نصف عاهرة بين مخالب طاغية الكاتبة منال منولة باللهجة الجزائرية

في معركتي بين عقلي وقلبي اخترتك انت حبيبي

تتمة للاحداث السابقة ..

صوت جهاز الاشارات الحيوية سكن فجاة .. الكل بداو يشوفو في بعضهم لبعض .. اخر حاجة توقعوها هي هاذي .. ولا سيدرا الى وقفت تما تتفرج برك ماعرفتش وش تدير .. ولا وش تخمم تلفت ليه الى كان راقد قدامها تما وبقات تشوف معاه في وجهو .. قلبها بدى يخبط تقول رح يخرج من بلاصتو ويروح عندو .. في لحظة نسات كامل وش تعملت واش قرات لانو الى قدامها ماشي مريض عادي .. الى قدامها هو راجلها الى تحبو والحب تاعهم محرم لانو الكبرياء والكرامة اهم من كلشي .. كانت صغيرة على قد ماادعت النضج .. كان قلبها محروق على قد مامثلت لامبالات والبرود معاه

اسيل ( وقت لقاتها سارحة قربت منها وهزتها ) رح تبقاي هكا ديري كاش حاجة ماكيش تشوفي النبض مكانش قاع

سيدرا ( حكمت جهاز صدمات القلب ونسفت ) اشحني ..

اسيل ( كانت تشحن وتشوف معاها ) النبض مزال هو هو

سيدرا ( رجعت حطت الجهاز على صدر ايراد ورجعت تصدم فيه ) هيا ايراد هيا ..

اسيل (رجعت تشحن من جديد ) خسر دم بزاف

سيدرا ( تلفت ليها وعينيها رح يخرجو من بلاصتهم كانت محتاجة دعم ولاول مرة في حياتها تحس روحها ضايعة ) معليش تعاونيني بسكاتك .. راني نحاول نسلك مريض ونتي تقوليلي بلي خسر دم بزاف .. علابالي خسر دم بزاف وعندو كسر فالكتف وفي صباعتيه تاع يديه وقادر يصرالو شلل صاي والالتهاب تاع الجرح وصل حتى للرقبة وقادر يتوشي الفقرات المسؤولة على المشى

اسيل ( شافت الطاقم الطبي يشوف معاهم . هبطت عينيها وكملت تشحن ) رح يكون بخير ماهوش من النوع الى يستسلم

سيدرا ( هبطت شفاها عند وذن ايراد وصارت تهمس ) علابالي بيك قط ب 7 رواح ايراد المالكي .. هيا عاوني شوي مرة في حياتك

اسيل ( عاودت حطت السائل على جهاز الصدمات وشحنت ) مرة اخرى

سيدرا ( طلعت راسها وحطت الجهاز على صدرو العريض الى معمر وشامات ول في مرة باتت حاطة راسها عليه ووتفكر مليح انو عجبها الحال بزاف ) هيا ايراد المالكي .. هيا

الممرضة (تبسمت ) رجع النبض عادي

سيدرا ( خذات نفس طويل وحطت الجهاز على جيه ) رح نكملو الاوبيراسيون بصح لازمني دم .. شوفو يعقوب ولا وسام

اسيل ( جات خارجة ) انا رح نقولهم

سيدرا ( حكمتها من يدها وشافت في عينيها الخضر ) ابقاي معايا .. على الاقل المرة هاذي .. كاش مانحتاج ولا وخلي الطفلة تروح تقلهم

اسيل ( عملتلها براسها ايه وتراجعت شوي لور ) راني لهنا معاك

سيدرا ( رجعت حكمت المشطر لحتى تكمل الخدمة نتعها .. ولى كانت فالاساس انها تسلك راجلها ) مدولي كومبراس ووجدو رواحكم لنخيطو الجرح