كرونيك :💕عنيد_&_عنيدة💕

الحلقة 33

الحلقة 33
~~~عند إياد العاشق الولهان~~~
كان مقهور من تعقد العلاقة بين شمس و باباها prsq كان حاب يطلبها من بالرسمي بصح بالاول لازم يقنع ختو لي دايرة عليه حرب و رفضت انو شمس تكون مرتو بصح هو معاندها و أصر على شمس ولا راح يبقى عازب طول عمرو
علياء بغضب: انت من كل عقلك حاب تدي هاديك اللفعة و الله غير تكرهلك حياتك و قول علياء ما قالتش
إياد ااه و انا مالي إذا قلبي هو للي ختار تنهد و قال:اي من عقلي و تأكدي بلي الا ما تزوجتش شمس مراحش نستاقر طول عمري و قولي إياد ما هدرش
علياء بثقة: اذا قبلت بيك بالاول ارواح واجهني خصوصا كي راها تشوفك خو عدوتها و ديجا كرهاتك من نهار شافتك
إياد بإصرار: راح تقبل و بالسيف عليها نتي ما عليك غير تخبري ع.النور بالحكاية
علياء بضيق: يا حسرا على ع.النور من هداك ليوم لي ضربها فيه و هي مبعدة عليه ما تخليهش مامبا يشوفها خلاتو يتعدب مسكين
إياد : شوفي نتي ديري لي عليك و الباقي عليا كينديها راح نخليها تحتارم بوها و تحتارمك حتى نتي
~~~~عند نور~~~~
بعد ما تغداو طلعت لجناحهم كانت حاسة ببرود خالد اتجاهها راحت تلبس باش تروح تشوف يمها خاطر مسافرين
بعد ساعة
كانت موجدا روحها لبست روب بلونش طويلة مزيرة عند الصدر وواسعة من التحت زادت فوقها شال نوار غطات كتافها و طالون نوار
دخل خالد و انصادم من جمالها صح كانت حلوة بصح الروب زادت من جمالها
كانت تدير فالماكياج شافتو من المراية تبسمتلو
خالد قعد فالسرير و قال ببرود : علاش راكي مزينة كاش واحد راه جاي
نور اول مرة نشوف راجل يعارض زينة مرتو فصباحية عرسها حتى انو ما هتمش قاع قالت و هي تتنهد:نو حتى واحد برك حابة نزور يما قبل مانسافرو
خالد هههه معولة على السفر وهي معلابالهاش بلي دراهمي ما يكفيوش و انا مستحييل نطلب من عند بابا: و شكون قالك راح نسافرو
نور تصدمت من كلامو قالت: ماعرفتش ظنيت برك راح نسافرو و نجوزو شهر عسل كيما كامل المتجوزين
كانت تحكي وتشوف فالارض تفرك فصباعها من التوتر
خالد حس عليها ناض و حكمها من خصرها و قرب وجهو من وجهها وقال: وحنا راح نعيشو شهر العسل بلا مانسافرو
نور قريب دوخ من قربو وزاد عليها صوتو قالت :ماعليش بصح حابة نزور دارنا
خالد ذوباتو بعيونها و حشمتها منو قال و هو يبوس خدها: نوو
نور غاضها لحال بصح ما تجادلتش معاه برك بعداتو عليها بقوة كردة فعل و راحت تمسح ماكياجها بعصبية
خالد تنرفز من الجاست تاعها و حتى هو مافسرلهاش علاش رفض بصح قال هكاك خير باش الخطرة الجاية تشاورني قبل ما توجد روحها عمبالها زعما كي نشوفها موجدا راح نخليها تروح
نور كانت معصبة عالاخر كانت ترفد الحوايج و تحطهم فوق الطابل بقوة ماعرفتش علاش يتصرف معاها هكدا و كأنو مغصوب على هاد الزواج رفدت بيجامة و دخلت للدوش و هو يخزر فيها
خالد: هففف دوختني بريحتها لوكان نحكمها نكرفشها بصح ما عليش والله مانفوتلها هداك التخنزير لي ديرو بعيونها حابة تقتلني والله غير نلاقيها بالعصا