عاشقة الثراء💸مكتملة💸

💸الجزء 46💸

عاشقة الثراء
"البارت 46"
ليالي نسيم
-أهرب منك إليك -
عاد جا وقت الصور لي تصورات فيهم مع كااع الي كانو معاها فالفيلم و كاع البوزات دارتهم مالقات غا ايمتا ..و جلال حاضيها مرة يبتسم ليها فاش تتشوف فيه مرة هاهو مجمع مع الناس لي كيجيو يسلمو عليه .كي كملات مشات لعندو ديريكت وقفات حداه و عنقها بيد وحدة ..
- جلال .. عيتي؟؟
- المى .." طلعات فيه راسها" .. عييت ولكن عاجبني الحال ...
-جلال ..ههه داكشي لي بغيت ..
-, المى ..عرفتي فرحانه بزاف .. اول مرة نكون وسط ممثلين كانو بالنسبة ليا الحلم .. واو .. هههه ..
- جلال .. دابا راك وليتي بحالك بحالهم .. و حسن كاع ..
- المى ..هههه ..
جاو عندهم زوج رجال سلمو عليهم ..
- سعيد بالتعرف عليك مادموزيل المى .. الفيلم تحفة .. تباىك الله عليك متمكنه ..
- المى .. شكرا بزاف هذا من ذوقك ..😊
-"مد يدو لجلال لي سلم عليه من الفوق للفوق .." .. صراحة كاع الافلام لي تيكونو من انتاج السيد جلال مكانترددش نتفرج فيهم .. لكن هادي اول مرة تكون البطلة مغربية ..
- جلال ..شكون نتا بعدا؟؟
- اه سمحو ليا ماعرفتكمش على راسي .. هههه انا أحمد مخرج ديال برنامح طريق الشهرة ..
- جلال .." ابتسم بالجنب" .. اه داك البرنامج عرفتو ..
-المخرج ...اه تماما .. هو الصراحة كنت جاي عشمان فيكم خير .. بغيت الانسة دوز فالبرنامج معانا ..
- جلال. . لا ماخصهاش .. تقدر تشوف مع البطل .. حنا غدا غانتحركو ..
- المى .." شدات فيه و زيرات عليه .. و دوات حدا ودنيه " .. عافاااك ماتحرمنيش بغيت ندوز فالبرنامج عافاك .. اي فرصة بااش نزيد نتشهر ..
- جلال .." خزر فيها .." ..نتي عمرك شفتي هادي البرنامج .. مابغيتكش تحطمي من ديبار ..
- المى .. ماتخاافش عليا .. و الله ماغانحطم راني كابابل .. و زيدون علاش نتحطم ..
- جلال .. نتي تعرفي انا حذرتك ..
- المخرج .. حنا فالحقيقة بغينا البطلة على الموهبة ديالها .. و بما انها جديدة و موهبه متفجرة .. وكذلك لانها مغربية ..
- جلال .." شد فدراع المى .." .. غدا نردو عليكم الى كانت شي امكانية تحضر . .
- المخرج.. واخه شكرا بزااف..
حياه بي عينيه و شد فيها من ضهرها فاتجاه اخر .. لي كانت واقفة فيه كارولينا هازة كاسها و تاتشوف فاتجاه الزوج ديالها لي كان واقف مع مجموعة ديال البنات ..
- جلال .." شدها من كتفها" .. مزال هو هو مكيتبدلش ..
- كارولينا .. هو هو .. عييت معاه .. متصورش ولا كيحرقني بتصرفاتو .." خذات كاس اخر من عند سرباي داز من حداهم شرباتو فخطرة" .. عاد ما زايد فيه .. عيت ...
- جلال .. تبغي ندوي ليك معاه .. انا كيحترمني يقدر يسمع مني ..
- كارولينا .. لا بلاش .. ماتدخلش انا بغيتو يحشم من راسو ماشي منك ..
- جلال ..لي بغيتي .. غير هو ماتبقايش تمرضي فراسك .. نساي و عيشي حياتك ..
- كارولينا .."هزات الكاس لي فيديها مبتسمه ليه" .. هاني عايشة حياتي .. اكثر من هكذا مكينش
- المى .." تخشات بينها و بين جلال بعد ما بعداتو على كارولينا" .. كاع الرجال فحال فحال .. بلا ماتعصبي راسك .. مايسواوش ...
- جلال .." شحطها لفخضها" .. ماتجمعيش لمك ..
- المى ..خزرات فيه .." .. نتا اولهم .. ماشي راجل لمرا وحدااا ..
- كارولينا .."غمزاتو" .. اممم كينه شي حاجة هنا .. امم .." شافت فيهم بزوج ..
- جلال .." رد لها الغمزه" .. كاتغير عليا .. هههههه ..
- كارولينا ..غاتعدب معاااك بزااف هههه انا لي كانعرفك ...
- المى .. علاش تدويو نتوما بزوج .. ههههههه تاضحكو على روسكم ..
- جلال .." جرها من خصرها و باسها بخفة جهة وذنها" .. نتي غير سكتي حابش عليك راسي غا بزز ..
- كارولينا ..." شيرات للسيرفور جا خذات منو كاس تالمشروب مداتو لألمى "بصحتك ...
- جلال .." شد من عندها الكاس شربو فدقة " .. تت مكاتشربش ..😉.
- كارولينا ..." شيرات للسيرفور جا خذات منو كاس تالمشروب مداتو لألمى "بصحتك ...
- جلال .." شد من عندها الكاس شربو فدقة " .. تت مكاتشربش ..😉..
- المى .. تال ايمتا غاتبقى تتخد عليا انا القرارات. .. هاا. ..
- جلال .. تال نعار ديري عقلك..
-علي .. " جا من وراهم .." .. السلام ..
- جلال .." ضار عندو " ... شحال عندك فالساعة ..
- علي ...مريض اخاي .. جاي نجيب ليك هادشي و نرجع في ساع...
- جلال ..ياك لاباس !!؟
- علي ..مدكدگ شارب البرد..." دير يدو على راسو بزز واقف. ." ..
-جلال .. "خذا من عندو الدوصي" صافي غير سير الله يجيب الشفا. .
- على ..مامحتاج والو. .؟؟
- جلال ..دار يدو على كتف علي" .. ماخاصني والو غير سير رتاح .. من الاحسن ماتمشيش اليوم .. مشيو و مجية صعيب عليك الحال. .
- علي .. مافيا مايبقى هنا جو مراكش سخون خنقني ...حسن نمشي لكازا ..
- جلال .. واخة دير لي رتاحيتي فيه .. بالحق حسن ماتصوگش ...
- علي .. ماعنديش مشكل ..
- جلال ..'' عيط لشيفور ديالو " .. الو .. خلي ليا الكونطاك عند واحد من الدراري و اجي دي علي ...
قطع معاه صيفط علي كي كان باينه عليه مسخسخ و رجع هو عمد المى ..لقاها بوحدها و كارولينا مشات عند راجلها ....
- المى .. مالو!!
- جلال .. بان لي مطحطح و صيفطتو ..
- المى .. امم ..
خذا داك الضوسي و كيشوف فيه و سينااا الوراق لي خاصو يسيني و سمع شي حد كيعيط عليه .. خلامهم عن قصد فوق الطابل و استأذن من المى و مشا لعند الشخص لي تيعيط عليه .. تبعات ليه العيد حتى وصل لعدو .. و مشات لداك الملف تتصور ورقة ورا ورقة ما خلات تا ورقة .. فيساع صيفطات داكشي لمرتضى و مسحات كولشي .. ردات الملف لبلاصتو و سدات تيليفونها هادشي كانت كلو تحت عيون جلال لي خذا الورقة الضرورية دارها فجيبو و خلا تما الصفقات الصغار و ورقة مزورة ديال صفقة ثقيلة .. ابتسم بالجنب و مشا عندها حاس براسو تيلعب معاها كاش كاش ..
- جلال .." دوز يدو بطريقة مثيرة على ضهرها" .. امم نمشيو !!
- المى .."تلفتات ليه" .. علاش ؟؟ باقيين الناس ..
- جلال .. عيت باغي نرتاح ..
- المى .. اوكي نمشيو .....
رجعو ديك الساع لليموزين لي وصلاتهم للفندق .. وصلها للغرفة ديالها و شد فيدها .. دورها لعندو كيشوف فعينيها ..
- جلال ..عرفتي شنو توحشت ..!!
- المى .." طلعات فيه حاجبها" ..شنو!!
- جلال .." شاف فجهة صدرها" .. الشامه لي محمقاني !!
- حطات يديها على وجهها" .. لالالا .. ههههههههههه مكاتعياااش الهلالي. ."شدات ليه وجهو بين يديها".. تصبح على خير .." بقات تتشووووف فعينيه لي داابلين و كانو كيف الجمرة .. بكثرة الشراب لي كحش..قربات ليه و باستو جنب فمو" .. تصبح على خير .. باينه عليك عيان ..
دخلات سدات الباب .. خلاتو واقف ابتسم بالجنب و مشا لسويت ديالو ...
يوم الثالي فاقت خولة على صوت تيليفونها كيرن مع الستة تالصباح...هزاتو لقات نمرة ماعارفاهاش .. يالله كانت غاتقطع عليه و هو يطفى .. عاود رجع صونا باصرار .. و قرىات تجاوب. .
- خولة .." بصت ناااعس " .. الو وي!! شكووون ...
- علي .. " بااين عليه العياااء من صوتو" .. علي .. معااك علي ..
- خولة .. اهااااااه .. اش بااغي عندي مع الصباااح بايت تحلم بياااا!
-علي .. اجي عندي محتاجك ..!!
- خولة ..مالك؟؟
- علي .. " حط يدو على راسو" .. دابا غاتجي ولا لا ..؟؟
-, خولة .. غانجي ولكن قول ليا مالك و فين غانجي ..
- علي .." كيكحب و بزز كيطلع صوتو" .. اجي عندي لدار .. مريض .. ماقادش .. " كيكحب .." ..
- خولة ..فين غانجي علاه انا عارفة دارك فين عائلتك !!
- علي .. ماعندي حد .. غانصيفط ليك العنوان الى بغيتي تجي ..
قطع عليها الاتصال .. شافت فااتيليفون و عضات على شفتها .. فكرات اش غادير واش تمشي بصح .. و الى كان فخ من عندو .. ولكن لقات الجواب انو جدير بالثقة و لو كان بغا يدير لبها شي حاجة كان دارها لها نهار كانت مسفحة عريانه قدامو .. شافت الرسالة لي وصل فيها اللوكيشن ..و ناضت للبلاكار هزات منو سروال لاسق فالأسود و بودي فالأحمر مبيد البوط... مع سبادري فالأسد .. مشطات شعرها و هزات صاك ديالها و نزلات تتسحب مع الدروج حتى خرجات .. شدات طاكسي وراتو العنوان .. كانت الشقة ديالو فموبل راقي .. طلعات فالمصعد كاتقلب على الباب تا لقاتو .. و سرسرات عليه ..بقت تتسرسر تا عيات بالسيف ناض من بلاصتو كيجر رجليه حتى وصل عندها ..و حل الباب ..
- خولة .." طلعلت و نزلات فيه كان غير بالسروال و الفوق عريان .. كلو عرقان و شعرو فازگ وجهو بااينه عليه المرض" ..الله الله على حالة ..
- علي ..." كيحاول يبتسم".. جيتي !!
- خولة .." قربات ليه .." ..لا مزال ..
- علي .." دخل و خلاها" .. دخلي و سدي الباب ..
مشا كيتجر للبيتو .. تلاح فوق النموسية و على كرشو.. و تبعاتو خولة تا هي كاتشوف فيه من اللور فالطريقة لي كيمشي بيها ..
- خولة ...شنو عندك؟؟
- علي .. السخانة ..
- خولة..." جلسات حداه و مدات يدها بتردد تتبغي تقيو و ترااجع تا زعمات و حطاتها على جبهتو .. كي قاستو حل عينيه" .. نار الفوار ..!! .. فين الفارماسي ديالك؟؟
- علي .." شير ليها على الحمام بتعب" ..
مشات تتقلب فديك الفارماسي لقات فيها اسبيجيك و ميزان الحرارة .. هزاتهم و دخلات عندو كان باقي على نفس الوضعية ناعس على كرشو ..
- خولة ..علي .. عاقاك تقلب على ضهرك .. تقاد فبلاصتك بغيت نعبر لك الحرارة ..
- علي .. " دار بهضرتها و ضار كيشوف فيها بعيوونو مثقلييين... " هاهو ..
حطات لو الميزان ففمو ..و جلسات تتشوف فيه بقى فيها فديك الدار بوحدو لا من يهتم بيه حتى و هو مريض .. حطات يدها على جبهتو تدوز على شعرو و حيدات ليه الميزان باش تشوف شحال عندو لقات الحرارة طالعة ليه بزااف ..
- خولة .. خصك ضروري تشرب الدوا .. بلاتي عندك شي حاجة تكال هنا؟؟
- علي .." كيدوي بزز" .. لي بيسكوي .. الشكلاط الشيبس .. داكشي كين فالكوزينا ..
- خولة.. دابا هادي هي الماكلة فبلادكم ؟؟ هادشي باش كاتفطر و غدا؟؟
- علي .. كناكل على برا ..
- خولة ...لا حول الله .. بلاتي نصايب ليك ماتاكل. .
ناضت من حداه دخلات للكوزينا تتقلب بعينيها واش غاتلقى شي حاجة ..فتحات البلاكارات بانو ليها لي باط .. خذات شعرية رقيقة و مشات للثلاخة لحسن الحض لقات مطيشة ..جبدات الحكاكة حكاتها مع البصلة و داراهم يديبو خوات عليهم الما و دارت الربيه تا هو مع العطرية .. خلاتهم غلاو و دارت عليهم لي باط ..خلاتها تطيب حتى طابت خلاتها جارية باش يشربها بسهولة .. حلات الثلاجة جبدات عصير الليمون خواتو فكاس و حطات كولشي فبلاطو داتو ليه لقاتو مغمض عينيه .. غير حس بيها حلهم. .
- خولة .." مبتسمه ليه " ..نوض تاكل شوية باش تقدر تشرب دوا.
- علي .. ماقادرش ...
- خولة ..هاااشنوووو .. من قبيلة و انا واقفة فالكوزينه .. دابا محشمتيش غير دوق من يدي راني حويدگة ماتخافش ...
- علي .. " تنهد و ناض بزز عليه...." اري نشوفو هاد الأكلة الشهية لي صايبتي ..
-خولة .." حطات البلاطو فوق ركابيه ..و هزات المعلقة كاتوكلو .. مع الدغمة الاولى ابتسم ليها و حل فمو .. بقات تتعطيه ياكل و يشرب العصير حتى قرب يكمل الطبسيل ديالو و حبسها ..." ها!! عجباتك!
- علي .." شرب العصير غدقة و غمض تينيه" .. ننصحك دووقيها ..
- خولة .." نزات معيلقة داقتها و تسعق ..بزز صرطاتها" .. اهععععع نسيت الملحه ..
- علي ..منتي باغية ديري ليا تسمم هههه ماشي داويني ..
- خولة ... " شدات حناكها" .. نااااري .. سمح ليا و الله ما قصدت .. و علاش كليتي .. علاش كنتي تقولها ليا. ..
- علي ..هههه ..." جر ليها يدها شدها لها" .. كولشي من يدك زين... باراكا غير وقفتي و صايبتيها ليا. . تكون فيها الملحه و لا ماتكونش ماشي مهم .. "رجع تاني كيكحب. .
- خولة .." تخربقات و ناضت صايبات ليه الدوا و مداتو ليه" .. هاك شرب هذا ..غاينفعك .. .." شرب من عندها" ..بالشفاء. .
- علي .." جرها لعندو عنقها و بيد وحدة ..". . خليك هكذا
- خولة .. " توثرات" ..علي .. احم. . دابا نتا عائلتك فينهم!؟ علاش ماجالسينش معاك؟؟
-علي ...همم .. عائلتي .. الله يرحمهم ولا عايشين و لا الله و العم ..
- خولة .." بعدم فهم" ..كيفاش؟؟
- علي .. كنت عايش فالميتم .. و الميتم لي كنت عايش فيه كانو كيقريونا كي وصلت لليسي تلاقيت بجلال كنت تنقرا معاه .. من تما ولا صاحبي .. و فاش درت تمنطاش و خرجوني و هو لي اهتم بيا .. دخلني لدارهم حتى خدم معا جدو.. ولا خدمني معاه .. وليت دراعو اليمن .. هذاك هو عائلتي .. خويا و صاحبي و كولشي ..
- خولة .." صدمها" .. اا .. الله يخليه ليك ..
ماجاوبهاش .. دورات راسها لعندو لقاتو غفى .. قاست لو جبهتو كان باقي سخون لكن ماذي فحال الأول .. ناضت من بين يديه بشوية و غطاتو تال النص باش ميزيدش يسخن .. ناضت للكوزينا جابت بول فيها الما بارد فيه الخل و فوطة صغيرة .. جلسات حداه تدير لو الكمادات و تتشوف فيه و تتفكر فداكشي لي قال ليها ..
#يتبع .
(البنات هذا ما تفاعل ما والو تحركو معانا شوية عيقتو ويلي بزاف على النعاس تحركووو فيقوو )