرونيك :💕عنيد_&_عنيدة💕

الحلقة 96

الحلقة 96
~~~عند شمس~~~
كانت فلكوزينة اول مرة تحس بواجبها كزوجة اتجاه اياد
ناضت بكري وجدتلو وجدتلو لي قدرت عليه من لفطور
ابتاسمت بفخر كانها دارت انجاز عظيم بالنسبة ليها
راحت تفيق اياد دخلت لقاتو مكانش سمعت صوت لماء عرفت بلي راه يدوش
عدلت روحها قدام لمراية سرحت شعرها لي زاد من طولو خاطر عندها مدة ماقصاتوش حبت تغير من ستيلها حطت شوية ماكياج خزرت فروحها وسرحت بليلة لبارح دارت مجهودها باش ماتبكيش وتعصب اياد
تبسمت هاد لمرة قدرت نعديها فياترى نقدر نكمل هكدا ولا نو اوف ياربي علاش مانتخلاش علا هاد الوساويس ونحب اياد ونخليه يعتارفلي بحبو قطع عليها اياد لي حكمها من خصرها
اياد خرجت من سالدوبان تصدمت كي شفتها واقفة قدام المراية تبدل فليقريماس تاع وجهها خطرة تتبسم خطرة تفكر خطرة تزعف

كنت متوقعها مزالت راقدة كيما لعادة كل مانكملو من لممارسة تخليني حتا نرقد وتهرب تكمل رقادها فلبيت لخرى
حسيت بلفرحة يعني لبارح ماهربتش رقدت قدامي قربت لعندها وحكمتها من خصرها: فواش راه يفكر العسل معا الصباح
شمس بخجل: والو برك جيت نفيقك تروح تفطر
اياد بعد عليها بعد ما باسها وراح يلبس
اياد بستغراب: نفطر ماتقوليش وجدتيلي لفطور
شمس بغزول من اسلوبو:ايه حمد ربي كي شمس تنازلت ووجدتلك لفطور يكون بعلمك انت اول شخص يذوق ماكلتي
اياد مات بالضحك: والله يا بنتي التجربة لولة مافيش لمان
كمل لبسو وقال لها وهو يسحبها من يدها : يالله نشوفو شمس واش موجدتلي
اول مالحقو للكوجينة تخلع قلبت عزراينها كامل شاف فالطابلة فشل بالضحك
شمس تعصبت: ماعليش تقولي علاش راك تضحك
اياد كنت عارف بلي سور تكون خلاتها بصح ماشي لهاد الدرجة ماقدرتش نحبس من الضحك
قعدت فطابلة وقلت:لالا برك خممت نسجل هاد ليوم فلميموريز تاعي ونكتب فيها شمس بنت ع.النور وجدتلي لفطور في مثل هاذا ليوم وكمل يضحك وشمس فار دمها يعني يتمسخر عليها خاطرها فاشلة فكلشي
خزرت فيه وهو يضحك كان قاعد فلكرسي وهي واقفة قربت لعندو جبداتو من شعرو بلعقل وقالت: اييه انا شمس بنت ع.النور مانخلي حتا واحد يضحك عليا
اياد بعدلها يدها وسحبها لحجرو قعدها وقال: مانضحكش عليك راني فرحان بهاد الانجاز العطيم لي درتيه علاجالي
اياد صح كان فرحان وحس بلي الدنيا ضحكتلو خاطر شمس مابكاتش وماتعصبتش فليلة تاع لبارح لعكس بقات راقدة قدامو والصباح ناضت وجدتلو فطورو مالغري مايصلحش ههههه حس بلي ملك الدنيا
شمس قربو منها وترها كانت قريب تبكي صح قدرت تتحكم فروحها ليارح بصح دوكا ماتقدرش وهمت روحها بلي اياد يحبها برك باش تجيبلو لولاد
حست بنفس اياد يحرق فرقبتها بعدت عليه بسرعة وراحت للفريجيدار قالت وهي تمسح دموعها لي طاحو : تحب نمدلك لجو
اياد مكانش حابها تبعد كان حاش بنشوة الانتصار خاطرو قدر يروض شمس قال وهو يتبسم : لالا راح نذوق القهوة تاعك
شمس جابت لها جو وراحت قعدت
قالت بخجل وهي حاطة راسها: اياد ماعليش توصلني ليوم نشوف ماني راح ترجع من مكة
حست بانها ماش شمس لقديمة ولات تطلب الاذن من اياد لي مكانتش ديرلو لحساب
اياد ذاب من حشمتها وزادو عليه شفايفها لي خرجتهم لبرا قال : اوكي راح نوصلك بصح ماتنسيش تكثري لمكياج
شمس بتبهليل: اه وعلاش
اياد بخبث: علاجال خدودك ههه خايف تشوفك جداتك تقتلني تقولي كليت بنتي هههه
شمس : ايه بسبتك نتا لي تشوهلي وجهي بلخماج تاعك
اياد يضحك: والله انا بوساتي نورمال غير نتي خدودك حساسة كل مانتوشيك يبقاو لي طراس فيهم
شمس خنزرت فيه وسكتت خاطر تعرفو سامط