كرونيك :💕عنيد_&_عنيدة💕

الحلقة 53

الحلقة 53
~~~عند حنان~~~
كانت حشمانة و خايفة باش تروح لعندو وتسلم تقريرها نظراتو ليها و مراقبتو لتصرفاتها كانت توترها و تخوفها تشجعت رسمت علا شفايفها بتسامة و دخلت
ياسين ما صدقش عينيه كان يستنا هاد اللحظة بفارغ الصبر تبسملها
حنان بخجل بعد ما ردت السلام: مسيو هايليك التقرير تاعي خلصتو ليوم
ياسين بإبتسامة: تقرير حنان ####
حنان حلت عيونها شطر طلع حافظ سميتها بلكامل قالت : وي مسيو وراحت تخرج
حبسها: اا مدمزال باباك راه غالي علا الوالد راه موصي عليك
حنان: تبسمتلو مرسي مسيو و خرجت
حنان اففف علاش كل مانشوفو نتوتر و قلبي نحسو راح يحبس ااه نوو امبوسيبل يا حنان راهو مزوج واش هبلتي
~~~بعد 15 يوم~~~
عند الجدة
كان كامل مجتامعين عندها
الجدة تبسمت وهي توشوش لشمس: هاه يا بنتي مكانش كاش حاجة فالطريق
شمس: لالا مكان والو
دكرتها بمحاولة إياد آخر مرة كي جا باباها
اياد تناسا لحكايا او محبش يغصبها
هي من هداك النهار و الخوف عامل بيها ولات تحاول ماطولش لسانها معاه
كرهت روحها هي بعمرها ماكانت ضعيفة فيقتها حنان من سرحتها
حنان تتبسم : شمس واشبيك راني نهدر معاك
شمس توترت : هاه سمحيلي ما تولهتش
حنان تضحك: باينة بلي طيحك علا راسك مسيو إياد بصح ليوم راح نخطفوك منو
نور: ايه ايه ليوم كامل راح نباتو عند ماني باه نتذكرو ليسوفونير تاعنا
تنهدت وكملت تحكي وهي تمسح علا كرشها لي بدات تتكعبر: ااه لوكان غير نوليو لهادوك ليام
شمس حبت تغير الموضوع خاطر حنان تغيرت ملامحها كي عرفت بلي نور تقصد ليام لي قبل ما ترتبط بخالد:اوكي راح نسهرو حتا للصباح
~~~فدار ع.النور~~~
إياد كان عندهم
كان قاعد يلعب مع جاد بلايستيشن وجاسم قاعدلو فحجرو
دخلت علياء رافدة سنيوة تاع لقهوة قالت:علاش ما جاتش مرتك معاك
اياد حط جاسم من حجرو وقعدو قدام خوه يلعب ناض وتقدم عند ختو قعد قدامها قال بهدوء:ديتها عند جداتها راهم البنات عندها
هو علابالو بلي علياء تنبش علا حاجة بصح هو ماحبش يدخلها فحياتو خاطر هو لي خيرها بروحو لازم يتحمل
علياء بنرفزة: مافهمتش واش لي عجبك فهاد الشويطنة تخيل انها بهدلتني قدام فاميلتنا كي عرضتهم باش نعرفهم علا مرتك ماتخلاتش علا طوالت لسانها حتا و هي عوسة
إياد فد من هاد الحكاية كل ما يجي عند ختو تعاودلو نفس الاسطوانة رفد تلفونو و مفاتحو باس لولاد و خرج
ركب فطونوبيل و هو قريب يترطق من كلام ختو رفد تلفونو باش يعيط لشمس توجد روحها يروحو للدار