كرونيك :💕عنيد_&_عنيدة💕

الحلقة 113

الحلقة 113
~~~عند غلا~~~
حبت خوات عزام وندامجت معاهم هاد الشي فرح عزام سيرتو كي شاف بلي خواتو يضغطو عليها باش تلبس كيفهم وتكشخ فروحها
@فلمطار @
كانت قاعدة معا دينا ودنيا يسناو عزام يكمل من الاجراءات ويروحو
كانت تحس روحها فعالم ثاني فعمرها ما فكرت تسافر حتا بطنوبيل وليوم راح تسافر فلافيون
شافت فلمطار شحال كبير والناش شي رايح وشي جاي شافت دينا مركزة فتلفون تكونيكتي ودنيا حاطة لكيتمان تضيع لوقت بين ما يروحو ويماهم تقرا فجورنال تبسمت يعني غير هي لبهلولة بيناتهم هما موالفين
قطع عليها عزام لي شاورلهم يروحو
تمشي وتحوم بعينيها تشوف فكشي طيح عينها عليه
طلعت فلافيون وهي قريب تموت من الخوف كي شافتها طول عمرها تخاف من لمرتفعات
شورلها عزام تقعد قعدت قدام الطاقة وهو قدامها يماه وخواتو قدامو فلجيهة الثانية
اعلنو اقلاع الطيارة وزاد خوفها
عزام شفت رجفتها كسرت خاطري قلت: واشبيك خايفة
غلا بغيت نقتلو واش راه يشوف يعني قلت: لالا بصح معليش تخلي دينا ولا دنيا تجي تقعد قدامي
عزام عرفتها خايفة وتبغي وحدة من خواتاتي تقعد معاها بصح معجبنيش لحال هي ماعندهاش واحد من غيري انا لي نقعد قدامها ونخفف عليها (( رااح تبهدلك😂😂))
تجاهلتها قلعت لافيون ماحسيت غير بيها تبكي وتعيط بطول جهدها
تبهدلت قلتلها بلعقل: وااا سكتي بهدلتينا ما يصرالك والو الناس بدات تشوف
يماه : هاا شوفي مرت خوك بهدلتنا دوك واش يقولو الناس راح يقولو بعمرنا ماشفنا افيون
دينا غاضتني مسكينة كيفاش ترجف خايفة والجايح تاع عزام معصب يعيط عليها خزرت فدنيا ماتولهتش قاع
كي ستقرت لافيون فسما رحت لعندهم
عزام عندي ساعة وانا نحاول نهديها حتا المضيفة جات هدرت معاه بصح راسها خشيت بقات تبكي وتتقيا
شفت دينا لي واقفة قدامي قالت: عزام معليش تخليني نقعد قدامها
عزام مارفضتش خاطر نعرفها الحمارة تاعي حتا وتكون بين السما واللرض مستحيل تستنجد بيا ولا تطلب مني نعاونها قمت من بلاصتي خليت دينا تقعد وانا رحت قعدت فبلاصتها قدام يما وعينيا عليهم كانت حاكمة الكيس لي عطاتهولها المضيفة تتقيا فيه كانت تعصر باش تتقيا ماقدرتش عينيها خرجو من بلاصتهم
تولهت ليما لي قالت بغضب: متكونش مرتك اونسانت ونتا معلابالكش بلي لفواياج راح يكون دونجي عليها فشهر لول
عزام اه يا يما منين راح يجي قلت بهدوء: لا ماشي اونسانت برك اول مرة تركب فلافيون
يماه بتنرفيز: هاه باينة بنت لعساس
عزام الصبر يا ربي تجاهلتها ودورت راسي للجيهة التانية
غلا تهدنت شوية ملي جات دينا قدامها تهدر معاها مبغاتش تضعف قدام عزام وتطلب منو يعاونها