عاشقة الثراء💸مكتملة💸

💸الجزء 1💸

-ألمى-

الحياة .. كاتبغي دائما يكون الواحد على بال .. كين لي عرق و نشف حتى غير مستواه و كين لي قبطها باردة .. كين لي ورث من عند واليديه .. و كين لي خدم على راسو.. الانسان بطبيعتو كيموت على الفلوس .. طبعا .. شكون فينا لي مكيحلمش يعيش فقصر !! و يكون عندو الخدم و الحشم يلبيو طلباتو !؟ شكون فينا مكيحلمش يركب ..''جاگوار .. ولا المازاراتي " كاع كنحلمو و فالأخير كانصبرو روسنا بزوج كلمات ...'' هادوك لي عندهم هادشي اش قضى ليهم؟؟ واش غايديوه معاهم لقبر!! المهم هو راحة البال .!! نهار يمرض ماغاديش ينفعو هادشي ..!! الفلوس غييير وسخ الدنيا !! .. و زييد و زيد من الأقاويل لي غرسوهم فينا واليدينا .. لكن هي مكانش هذا هو رأيها .. هي .. عاشقة الثراء .. مكاتقبل بهاد الأمثال ديال جدودنا و واليدينا .. كيحكمها المنطق .. و كيحكمها عقلها و كذلك أحلامها لي مصرة أنها تحققها مهما كلفها .. مع ان فالحقيقة الرضى حاجة مزيانة حيت القناعة كنز لا يفنى .. و الطمااع ديما غادي شمال .. ولكن كيبقاو الفلوس هوما مفتاح السعادة حيت بيهم تقدر تحقق كاع احلامك لي غايخليوك تكون سعيد سطحيا .. أما داخليا حاجة أخرى ..
لي وقف قدام ألمى و قال لها بلي الفلوس وسخ الدنيا .. كاترد عليه ب .." البشر هو وسخ الدنيا .. أما الفلوس .. هوما السعاده .. هوما الحياة .. هوما كل شيء ... هوما الحياة..
كاتهمها حاجة وحدة .. هي دخل لعام المشاهير بأي طريقة .. تدخل لعالم الأثرياء و تعيش معاهم .. ي تربى فيها هاد الهوس بالثراء .. يمكن حيت معاشتش وسط عائلة مترابطة .. يمكن حيت كانت دائما وحيدة !! تربى فيها حب الثراء و العيشة المرفهة .. المهم أنها مكاتستسلمش و كيف بغات حياتها غاتعيشها لكن فالأخير غاتكتشف الحقائق لي وراء الثراء و الحياة لي كانت كاتحلم بيها ..!!
"عاشقة الثراء "
"البارت 1"

-ألمى-

كيف عادتها جالسة بكل خيلاء و غرور فأحسن مقاهي الدار البيضاء .. حاطة رجل على رجل و كاتاخد فنجان القهوة ترتشف منو بطريقة اريستوقراطية .. لي شافها يقول بنت العز و اكل الوز .. حجبانها ديما مطلعاهم فحال لا لي قدامها عمرهم يوصلوها مع ان الحزقة ضارباها للوذنين لكن دائما كيفما كاتقول .. بريستيجي أهم من اي شيء .. دائما كاتختار المقاهي لي كيجلسو فيهم الشخصيات المرمووقة و الناس لي عندهم الحبة .. و غالبا ما كيتزللو عليها ولاد رجال الاعمال و الناس لي لاباس عليهم .. بالحق هي طموحها اكبر من انها تبغي واحد ولد رجل اعمال .. مدلل ابوه و امو .. كاتبروفيتي فيهم و تاخد لي بغات و تسل بحال الشعره من العجين .. انها تتديهم لأغلى الماركات يشرو لها كل ما حلات عليه فمها خصها غير ترضى عليهم .. كاتاخد لي بغات بعدها تقول ليهم سوري .. ماتفاهمناش .. هادي هي الكلمه لي كاتخسر عليهم و مكيهمها حتى واحد .. حطات فنجانها كي شافت واحد مقابل معاها كيشووف فيها .. طلعات فيه و نزلات و دورات وجها .. تا هو مكانش من العاجزين .. هز قهوتو و مشا وقف عليها ..
-مادموزيل !! نقدر نجلس معاك ..
-''شافت فالطبالي لي فالكافي و رجعات طلعات و نزلات فيه بغرور .." هاد الكاافي كااامله مافيهاش لي طابل خاويين؟؟ بانت لك غا ديالي ..
-"جلس و ابتسم ليها" .. واش لي شاف هاد الجمال يدوز و يخليه الله يهديك !!
-اوكي .. ديجا غانوض .. استمتع بوقتك .."ضحكات لو بطريقه مستفزة .."
-قبط لها فيدها" لاه لاه لاه فين ماشية .. بغيتك فمضوع مهم ..جلسي انا ماشي كاندصر عليك انت باغيك فبلان اااخر
-طلعات حاجبها و شافت فيدو لي شدات فيدها " اولا حيد عليا يديك هذا لي غيشدني بهاد الطريقة مزال ماتزاد !! ثانيا شكون نتا باش تشركني معاك موااضيع!! كانعرفك؟
-حيد يديه و ابتسم ليها" انا كانعرفك !! .. شوفي غانجيك من اللخر .. بغيتك فخدمة مباش ميمشيش بالك بعيد .. انا مصور اعلانات .
-"غا سمعات مصور اعلانات و هي تجلس" .. اممم و شنو المطلوب مني ..!!
- عندنا واحد الاعلان خاصانا ليه مودل .. صراحة من شحال هادي و انا كانجي لهنا و كل نهار كانراقبك .. كيف كادوي كيف كاتجلسي كيف كاتمشاي .. هكذا محتاااجين وحدة برينسيسة تبين للناس المنتوج ديالنا .. ملكة على عرشها .. و بمنتوجنا تزييد رقي و جمال .. اش بان ليك !؟
- ياك نتا غير مصور !؟
-شنو هادي دابا استهانة بقدراتي و لا كيفاش؟!
-"حركات كتافها بعدم اهتمام" اوا نتا قلتي مصور .. "تكات على الكرسي .." سوو!! اش داك لهادشي عندو ماليه!!
-"كيحك لحيتو بعصبية مارضاش '' الماركه ديال صاحبي .. و هو كلفني بكولشي .. خصك تعرفي بلي انا ماشي غير مصور و صافي اتيتيز .. ..
- ''طلعات فيه حاجبها" .. مزيان .. اشنو المطلوب مني دابا!!
- المطلوب منك باين .."حطي يدو على الطابلة و كيشوف.فعينيها الواسعين مبااشرة" ... بغيناااك نتي .. هاد الاشهار فحال لا دار عليك نتي .. نفس الوصف لي عطاني لقيتو فيك.. طريقة الجلوس .. طريقة الاكل .. طريقه الهضرة .. الشوفه ..! يعني ماغانلقاش معاك مشكل .. و ماتهزيش هم للخلاص .. كانخلصو مزيان .. زائد الى عجبتي مول شي ماشي بعيد تولي نتي الوجه الاعلاني ديال ماركتو ..
- اممم ..
- اوا اش قلتي اتيتيز ..!!
-" هزات راسها و صاكها و وقفات'' خليني نفكر ..!!
-"مد ليها كارت فيزيت " .. الى فكرتي جاوبيني .. ماتعطليش عليا عندنا يومين ..
-"خذاتها بزوج صباع" تمام ..
دارت نضاراتها و تمشات قدامو بديك المشية ديالها لي كاتخليهم غا كيشوفو و فعلا بقى متبعها و كيحك لحيتو هز تيليفونو اتصل بياحبو يبشرو ..أما ألمى مباشرة خذات طاكسي من قدام الريسطو عطاتو العنوان ديال دارها...