نصف عاهرة بين مخالب طاغية الكاتبة منال منولة باللهجة الجزائرية

وحصل ما لم يكن في الحسبان

تتمة للأحداث السابقة

سيدرا بعدما قالت هاذيك الكلمات .. تلفت وراها وجبدت اللاب توب نتعها وحلاته .. خذات نفس طويل وصارت تكتب في الاسم على مكان "الكلمة المشفرة " .. هاذيك الثواني كانت اصعب لحظات فاتت عليه ولكن انتهى الامر بخيبة امل كبيرة

سيدرا (نسفت ومسحت على شعرها ) كنت حاسبة انه ساشا هاذي عزيزة على قلب جازية لدرجة انها تحط اسمها كلمة مشفرة بصح خرجت غالطة

ايراد (تقدم من سيدرا وقعد بحذاها .. هو الاخر فكر هكا ولكن كاين بزاف احتماالات وممكن تكون فرضية سيدرا صحيحة ولكن ماعرفتش برك طبقها .. فوت لسانه على شفافه وقرر يشارك هو الاخر ) ساشا هي وحدة من الناس المهمة الى في حياة الكسندرا وماشي هاذي برك اليوم الى تحرق فيه قصرهم ومات والديها والنهار الى داوها لهذاك نادي التعري و نهار الى جابوها لهنا لاسبانيا وهي هربت كامل هذا التواريخ يعنوا لجازية في حياتها

سيدرا (كملت تتفكر هي الاخرى من خلال الصناديق الى فتحوهم ) ونهار الى مات فيه والديك كان اول انجاز ليها ونهار الى دخلت فيه للقصر كزوجة للبشير ايضا يعد منهم .. راك تخمم في واش راني نخمم

ايراد ( فرك يديه ببعض وحاول يركز هو الاخر .. وتما بانتله حاجة هو عمره لا فكر فيها ولا خمم فيها .. طلع حاجبه ) ونتي سيدرا لو كنت محل الكسندرا واش هي الامور الى تعنيلك بزاف .. الايام الى توجعتي فيها ولا الى فرحتي فيها

سيدرا (دوحت براسها يمين وشمال وشافت فيه ) لا هاذي ولا هاذي

ايراد ( ضيق عينيه مستغرب من اجابتها هاذيك .. وقرر يعرف كثر ) مالا

سيدرا ( حطت البيسي على جيه ووقفت من بلاصتها وقابلت ايراد ) بصراحة اكثر حاجة تعنيلي هوما الناس الى وقفوا معايااا فالكوارث هاذي .. لانه وقت نفرح رح الكل يحاوطني من كل جيهة ولكن وقت نطيح الا الاصدقاء الحقيقين هوما الى يوقفوا معاايا ويساندوني ويمسحولي دموعي وهوما الى رح يصيروا كل حاجة في حياتي

ايراد ( حكم الصندوق الخاص بذكريات جازية وصار يقلب فيه يمين شمال يمكن يلقى شي درج على جيه او مكان سري وفي نفس الوقت مزاله يسال في سيدرا ) انتي ووعد قراب بزاف من بعضكم واش الحاجة الى ميزة صحبتكم

سيدرا ( في ذلك الوقت تبسمت ) كون نقولك رح تجهل من راسك ..

ايراد ( ضحك ودوح براسه يمين وشمال وكمل يحوس فالصندوق هذاك ) صدقيني شت في حياتي امور عجب لدرجة اني ماعدتش مستغرب من اي حاجة كانت

سيدرا ( تلفت من اتجاه البيرو .. تمشات بضع خطوات وحلت الدرج وجبدت وحد العلبة تما .. كانت عبارة على علبة موسيقى وحلتها وجبدت سنسلة على شكل قلب ورفدتها امام ايراد ) لانه تربينا مع بعض وكبرنا مع بعض .. كنا كيف الاخوات ولكن كان باقي حاجة مفرقتنا وهي الدم .. مالا وحد نهار قررنا نولو اخوات بالدم ..