نصف عاهرة بين مخالب طاغية الكاتبة منال منولة باللهجة الجزائرية

كذبة هي حياتي

تتمة للاحداث السابقة

وقت القارد سمعوا التعليمات حل الابواب تاع الطموبيل ونزلو .. وبقاو يشوفو يمين وشمال .. تمشاو انتشروا كيف الدود تماما .. اول حاجة عملوها قتلو القارد الى كانت عند الباب وطرطقو القفل نتاعو ودخلو

ايراد ( سمع الهفة جبد الكابوس وطلعو ) روحي خزني

سيدرا ( استغربت بزاف ) علاه وش كاين تاني

ايراد ( جا يحكي حتى الباب طرطق ودخل شخص كيف الحيط وبقى يتيرى عليهم ) عندنا ضياف روحي اهربي

الراجل بقى يتيرى مامخلي حتى حاجة كانت .. لافوتايات ولا طابلات ولا حتى اي حاجة اخرى كانت يعني النهاية لامحالة .. سيدرا تبعت اوامر ايراد ورمات روحها ورى الفوتاي ولصقت فيه وصار قلبها يخبط بكل قوة وكانو رح يخرج منها وهي تسمع فالرصاص يعزف وباين انو ماهوش لمهاجم ماهوش لوحدو وراه كاين جيش معاه

المهاجم تقدم للامام حامل الكابوس بيد وملامح من حديد وكمل يتيري ويحاول انو يصيب الهدف كيما امرهم المهندس بالكلمة والحرف الرصاصات كانت تخترق الجدران ومخلية ثقوب عميقة فيها فما بالك بلى كانو تما

ايراد قرر انو يهجم وينوض من مكانو ودمر الطابلة الى كانت فالوسط على المهاجم بكل قوة .. سببتلو خلل وخلاتو يطيح لور بينما المالكي رفد رجلو وضربو للوجه طيحلو الكابوس من يدو ورجع وبدون اي تاخير ضرب السلاح بعيد برجلو .. قرب ليه ووقف في ظهرو وحكملو يدو لور وبقى يحاول يلوى فيها

لكن المهندس المرة هاذي بعث خصم لايقهر بسهولة .كان قوى وصلب . قلب ايراد فالارض وطلع عليه وحاول انو يحكم الكابوس ليرجع ايراد مرة اخرىو يحطط رجليها على رقبة المهاجم نتاعوويلويهم وصار يزير عليه بكل قوة غندو ويحاول يخنق فيه ويطرطقلو رقبتو

سيدرا ( خرجت من المخبئ نتعها لقات انو ايراد مزال يتعافر معاه شافت فاز تاع زجاج فوق الطابلة رفدتها وقربت منو وخبطتهالو على راسو ) ااااااااااااا موت

الراجل ماتاثرش وكانو حديد .. بقى متعافر مع ايراد وموجهلو الكابوس للوجه ومزيرعليه .. كان كل واحد منهم عنيد .. وكل واحد مش حابب يطلق منو يدو ..وبينما هوما هكاك وصل الفريق الثاني للمهندس و تقدم واحد منهم وهجم على سيدرا وحط يدو على فمها وبقى يجر فيها

سيدرا ( تحاول تفك في روحها ) اطلقني .. اطلقني الله لاتربحكم اااااا

ايراد وقت شافها هكاك .. ويخبط الراجل الى كان متعافر معاه للوجه بكل قوة جابو لور طايح على ظهرو وقف وحكم الكابوس وزير باه يتريرى ولكن الرصاصات خانوه ليرجع الخصم نتاعو ينوض ويضربو للوجه يرجعو لور ويطيحو على الفوتاي

سيدرا ( كان الراجل يجر فيها برى وهي تعيط ) ايراد .. ايراد اااااااااااا

ايراد ( حاول يوقفف وصار يتبادل مع خصمو في لكمات مرة للوجه ومرة للكرش ) الكابوس الى في رجلك .. استخدميه