نصف عاهرة بين مخالب طاغية الكاتبة منال منولة باللهجة الجزائرية

ولا زلت لا تفهمين حبي لك سيدتي

تتمة للاحداث السابقة

حط البيكي على جيه وصار يمشي ويعرج ولكن كان مستقوى على روحه ..تعثر وتخلل التوازن تاعه ومزية لقى الفوتاي امامه .. خذى نفس طويل وعاد رفع روحه .. بقا هكاك حتى وصلل للالة الرياضية وطلع عليها وصار يشغل فيها وكامل هذاك الشئ صرى امامها .. وتصدمت وعمرها لا توقعت هذاك الشئ .. المشهد هذاك خلاها تنوض من بلاصتها وتهمس

_ ايراد

بعدما كانت قاعدة وحاطة رجل على رجل تستنى في الفرضية نتعها تتحقق وتنوض دير العرس ... خرجلها امر اخر عمرها لا توقعاته ومع شكون مع ايراد المالكي ..

سيدرا ما صدقتش وش راهي تشوف .. مع انه هي ذكية وتفهمها وهي طايرة ولكن كي شافت حالة ايراد حست بلي عقلها تبلوكا .. وقفت من بلاصتها وصارت تتقدم منه بخطوات بطيئة وتحاول تحقق منه .. يمكن ماشي هو .. لالالا مستحيل هذا ايراد .. يمكن كاين غلط ولا الاولاد استقبلوا ضيف اخر لهنا ولا هذا ماشي مزرعة المالكي من الاصل

رمشت بشفارها وفات عليها فلاش باك صغيرة او لقطة وهي فالخطبة وقت ناض ايراد كان يتعكز على البيكي .. سرطت ريقها وتما عرفت بلي كاين مشكل صرى مع راجلها ..بصح كيفاه ما سالتش .. كيفاه وش الغباء هذا .. ولا عماها الغل والغيرة .. كانت لحظات حتى وصلت ليه وحطت يديها على كتافه العراض

ايراد ( وقت حس بيديها الحنان تبسم على جيه ... عرف ان الخطة تاعه نجحت . ظغط على الزر وقف الالة وتلفت ليها ) اوووو شوفو شكون الى زارني ليوم .. مرتي وولدي الصغير

سيدرا (حطت يديها على خدود ايراد وصارت كيف الطفلة الصغيرة نيفها حمار وانفاسها تسارعت ) وش صرالك ايراد .. اه وش صرالك انت .. انت علاه راك تتمشى هكا و وصباح .. انا انا

كانت تحكي بكلمات متقطعة تقول هذا وين نطقت .. ولكن من صدمتها . الامر مكانش بيدها .. بعدت شوي عليه وصارت تمسح فيه من كل مكان .. تحوس على العطل وين راه بينما هو واقف بين يديها .. توقعها تتصدم بصح ماشي للدرجة هاذي ..

كانت تحوس على جروح او اي كسر .. يعني السبب لحالته هاذي .. لحظات حست بنار شعلت فيها وكانت وصلت للتوب حطت يديها على التيشرت تاع ايراد وقطعاته على زوج . تما كشفت على صدره العريض المعمر اوشام .. رمات القماش على جيه وتلفت عليه حتى لقات الباصما على الجرح في ظهره .. سرطت ريقها ومسحت عليها ممبعد رجعت تشوف معاه ودموعها يطيحو

_ انت تضربت بالرصاص ايراد

ايراد ( حكملها يديها للزوج وطبع عليهم بوسة حنينة .. على اللبؤة تاعه الحنينة والحساسة ) وقت مشينا لروسيا تقابضت مع حرس جازية وتما غدروني برصاصة ودخلت في ظهري اما اسيل قدرت تخرجها وتسلك الحالة

سيدرا ( صاروا دموعها يطيحو على يدين ايراد وانفاسها تبطاؤو بقات تشوف معاه ممبعد رمات روحها في حضنه وصارت تحكي ) وش راك تحس .. اه وش راك تحس