عاشقة الثراء💸مكتملة💸

💸الجزء 10💸

" عاشقة الثراء "
"البارت 10"

-ألمى-
..جرات حتى عيات .. خرجات كاااع الطاقة السلبية لي كاخلها .. بانت ليها جريدة قدامها و مشات جلسات فيها .. كانت ديك الوقيتة الشميسة بداات تتسخن .. و هي كاتنهج و صدرها ماقدش يوقف من عنفو .. تفكرات احلامها من جديد .. الأحلام لي ولات تتراودها بكثرة .. .. يمكن اكثر من اي وقت قبل .. هادي يومين ماشافت النعاس .. و مقابلتها مع جلال و الصداع لي ناض مع عبد الجليل كمل عليها .. بقات جالسة كاتشوف فلي غادي و لي جاي تا حسات براسها عيات و مشات لكافي فطرات عاد عاودات نزلات للدار ... مع الدخلة تلقات ليها عايشة و هازة صندالة فيدها..
- عايشة .." عاكدة زيف على راسها" .. عليا باليمين و ماتزيدي قدامي ضروووك تقولي ليا اش كين و فين كاتمشي و تجي نتي و ديك المغصوبة لي مكسلة الفوق تا نخلطكم بزوووج ..
- المى .." حلات فيها فمها " بلا ضريب.. انا غانقول ليك كولشي ...ندخلو بعدا ..
- عايشة.."حيدات لبها من قدام الباب تا دخلات..سدات الباب و تبعاتها .." .. يالله سرسبي ..
- المى .." جلسات فالصالون و حطات رجل على رجل" .. جاتني خدمة ..
- عايشة .." فكات البشرة" .. ايوااا .. مزيااان و فاش هاد الخدمة!!؟
- المى .. التمثيل!! .. خذيت دور البطولة فواحد الفيلم ..
- عايشة .." حلت فيها فمها" .. هاا؟؟ كيفاش فيلم و تمثيل ..!!
- المى .. ماما بحال لا بديتي تتنساي واش بنتك قارية المسرح !!
- عايشة .. ايه ولكن مشي لهاد الدرجة .." دغيا تبدل فينا اللون .." .. ميمكنش نخليك تمثلي ..
- ألمى.." طلعات فيخا حاجبها" .. كيفاش ماغاتخلينيش!! من ايمتا هادشي ..
- عايشة .. لا ماغانخليكش .. خوالك يقتلوك الى عرفو .. سمعتي .. نساي .نسااي ..
- المى .." خرجات عينيها" .. لا ماغانساااش .. و عمرك تعاودي تقولي ليا نساااي .. هاذي هي املي الوحيد باش نخرج من هاد القهرة ..
- عايشة .. ضبري راسك .. نهار يجيو خوالك يتفاهمو معاك انا ماسوقيش ..
- المى .. قادة براسي اماما .. غير خليني مني ليهم .. و زيدون من ايمتااا و هوما كينهمهم ..مكيحملونيش اصلا غير زايدة على قلبهم و هادشي كانحس بيه دينا ملي كانشوف علاقتهم مع خولة .. خليني ساكتة و ماتقلبيش عليا المواجع عافاك...
- عائشة .. اوا اش غانقول ليك .. ديري لي بغيتي .. ولكن عنداااك تندوي.. ديك الطريق ديال التمثيل .. عوجة .. و لي سلكها خصو يكون ولد سيدي و مولاي ..
- المى .. ابتسمات ليها " .. تا انا بنت لالة و مولاتي .. لي رباتني و كبراتني تا ولاو كتافي قد هكذا .. ماتخافيش عليا .. بنتك راجلي غير مغطية بتوب الأنوثة ..
- عايشة .." باستها فحنكها".. الله يسهل عليك .. " تنهدات فاش ناضت من حدانا المى بقات تتشوف فيها مدة .." .. العالم الله لاين غانوصلوو ابنتي .. العالم الله ..

.. طلعات ديريكت لبيتها ماسولاتش على خولة حيت عرفاتها نزلات لافاك ..و مشات لدوش .. دوشات و خرجات مسحات لحمها و دهناتو بكريم عاد رشات الريحة المفضلة ديالها باش تبقى فيها الريحة .. نزات لاتروس لي فيها السبايغ تاع الضفار ديالها و مشات جلسات فوق الناموسية هزات صباغة حمرا و جلسات تتصبغ ضفار رجليها و قاداتهم مزيان عاد دازت ليديها و فودنيها لي كيت كاتصنط ل ديسباسيتو.. تا وصلها ميساج من مروان ..