نصف عاهرة بين مخالب طاغية الكاتبة منال منولة باللهجة الجزائرية

اعطني يدك صغيرتي

تتمة للاحداث السابقة

كان غاضب منها .... لاغاضب من روحو لانو طول لحتى يعرف مخاليج قلبو .. استغرق وقت طويل وهو يحاول انو يقنع روحو غير هذا الشئ .. اول شئ عملو انو كان يتجاهلها بطريقة تعبتها بزاف وعذبتها ..

زعما مكانش يشوف الدموع في عينيها ومشاعر الى باقية تخنق فيها .. لا كان يشوف عادي ولكن مشى وخطب سلاف .. الى ماتعنيلو حتى حاجة فالدنيا كان قادر يقول للام تاعو لا خليني راني كبير ولكن كان جبان ولبس الخاتم لسلاف ورقص معاها قدام عينيه الصغيرة هاذي وقهرها قهر ماعندوش اول ولا اخر خلاها تبكي طول ليل وتلعن زهرها وعلاه ضرك راه زعفان عادي .. هو عمل حياتو وهي تاني تستاهل تعيش وتفرح

اما هي ضربات قلبها كانو يضربو بعنف تقول رح يخرج منها .. هو راه شارب ومغلغل وقادر يعمل اي حاجة فيها ضرك .. وصلو للكابانو كان على شط البحر ويبان قديم كان ريح والرمل يطياير فالسما على شكل زوبعات صغيرة .. تراجعت لور من قوة الى تحس فيه وبينما هو جبد المفتاح وبقى يحل فالباب ودار فتحلها يدو

سيدرا ( بقات تشوف فيه وقلبها يخبط ) علاش جينا لهنا

فرات ( حل الباب ودخلها ودخل وراها ) ادخلي سيدرا .. ادخلي بلا هدرة زايدة

سيدرا ( دخلت وبقات تشوف فيه كي غلق الباب وشعل الضو ) علاه جبتني لهنا

فرات ( هز كتافو وبقى يشوف معاها في عينيها الخضر )نحكو سيدرا .. ول خفتي مني .. صاي ضرك رجعت وحش

سيدرا ( سرطت ريقها وعملتلو براسها لالا ) لا ماشي هكا .. ماتقولش هدرة انا ماقلتهاش

فرات ( عمللها بيدو اقعدي فوق الفوتاي الى كان تما ) اقعدي مالا نحكو

سيدرا ( شافت يمين وشمال كانت الكابانو صغيرة فيها سرير ومكتبة صغيرة وبيرو دورت راسها زادت لقات كي شغل بانيو صغير ) شكون يسكن لهنا

فرات ( شعل سيجار وقابلها ) كي كنت نقرى كنت نجي نرفيزي لهنا

سيدرا ( دورت راسها تشوف معاه ) اول مرة نشوفك تتكيف فرات

فرات ( نسف الدخان الفوق ) شكون هو

سيدرا ( تبسمت وهي تشوف فيه يسال وملهوف على هوية العريس نتعها ) يهمك بزاف تعرف

فرات ( زير على يدو وغمض عينيه ) احكي سيدرا ماشي وقت لعب

سيدرا ( نطقت الكلمة بهدوء ) ايراد المالكي حفيد بشير المالكي

فرات ( ضحك بتمسخير ) الدراهم ياك .. الدراهم يديرو العجب ويبدلو الناس

سيدرا ( فهمت قصدو مليح رفعت صباعها ) شوف فرات انت تعرفني مليح .. نحب دراهم ايه بصح مانيش من ذاك النوع .. علاجالك خليت كلشي وانت وش عملت عطيتني بظهرك ورحت خطبت سلاف .. صح ولا ماشي صح .. وانا كامل هذا الشئ شفتو بعيني وسكتت فرات