نصف عاهرة بين مخالب طاغية الكاتبة منال منولة باللهجة الجزائرية

انا قاتلة

تتمة للاحداث السابقة

محمود تمشى امامها وحل الباب تاع الطموبيل وهي جات ركبت .. بينما هو دار ملهيك وركب اقلع وطول الطريق قاعد يرتب في هدرة يحب يقولولها وقت وصلو للطريق الكبيرة .. انطلقت وراهم طموبيل سوداء وهوما يتمشاو راجعين للدار

محمود ( انتبه للطموبيل زاد فالسرعة وبقى يشوف وراه )

سيدرا ( تلفت ليه واستغربت انو يسرع على غير العادة ) وش كاين جدي

محمود ( حط السانتير ورجع يشوف معاها ) مكان والو حبيت برك نوصل للدار بكري برك

في الجهة لاخرى عرفو انو محمود تحلبهم ولهذا قررويزيدو فالسرعة و لهجوم خرجو السلاح من الزجاج وبداو وابل الرصاص عليهم ..وليس هذا برك الى كان العدو قرب كثر من سيدرا ومحمود وصارت الطموبيل تحاول تقلب بيهم الطموبيل بكل ماعندها من قوة خوف ورعب كبير

سيدرا ( شدت الفوق فالبواني ) وش كاين جدي وش يحبو منا هاذو

محمود ( صار يجبد فالتلفون ) هبطي راسك بنتي .. هبطي

سيدرا هبطت راسها بينما محمود صار يحاول يهرب منهم ومرة على مرة يشوف وراه ويحاول يجنب فالرصاص ولكن الطموبيل في حين غرة خرجت على الطريق وقت ضربت رصاصة فالعجلة طيرتها من مكانها وصارت تديرابي وخرجت من الطريق واوب ترفعت للسماء وتقلبت وصارت تتقلب حتى خبطت في شجرة .. بقى الدخان يخرج منها والعجلات طايرو يمين وشمال

اغمي على سيدرا ومحمود جراء ارتطام الرؤوس نتاعهم مع الحدديد تاع الطموبيل .. وغابو عن الوعي تماما وضرك راهم تحت رحمة الشخص المهااجم هذا الى خرجلهم من الماضي ..

بالنسبة للمهاجمين بعدما توفقوا في اول خطوة الا وهي اصطياد الضحايا نتاعهم توقفت الطموبيلات العدو على جانب الطريق ..تحلوا الابواب و نزلو رجال بالاسود وسركلو الطريق كلها بينها هو هبط الزجاج وبصوت رجولي

_ جيبوها

الرجال تمشاو للامام بينما فريق منهم قعد لور واقف يحرصو فالمنطقة مايحبوا حتى مشاكل وقت العملية هاذي .. رجوعا الى البقية الى واحد منهم كسر الزجاج تاع الطموبيل لمقلوبة ودخل يدو حل البواني تما كانت سيدرا مغمي عليها تماما راسها مجروح ويسيل منو الدم ووجها كامل مجرح .. حط يدو عليها وجبدها تما حلت نص عينها وشافت في محمود

_ جدي .. جدي قالت هذا الكلمات ورجعت غابت عن الوعي تماما .. وراحت في عالم اخر

الرجال حطوها في حملتهم وتمشاو بيها بينما هو حل الباب ونزل .. وعلامات الشيطان على وجهو فتح الباب رولاني تاع الطموبيل وحطوها على المقعد لوراني وطلع هو بحذاها وبق يتامل فيها وشعرها طايح على وجها .. العينين الخضراء وتضاريس الوجه كانت شبها هي ونسخة طبق الاصل عليها .. جميلة المنظمة "مارلين مونرو "