نصف عاهرة بين مخالب طاغية الكاتبة منال منولة باللهجة الجزائرية

العيد فرحة وانتي اجمل فرحة حصلت عليها

تتمة للأحداث السابقة

.. فاتت يومين كاملين مازلنا في الجزائر .. وين اشتدت الحرارة اكثر والناس الكل صارت تمشي للبحر لحتى تستمتع وتريح شوي .. وبين هذاك وجا اليوم الموعود .. حنة وعد .. هو صحيح انه فرات حب كلشي يفوت بلخف حتى ممبعد يتلهاو ب امور تسجيل وعد في الجامعة وكلشي ولكن ماحبش يحرمهم من هاذيك العادة تاعهم ..

بالاخص انه هاذوما اخر ايام لوعد لهنا في بيت اهلها .. وبعد ايام قليلة رح طير للعش نتعها .. ولازم تخرج بالطبع والشان .. فالصالون الجانبي الى موالف يعملوا فيه السهرات .. وين تفرش وتحضر للحنة تاع العروس هاذي .. بهذاك الديكور الابيض والذهبي الله الله ..والبالونات مكتوبين عليهم اول حروف من اسمها هي وفرات

وهي متوسطة البلاصة قاعدة فوق الكرسي هذاك ولابسة الشدة بيها ب الاكسسوارات نتعها .. وراسها مغطي بخيمار طويل ومرسوم علي وجها الحشمة والسر .. وعلى جبهتها مراة صغيرة بينما سيدرا و ووسام واقفين على جنب وحاملين الشموع

اما امامها كان في صينية فيها بلا تاع تمر محشي وكيسان حليب .. وعلى جيه التبق نتعها سلة فالابيض فيها كيسان حليب .. وبواط حنة وشموع وطاسة صغيرة مزينة بالدونتال .. في ذلك الوقت البنات صاروا يغنولها في وقت مكانت زينب الى كانت متالقة بالكاركوا فاللون البوردو والمحرمة على راسها وذيك التبسيمة على وجها و حاطة الطبسي امامها و ترون فالحنة نتعها .. لحتى تحنيلها

بقات تحني .. والبنات يغنولها ورافدين الشمع
يا لحمامة طيري علي وصلي لبلادي واهلي طيري الله يخليك
في سماء علي بجناحك خفي راح الحال فاتتك طاح الليل عليك
الحنة والله زاناتك والخلخال فضة واتاتك خفي بالجنحيك
وصلي لبلادي يلا وبويا الغالي وباتي ثما وبلغي السلام
سلامي امانة ليهم واهلي كل لا تنسيهم وحبابي الكرام
يا لميمة قلبي تمنى نقربلك يا ريح الجنة يا سعد لي رضيك
يا لحمامة ديري طلة وسالي على ناسي كلة
وقوليلو لعريس استنى متفوتش عليا الحنة ربي يباركلي

زينب ( دارتلها الحنة وحطتلها حبة لويز في يدها وغلقاتهالها مليح ممبعد رفدت الكاس تاع الحليب وشربتها ) ان شاء الله ربي يحفظك من العين وربي يبقى عليكم الستر

وعد ( طلعت صباعها ومسحت دمعة كانت رح طيح من عينها ) امين ميمة وربي يخليك ليا

زينب (تلفت ل ميسم ومدتلها الكاس تاع الحليب .. ) هاكي بنتي اشربي ومدي للبنات حتى هوما يشربوا ويلحقوا وعد وسيدرا ووسام

ميسم ( بالرغم من انه هي جريئة ولكن كانت حشامة بالاخص ان هاجر ماهبطتش عينها من عليها .. تبسمت وحكمت عليها الكاس ) تعيشي

وئام ( قربت من ميسم وهمستلها ) راني نشوف فيك رح تتزوجي هنا

ميسم ( مدت الكاس لوئام وعقدت حواجبها ) وليتي محللة خلاص .. ابنتي لهاي في روحك وفي ولدك ماشي خير