نصف عاهرة بين مخالب طاغية الكاتبة منال منولة باللهجة الجزائرية

نقطة اصطدام

تتمة للأحداث السابقة

اسيل ( كانت تحكي مع ايراد حتى سمعت الصونات .. حطت لاب توب على جنب ووقفت تشوف واذا بيه ادم . تبسمت ) هاو ادم جا .. رح نجيبه ونجي

ايراد ( خذى نفس طويل من الاعماق .. وبصراحة مكانش ناوي يشرك ولا واحد من الذراري فالميسيون هاذي .. ولهذا قرر التالي ) مكلاه تخبريه .. رح نمشي كان انا و انتي ونجيب

اسيل ( استغربت بعض الشيء .. ضيقت عينيها ) علاه الخير

ايراد ( في هذاك الوقت كان يتمشى من اتجاه الحرس .. باغي يوصيهم على يعقوب والجماعة الى هنا وفي نفس الوقت يحكي ) تعبوا بزاف لول البارح خليهم يشمو شوي هوا

اسيل (هزت راسها موافقة على هدرة ايراد ) اوكي رح نحكي مع نجيب ونحددوا مكان نتلاقو فيه ومن تما نمشوا للمؤتمر الى قتلك عليه

ايراد ( فهمت اسيل .. وفهم الشيفرة نتعها في تلك الاثناء رفع حاجب ونزل الاخر ) تشاو

اسيل ( كوبات وحطت الفون على جنب .. ممبعد مدت يدها وصافحت ادم ) اهلا وسهلا .. جيت باه تشوف وسيم باين

ادم ( تلفت يمين وشمال.. كان الهدوء على غرار العادة ) وينه موالف نلقاه يلعب مع الكلاب برى

اسيل ( غلقت لاب توب نتعها وحملاته في بين يديها ) مسكين الدوا تعبه بزاف وعلى هاذي راه راقد

ادم ( فوت لسانه على شفافه ) واثير وين راهي

اسيل (تبسمت بخبث .. كانت عارفاته جاي على جالها ) لفوق .. المهم الدار دارك انا نخليك ضرك لانه خرجولي شوي شغالات

ادم ( حس انه كاين امر ما .. حط يديه في جيابه ) رايحة لمؤتمر .. ولا سمعت غلط

اسيل ( هزت راسها ) لالا سمعت صح .. بصراحة سيدرا وراسم كانوا يقولولي ارجعي تقراي وانا وافقت وهذا المؤتمر يخص الطلبة الى توقفوا في نص المسيرة نتاعهم من خلاله يمدو نصايح كيفاه يرجعوا للجامعة الخ

ادم ( بدى يحس انه الامر فيه ان .. معقول اسيل تحتاج تمشي لمؤتمر للطلبة باه تدي نصائح .. تبسم ب عفوية ) بالتوفيق مالا

اسيل ( رفعت يدها وربتت على كتف ادم .. ممبعد قالت بطريقة غريبة ) بالتوفيق ليك انت تاني .. تشاو

ادم ( كان فهم واش تقصد اسيل .. تنهد من الاعماق ) ني توفيق ني زوج على راي ايراد زوج كفوف وهي رجعت للطريق احم

في تلك الاثناء تمشى من اتجاه الدرج الى يدو للطابق الثاني .. طلع الدرجات بخطوات سريعة حتى وصل لفوق ... بحيث لاحظ انه الهدوء مخيم على المكان .. تقول ماهيش لهنا .. معقول تكون خلات الطفل وهربت ..دير اي حاجة المصيبة هاذيك .. تلفت يمين وشمال حتى لمح على باب احد الغرف احدى شخصيات ديزني عرف انه نجيب واسيل عملو غرفة لوسيم ..