نصف عاهرة بين مخالب طاغية الكاتبة منال منولة باللهجة الجزائرية

شمس اضائت عتمة ليلي

مساء الخير ... حلقات اليوم 

خلولي ارائكم وتوقعاتكم لتحت وما تنساوش تصوتوا لللحلقات 

النجمةةة يا جماعة ***********

تتمة للأحداث السابقة

سيدرا ( لما شافت ايراد ساكت ظنت انه حاجة صراتلهم بحيث تقدمت كثر منه وحطت يديها على صدره وهزاته ) ايراد راني نحكي معاك .. وين راهم اسيل ونجيب !

ايراد (حكملها يديها للزوج وطبع عليهم بوسة دافية ممبعد رجع يشوف مع المجرات الى في عينيها والى سلبوا ليه الروح والعقل وخلاوه اسيرهم ) راهم بخير !

سيدرا ( سرطت ريقها وبعدت عليه شوي وصارت تشوف للباب ممبعد رجعت تشوف معاه ) مالا وين راهم .. على اساس مشيتو مع بعض ؟

ايراد ( صار يحل فالجيلي الى كان لابسه .. وقت نحاه حمله في يده وطلع فالدرج وفي نفس الوقت يحكي معاها ويحاول يهبل فيها ) وين علابالي انا .. بلاك حبوا يجيبوا بيبي وخداخر علابيها مشاو لوحدهم

سيدرا ( زيرت على سنانها من برودة اعصابه وكأنه وقت التمسخير ببحيث طلعت وراها وصارت تحكي بنبرة صوت مرتفعة ) ايراد راني نحكي من قلبي وانت تتمسخر بيا

ايراد ( وقت وصل للشومبرا رمى الجيلي على جنب ودخل تما وتفاجئ ب صغاره لهذاك الوقت سهرانين .. بحيث قعد فوق السرير وتما قابلاته سيدرا وهي تشعل غير لوحدها ليقرر يخبرها وش صرى وعلاه ما جاوش ) الى كانت تعاون في تاليا تضربت بالرصاص وكانت la situation نتعها قراف .. ومع انه اسيل دخلت وخرجت الرصاصة بصح مكانوش واثقين اذا غادي تسلك ولالا

سيدرا ( جارت بوف صغير .. وحطاته امام ايراد وقعدت وصارت تنصت ب اهتمام ) وممبعد

ايراد ( حط يده على رقبته وصار يمسد فيها ممبعد خذى نفس طويل وتكا على المخدة ) ولانه لو داوها لكلينيك نرمال غادي يبداو ب س وجيم مالا نجيب اقترح عليهم يدوها لوحد البلاصة حتى ترفد روحها شوي .. صاي ريحتي ضرك

سيدرا (حطت يدها على صدرها .. فهي كانت خايفة عليهم بزاف ) ريحت ايه وضرك نوض بدل خليني نشوف الجرح الى في فخضك والى في ذراعك !

ايراد ( كان كله دم وريحة بارود ولهذا ما حبش يتلمس اي واحد من الصغار لانهم انقياء وهو ما حبش يدنسهم واكتفى بطبع فقط بوسات خفيفة .. ليقول بينما كان رايح يوقف ) نكمل ونجي نهريكم بوس

سيدرا ( وقفت من بلاصتها وتمشات للدوش .. حلت الخزانة وجبدت الفاليز تاع الاسعافات الاولية ورجعت للشومبرا مرة اخرى .. ) ما حبوش يرقدوا .. ايساف بقى هاك حال عينيه ويبحلق فيا تقول حسو بلي ما راكش لهنا

ايراد ( ضحك على تعليق سيدرا .. ممبعد حكم المقص وصار يقص فالسروال نتاعه حتى نحاه .. وكمل للتيشرت وبقى بالبوكسر برك واقف ) اكيد حسوا بيا .. ماشي باباهم انا ولا صتهم فالطومبولا