رواية على نور الشفق احيا واهيم ⚜️

78

,
لآ استبيحْ القراءه دُون لآيك  🎵💗؛

,

  #على_نُورّ_الشفقّ_وعلى_وتر_القدر

'

وليه لما اشوف ابتسامتك احاول اطفيها بأي ثمن واخلق فرصه لهالشي
ادري ما فيه حتى عذر يشفع لي عندك
لكن سمعت شي يخصني وطلّعني عن طوري
سمعت شي خلاني اقارن بين علاقة ابوي معك وعلاقته فيني
وليه هو رحوم عليك وقاسي معي
وليه يحط لك مليون عذر وانا يجافيني
وعشان احرق قلب ابوي استخدمتك انتي
بس هزني كلامك واللي ما نسيته لليوم لما كنتي تشكين لابوي الله يرحمه من معاملتنا لك انا وامي الله يرحمها
وليه قسينا وان رغم القسوه اللي عانيتي فيها منا كيف كان همك انك ما تنفرين منا وان قلبك لحد الحين يتغاضى عنا ويشفع لنا وقت قلتي له " ما ابي يونس قلبي منهم شي وينفر منهم "
ماكان هالشي عادي عندي ابداً وكيف انك تصارعين المك منا بس عشان ما تعاملينا نفس ما نعاملك
كان انتباه شفق معه لاخر لحظه وما كان قلبها شايل عليه هالكثر
لان خبر موته وفقدها له كان اكبر من ذنبه
حقيقة انه حيّ ومتواجد معها لحالها تكفيها
لكن شدّها اللي سمعه والسبب اللي غيره عليها وهو ما يتغير من فراغ اكيد انه سامع شي هزّه
غير انها تعرف اخوها زين وانه مستحيل يصدق اي شي
ما يصدق الا الشخص اللي يعرفه زين ويكون متأكد انه ما يكذب عليه بشي
وهالشي خلاها تتجاهل كل شي وتسأله بدون تردد وبنبره كاسيها اللُطف ناحيته ؛ وش اللي سمعته واوجع قلبك ياخوي وحدك على انك تتغير علي من وراه ؟
كلمة "ياخوي" كانت بمثابة المواساه لبتّال حتى لو ما عذرته ولا ابدت ردة فعل تجاه اسفه الا ان هالكلمه عطته شعور كافي بأن قلبها صافي من ناحيته
لكن سؤالها ضيّق صدره وهو يجهل لحد الحين الحقيقه الكامله بوضعه
لكّنه ما حبّ يحمل هالشي بداخله ويخفيه اكثر من كذا ويكتفي فيه ؛ اني ما اندرج تحت نسب الابوه معك
واني ولد ح..
اسكتّه من حطّت يدها على شفاته ونطقت وهي ادرى بكامل السالفه بعد ما تبينت وفهمت الشي اللي قاهره وموجع قلبه وسبب كافي انه يهدمه ؛ والله يخسون والله
انت اخوي من نفس الاب
ما انكر ان السالفه اللي سمعت فيها صدق
لكن مو انت والله مو انت
هذا اخونا اكبر منك وماكمل ثلاث شهور حمل وكتب الله ان امي تسقطه ولانك جيت بنفس الشهر اللي المفروض يولد فيه ولاده مبكره وكانت خطره على امي بعد
صار سهل انهم يألفون هالسالفه ويقنعونك فيها
وتعامل ابوي معك ما يدل على هالشي ابداً
شخصية ابوي كذا حازم وكان هذي طريقته بتربيتك لانك ولد ويبيك نفسه
مسموح لك تغلط عنده بس كان مطلوب منه يبين لك ان اللي تسويه غلط
عشان ما تكرره عند غرب ويمسكونه عليك
وانت تعرف يابتّال ابوي من يكون وليش حريص
ومعاملته لي لاني بنت وتراه يقسى علي والله
مو بس يداريني لانه مطلوب منه يربيني بالطريقه اللي يشوفها صح
حتى لو ما لاحظت هالشي
لكن وربي ما يفرق بينا بشي حنا اولاده وقطعه منه كيف تعتقد انه يرضى لنا الاذيه
يحبنا وبطريقته هو وهالشي ما يعطينا الحق نظلمه ونقول ما يحبنا ومن هالكلام
سكتت لثانيه وهي تشوف ملامحه بهتت بالكامل من عمق الصدمه والحقيقه اللي تبينت له وهو يجهلها واسترسلت بذات نبرتها ؛ ليتك ما اخفيته بداخلك ليتك تكلمت وعرفت كل شي زي ما عرفته انا من ابوي بنفسه
وحقيقة زواجه من امي وليش
ما عرف بتّال وش يرد او وش يقول لها كان صامت امامها
وكأنه يحاول يستوعب كل شي نثرته عليه ووضحته
وشي واحد بعد فتره اصابه الفضُول ناحيته وحرره لما تسائل فيه ؛ كيف فهمتيني وكيف عرفتي القصه وليش؟
ابتسمت بهدُوء ؛ لاني فضوليه واحب اسأل ماني مثلك اخفي بداخلي واسكت
اي شي يثير فضولي اسأل ابوي عنه
وعمّي وقطعته لنا كان هو سبيلي للمعرفه
ما ارتحت لين ابوي قالي كامل القصه وعلمني باللي بينهم
ونصف اللي عرفته انت انا عرفته بحذافيره
وعرفت سر ارتباط اميّ وابوي
وكيف كانت مسميه لعمّي لكن بوقت حاجتها ما كان موجود
وماكان قدامها الا انها تقول لابوي حكايتها وكيف بظلمة الليل غدر فيها وحش قذر
وسلبها برائتها وكبّرها قبل اوانها
تزوجت ابوي ولو ماهو الرجل اللي بنت معه احلامها
لكن انكتب بقدرها على شكل بطل وستر عليها من اعماق قلبه ولا نظر لها بنظره دونيه ابداً
كان عازها وحاشمها ومقدرها ومقدر ان مالها ذنب
ولما عرف عمي بزواج ابوي من اميّ
انقهر وحقد على ابوي
وقالي ابوي انه ما كان متأكد ان عمّي يبيها زي م هي تبيه
كان دايم يهاوشها ويزعلها وحسب انه يكرها
بس بليله وقت ما كان فيه ضيوف عندنا
وكنا صغار وقتها عمي رمى على ابوي كلام بمجلسه
ابوي م رضى يتركه يمشي لين يعرف ليه يكرهه وهو اخوه الوحيد
وقتها لحقه لبرا و..
قاطعها بتّال من استذكر الموقف اللي مر عليه بصغره وقت امره ابوه بالانتباه لضيوفه
وقت طلع وتركه بينهم وهو بعمر صغير
بعد ماعطاه كامل ثقته ووضح له بأنه رجال رغم صغر سنه ويعتمد عليه واردف بتنهيده ؛ مستحيل انسى هاللحظه ما حييت
معقوله بـ ذيك الليله صار شي بينهم؟
هزّت راسها شفق بالايجـاب وجاوبـته ؛ كان عند ابوي خيارين لما عرف بلوم عمي له لانه سرق حبيبته على قولته وغدر فيه بغيابه
امّا يقول الحقيقه لعمي ويشوه اميّ الله يرحمها بنظره
او انه يتقبل كره عمّي له ويتحمل الذنب لوحده
وما يحتاج اعلمك بخيار ابوي
ابتسم بتّال بضيـق ؛ عارف لان فراقهم من بعد ذيك الليله هو الاجابه
واهمال عمي لك وقسوته عليك اكبر دليل على ان ابوي تحمل الذنب بنفسه
سحب نفس عميق لصدره وزفره ببطء وهو يستكمل بحيره ؛ بس محتار في كرهه لك بينما لارين فازت بكل عطف منه
مو كلكم بنات شخص يشوفه مذنب بحقه؟
هزّت اكتافها شفق بعدم معرفه ؛ ماهي بعيده ينتظرها تكبر عشان يقلب عليها
واضح حرته من ابوي الله يرحمه مابردت للحين
لكن الله لطيف ورحيم يوم سلمّك لنا
وما عاد يقدر على انه يستفرد فينا ويصير وصي علينا
ابتسم بتال بضيق واحتضنها لصدره وهو يحمد ربه بداخله اللي نجّاه من قلب الموت لأجل يبقى ستر ودرع لخواته ولا يستقوي عليهم احد بدون وجه حق
.
.
بعد ما بدّلت لبسها ولبست بيجامتها وسيطرت على مشاعرها اللي تبعثرت بعد شوفته
وكانت بصدد انها ترفع جوالها ونيتها تتصّل على شفق وتسرد لها كل تفاصيل الشوفه
لولا اللي دخلت عليها وضحكتها تسبق خطواتها
تقدمت لحد سريرها وهي ترمي نفسها بكاملها عليه
وتردف تحت نظرات غاده المستغربه من حالتها اللي دخلت عليها فيها ؛ عجزت اتخطّى فلم شهدت على حلاوته ورومنسيته بنفسي
تكفين والله يجنن يجنن لو يبيعونه بمليارات الدولارات اشتريته
شي شي عذّب لي قلبي
ابتسمت غاده بأسى وهي ترّد عليها ؛ وهذا انتي كل يوم جايبه لك شي جديد يلعب بمشاعرك
مره مسلسل مره اغنيه مره مشهور مره أنمِي واخرتها فلم
متى بتكبرين على هالحركات متى؟
غمزت لها غيد وهي تقوم وتجلس بإستعدال وبكل ثقه عبّرت ؛ بس هالمره غير صدقيني غير
هالفلم من النوع اللي تحبينه انتي بعد
عشان كذا انا جايه بكبري اخليك تشاركين متعة حضوره معي
هزّت راسها غاده بإعتراض وهي تنطق بعدم مبالاه؛ ماعندي وقت ياغيد عندي اشياء اهم واللي يعافيك
ابتسمت غيد وما ردت عليها حتى اكتفت بأنها تخلي ردها لها عن طريق فعلتها
وقت فتحت جوالها وحطّت لها على الفلم اللي كانت تقصده
فتحته عندها وماكانت غاده معطيتها انتباها
لولا الحوار اللي سمعته وما كان غريب عليها
فوق ما النبره حافظه صاحبها زين
شدّ انتباها واجبرها انها تلّف عليها وتعرف ان هالفلم ما يكون الا عنهَا هي
اخذت الجوال منها وهي تشوف كامل المقطع اللي مصورته لها بدون لا تقطع اي شي فيه
من لحظة مادخل عليها عزّام ولاحظ ارتباكاتها
ولحظة خروجها من غرفتها ونزولها وهو ماسك يدهَا
وكيف انها انتظرته ودخل ومن بعده رجع لها ودخلّها
وكيف قدرت انها تصورهم وقت استغّلت شباك المجلس
وحطت الجوال عليه واتخذت الزاويه المناسبه واللي اظهرتهم كلهم واضحين لها
وكيف شهدت على اللحظات اللي كان عزّام غافل عنهَا
واهتمام غاده فيه وكيف رده على سؤال واللي بين لهم ضياعه امام عيونها
وكيف ما استقوت تبقى عنده اكثر وهربت
كل لحظات غاده وكل اللي صار معها بالشوفه
تحررت على يدين غيد على شكل فلم مُبهر
وكيف انها ضايفه عليهم موسيقه هاديه الا ان يتضمنّها شعور بالرومنسيّه الطاغيه
لحد ما عادت لقطه وحده ما كانت منتبهه لها غاده وقت كانت امامه
جُملته وقت عبّر عن انبهاره فيها " بسم الله ارقيك من عيني وعين كل من نظر فيك "
واللي اردف فيها بدون شعور وحصّنها فيها من عينه قبل عيون غيره
وكيف انه هزّ ايسرها ورجع يبعثرها ويحتل اركان قلبها ويفوز بأنه يخلق على ثغرها العذب ابتسامه ساحره بغيابه
اجبرت غيد على الشعور برقتها ولطفها على القلب وقت اظهرتها على تنهيدات متواصله واردفت بأمنيتها ؛ يارب حُب كالحب والا عمري ما انحبيت
استفاقت غاده من العالم الرقيق اللي تحاوطت به بسببه واردفت لغيد بنبره كان صعب عليها حيل انها توزنها ؛ ابيه ارسليه لي ممكن؟
سحبت الجوال منها غيد واردف بضحكة اعتراض ؛ لا حبيبتي مو ممكن توك تستهزئين فيني
سكتت لوهله وهي تتأمل ملامح غاده اللي انزعجت بالكامل واستكملت ؛ كم تدفعين واعطيك؟
والا اقول مابي فلوس عندي بحث بماده غثيثه ما احبها
شرايك تسوينه لي مقابله؟
حتى مع هالعرض فيه مميزات ينحذف من عندي ويبقى عندك واضمن لك ان محد يشوف لحظاتك ذي
ويشهد عليها
كانت بترفض غاده لولا المميزات اللي قالتها واللي لحسن حظ غيد انها قدرت تفكر فيها
والا ش تبي غاده اكثر من هذا الشي ؛ تم تم يلا ارسليه واحذفيه قدامي من عندك
ومن كل برامج التحرير اللي سويتيه فيهم
فزت غيد بسعاده وهي تردف بنبره مرحه ؛ تبشرين على خشمي
وعشان تضمنين مايروح لحد افتحي الاير دروب
فتحته غاده وارسلته لها غيد واستكملت ؛ استقبليه يلا
ضغطت غاده على قبول وصار عندها الفلم
وبدت غيد تحذف كل شي قدامها وهي مبتسمه
اردفت غيد بهمس ؛ كذا حلوين صح ؟
هزّت راسها غاده بالايجاب واردفت ؛ وش الماده وبحثك عن وش ومتى تبينه؟
استعدلت غيد بجلستها وهي تشرح لها كل شي
وما طلعت من عند غاده لين اعطتها غاده ضمان ان بحثها بيكون فوق ماهي تتصور وبيعجبها حيل
.
.