نصف عاهرة بين مخالب طاغية الكاتبة منال منولة باللهجة الجزائرية

عاد القدر للعبث مرة اخرى

تتمة للاحداث السابقة

سيدرا ( حطت يديها في جنابها ) وين راهي ضرك .. وين راهي اسيل .. فالحبس ولا وين .. ولا رجعت للمنظمة تاع "الثالوث الاحمر " احكي وين راهي

محمود ( تلفت لزينب وبقى يشوف معاها مش عارف وش يحكي ) انا

سيدرا ( سرطت ريقها وقربت لزينب تسال فيها وتعاود ) وين راهي اسيل قولي علابالك انتي صح .. علابالك وراكي ساكتة

زينب ( حطت يديها على خدود سيدرا وصارت تشوف مع عينيها الخضر ) هي قتلت شخص دبلوماسي وعلى هاذي داوها لسجن فدرالي وحبسوها تما ولحد الان احنا ماسمعنا عليها حتى حاجة

سيدرا ( رمشت بشفارها وتلفت لمحمود الى كان يطالعها بنظرات مليئة حب وشعور بالذنب) يعني الشئ الى شفتو من سنين والمراة الى ضربت ذاك الراجل بالرصاص مكانش كوشمار برك كانت صح قولي .. يعني الى شفتو كانت امي اسيل مع الراجل الى سرق منها حياتها وبالنسبة لبابا وين راه هولاخر يعني مش معقول ماتكونش خبراتو بحملها بيا

محمود ( بقى يشوف مع سيدرا وكمية المرارة الى في عينيها ) الناس هاذوك قضاو على كلشي .. الناس هاذوك ماهمش ساهلين وانا عملت الصح لحتى نحافظ عليك منهم ونخبيك على عينيهم حتى وان اظطريت نحبسك في une cave رح نعملها

سيدرا ( ضحكت حست انو غير ضرك شوي سمعت شئ نكتة ) تحافظ عليا .. ههههههه اسمعوا ياناس قال يحافظ عليا

زينب ( كانت تحس انو سيدرا فهمت كلشي غلط صح هو كان قاسي اما الى صرى معاهم مكانش ساهل ) سيدرا بنتي عملنا الى في صالحك برك صدقيني بالنسبة لاسيل ولا حتى الاب تاعك نجيب للزوج كانو يتمناو عايلة ودار والدنيا هانية تحسبي كرهو هذا الشئ

سيدرا ( شافت فيهم للزوج وماحست غير انها انفجرت بكل المرارة الى حملاتو سنين ) امي الى هي بنتك صرالها مشكل وقت مشات لاسبانيا حملت وجروها لمنظمة وصارت قاتلة وجاسوسة .. وانت لسنين وانت تقلب في زعافك فيا انا .. الى ماعندي حتى ذنب كان اه .. سيدرا ماتخرجيش .. سيدرا ممنوع تعملي صحابات .. سيدرا حطي ذاك الكتاب حرام تقرايه ..سيدرا. سيدرا .سيدرا موتي موتي

محمود ( رفد راسو وصار يتنفس ب صعوبة ) وش عملتك انا .. وش كنتي حابتني ندير

سيدرا ( ملامحها تغيرت وترخفت ورجعت طفلة صغيرة في عمر 5 سنين ) سنين وانت تعاقب فيا على ذنب مكان عندي حتى دخل فيه .. سنين وانت تفضل اكرم ووعد عليا .. سنين وانت تعذب فيا وتشرب فيا فالدوا.. انت سقسيت في مرة كي نكبر كي رح نكون امممم .. خممت في نفسك وبس اانا الى كنت نموت كل دقيقة وقت يجي العيد ونشوف البنات الى في عمرى مع والديهم يخرجوا ويحوسوا

زينب ( كانت تذوب من هدرة سيدرا ) اهئ اهئ يابنتي

سيدرا ( كملت تحكي بمرارة كبيرة ) سنين وانا نتهان من الى طالع والهابط .. مكانش عندي ام نخبرها بالاسرار نتاعي لحتى تنصحني وتوجهني ولا كان عندي اب يدللني ويقلي لالة النسا كيف ما خالي ابراهيم يعمل مع وعد .. كنت انت والدهر عليا ذليتوني