كرونيك :💕عنيد_&_عنيدة💕

الحلقة25

الحلقة25
~~~فالحفلة~~~
الكل فرحان بهاد المناسبة
حنان و نور محبسوش من الشطيح
يمات حنان و عجوزتها كانو مجمعين يحكو مع المعروضين
الجدة حست بغياب شمس راحت تحوس عليها
~~~عند شمس~~~
دخلت لاشنبر تاعها نطرت بوشاتها و الطالون و قعدت تبكي بقوة: حيوان كلب
نحات روبتها و بقات بدوبياس و شافت روحها فلمرايه: زعما كلامو صح زعما الكل يكرهوني بصح علااش
كملت تعيط و تجبد فشعرها: حتى انا نكرهكم مانحب حتى واحد فيكم من غير ماني ورمات روحها على السرير تبكي
~~~عند حنان~~~
ما خلات حتى بلاصة و ما حوسوش فيها هي و جداتها خافوا على شمس وين راحت بلا ما تخبر حتى واحد
الجدة حاكمة التلفون و تصوني للمرة الالف و اخيرا جاها صوتها
شمس بعد ما هدات روحها و تحكمت فأعصابها ريبوندات :وي ماني
جداتها بخوف: هاا وينراكي يا بنتي
شمس تتنهد: فالدار
جداتها مستغربة: فالدار!علاش واش صرى
شمس: نوو مكان والو غير حسيت روحي ماشي مليحة وزاد عليا صوت الديجي صدعني علابيها روحت
كملت تحكي: ماني سلميلي على حنان و قوليلها ماتزعفش مني كيمكملتش معاها راني خليتلها الكادو تاعها فلاشنبر
جداتها حسات بلي بيها كاش حاجة من غير حكاية الصداع و ما حبتش تحكيلها ما حبتش تشد فيها قدام حفادها لي كانو قاعدين قدامها الت : صحا بنتي دوك نقولها تهلاي فروحك وانا مانطولش و نولي
كوبات و حكات لحنان لي غاضها الحال من تصرف شمس
~~~01h00 تاع الليل~~~
دخل لدار بعد ما دار كل شوارع المدينة غير باش ينسى واش دار لافوتو تاعها ما قدرش ينحيها من بالو ضربها و كي كان يجرها من شعرها وهي تخزر فيه بذيك الخزرة لي قتلاتو حس روحو حقار
عدا بحذا لاشنبر تاع حنان و سمع صوتها العالي
كانت تشوف لكادو لي جابتو شمس كان عبارة عن سنسلة الماس تحفة فيها قلبين واحد مكتوب فيه حرفها و الاخر كان حرف حنان
انتابهت لايهاب لواقف عند الباب قالت بفرح: ايهاب ارواح تشوف لكادو لي جابتهولي شمس يهبل
حس بالرعب كي سمع سميتها قال وهو يمشي: مبروك بالصحة و لهنا نشاله و راح بسرعة خاف يتكشف
~~~فالصباح~~~
ما ناضتش بكري prsq لبارح ما رقدتش خلاص عداتها بكا
راحت دوشت و صلات و لبست تنو سبور بلو نشفت شعرها و حطات من برفانها و خرجت
دخلت للصالون لقات جداتها قاعدة و حداها خالها علي ختفات ابتسامتها و قعدت قدام جداتها بعد ما سلمت على خالها