نصف عاهرة بين مخالب طاغية الكاتبة منال منولة باللهجة الجزائرية

كوشم انت محفور في طيات قلبي

تتمة للاحداث السابقة

وئام (كملت تحكي وتضرب بصباعها على الطابلة ) ندير اي حاجة على جال ميسم ويعقوب . وعلابالي انها زعفت مني وقت درت هكاك بصح كان هذاك هو الصح

سيدرا ( حملت الكاس وتمشات من اتجاها جبدت الكرسي ورجعت قعدت ) بصح نتي قاسية وئام .. شتك كي تعاملي ميسم

وئام ( تبسمت ودوحت براسها ) صح انا يمكن قاسية عليها .. لاني نعرفها لوكان رح نتساهل معاها رح ترجع للصحافة مرة اخرى .. ترجع تقلب تحت رجال الاعمال الفاسدين ورح يرجع يصرالها نفس الشئ ونرجع نلقى روحي وحدي

سيدرا ( خذات نفس طويل .. وبقات تشوف في فرضية وئام .. ) القسوة تساوي حب .. اهتمام .. خوف من فقدان الطرف الاخر صح

وئام ( ضحكت وعملتلها براسها هيه ) صح سيدرا ..

سيدرا ( رجعت جسمعا لور وبقات تتفكر ) جدي محمود كان قاسي معايا هكا .. وكنت ديما نقول انه يكرهني علابيها يعاملني هكا .. وانه يكره ماما كونها كسرت العادات تاعهم وطلقت بصح ضرك فهمت صوالح بزاف

وئام ( رجعت شعرها ورى وذنيها ) كل انسان فالدنيا هاذي .. عندو طريقة خاصة في التعبير على مشاعره .. وكاين الى مايعرفش كيفاه يخرجهم وكاين الى يخاف

سيدرا ( حطت شعرها على جيه ) بلاك

وسام ( كانت داخلة للكوزينة هي الاخرى لحتى تشوف حاجة تاكلها لقاتهم قاعدين .. عقدت حواجبها ) يا مساء التجمعات ..

سيدرا ( تلفت ليها بينما وئام اكتفت انها رفعت الكاس كي شغل تحية ) اهلا بالواطية .. الى راهي حارقة الايام هاذي ومناش نشوفو وجها الا مرة فالعام

وسام ( حلت الخزانة جبدت باكي سيريال وفرغت فالطبسي قدامها ) سيدرا ووئام قاعدين في بلاصة وحدة وطابلة وحدة باينة كاش مكوك رح يدخل فالارض وتصرى نهاية العالم

سيدرا ( ضحكت وشافت في وئام ) دنيا هاذي نتوقعو كلشي

وسام ( فرغت الحليب على السيريال وتمشات من الاتجاه نتاعهم جبدت كرسي وقعدت ) ها حكولي هيئة الامم المتحدة لواش توصلو

سيدرا ( طلع حاجب وهبطت لاخر تشوف في وسام ) هاذيك طرااسا تاع بيزو الى راهي في رقبتك ولا انا خصني نواظر

وسام ( عينيها الزرق توسعو وبقات تمس في رقبتها ) وين وين راهي خفي قوليلي

سيدرا ( ربعت يديها .. وبقات تشوف معاها .. كي تبدلت 360 درجة ) ماشي قتلك بلي الطفلة انحرفت ..

وسام ( شدت سيدرا من الكتف ) خبريني وين راهي خفي روحك

وئام ( جبدت الطبسي من قدام وسام وبقات تاكل ) مكانش منها راهي غير تلعبلك على المورال كي شغل ماتعرفيهاش