كرونيك :💕عنيد_&_عنيدة💕

الحلقة 165

الحلقة 165
~~~عند شمس واياد~~~
رجعوا لوتيل بعد ما بردت شمس روحها بالتحواس داها لسينيما لبحر متحف العرائس وهدا كان شرطها من الول تعشاو ورجعو بعد ما هلكاتو وطيبتلو رجليه حتا لعن الساعة لي خرج فيها مارضات تدخل حتا بدا يعرش ويسب ووعدها باش يطلعو للجبل تشوف رعاة البقر والخيل بغات تذوق شوية من معيشتهم
بعد مدة
خرج اياد من الدوش لف علا روحو فوطة قعد فسرير وشمس دخلت دارت دوش كيما يحب لخاطر نحات بيه التعب
خرجت شافت اياد مزالو قاعد بالفوطة ركزت معا كتافو وكرشو ووجهو حتا حست بالسخانة طلعت حمدت ربها كي دات معاها حوايجها لبستهم لداخل كانت لابسة شورط وبوستي تاع الستان فلبلو
اياد مقدرش يلبس كان حاس بوجاع فظهرو وهاد الحالة عندو قديمة كانت بسبب ترويض الخيل والضربات لي يتعرض ليهم هما لي دارولو وجاع فالظهر وزيد عجز بسيط اللي خلاه ميجيبش لولاد
شمس تنشف شعرها نتابهت لاياد خذا حبة دوا راح ياكلها بعمرو ما كلا دوا قدامها هاه😕يعني ممكن كان ياخذهم وانا محسيتش
شمس بشك:تاع واش هاد الدوا
اياد فهم قصدها اكيد متوقعة تكون حبة منشطة مي هوا خلاص برا معادش محتاج المنشطات اصلا جامي فاقتلو كي كان ياخذهم قال وهو يتسطح فسرير: مسكن لآلام الظهر علاش😒
شمس تفووو عليك ديما شاعلة فيك واش مكيش شايفتو كيفاش يتألم قربت لعندو :من وكتاش بدالك لوجاع اكيد زدناها ليوم وحنا ندورو
كانت قاعدة قدام رجليه شاف فعينيها الخوف قال وهو يجرها لعندو: شوية وجاع برك متخافيش وكي تكوني قدامي يتلاشا
عنقها وبدا يبوس فيها استسلمت الاحاسيسها كل ما تكون قريبة ليه تحس روحها طايرة فالسما
~~~عند غلا~~~
الساعة 3h الفجر
فاقت علا صوت باباها لي يفيقها باش يخرجو من الفيلا قبل ماتشرق الشمس
باباها كان مزروب وهيا متعمدة طول وكأنو واحد يقولها زيدي طولي شوية راح يفرج ربي عليك
باباها بنفاذ صبر واقف قدام لباب معاه لفليز: ازربي ازربي رانا طولنا علا لجماعة
قالت ببرود : خلاص اصلا مراحش يروحو بلا بيا لازم يسناو
رفدت ساك صغير معاها فيه شوية من حوايجها لقدام مبغاتش تدي معاها حتا حاجة من عند عزام
بباها : صدقيني راح تشكريني وتعرفي بلي نبغي غير مصلاحتك انا لي نعرف بلي عزام ميليقش ليك
غلا اييه حتا خليتني نبغيه ويتعلق قلبي بيه باش عرفت بلي ميليقش.
تجاهلتو مهدرتش معاه وهو كمل يحكي : كي نوصل راح نعيطلك من نومرو خالك عطاهلي باش نمشيه فهاد المدة
وكمل بضيق وهو يشوف عينيها حابسة فيهم الدموع : نتي حاولي تنساي عزام وعايلتو راح تعيشي هانية انا نبغي مصلاحتك