عاشقة الثراء💸مكتملة💸

💸الجزء 38💸

عاشقة الثراء
"البارت 38"

-أهرب منك إليك -
حيد ليها من الطريق خلاها خرجات تتجري ديريكت للكارافان ماعاوداتش تلفتات فديك اللخظة تبعاتها المى تا هي ..شاف فجلال و كل واحد دور وجهو لجهة خام الضحكة ...اما المى تلاقات فطريقها للكرافان مع سرور لي حبسات علبها الطريق بدراعها..
- سرور .." ضحكات ليها" .. هاي هاااي على الزين .. توحشنااك اصاحبتي غبوورات هادو ..
- المى .." ابتسمات ليها و سلمات معاها بالوجه" ..كي ديرة اسرور صافا!!
- سرور .. صافا الحمد لله .. يا ختي لا برية لا تيليفون .. نسيتيني من نهار رجعتي لكازا ..
- المى .." بغات تلحق على ختها" .. اه غير المشاغل .. سمحي لي بغيت ندخل ..
-سرور .. اه بغيت نقول ليك فاشمن اوطيل كينة نجي عندك ندردشو شوية!!
- المى ..ههه انا مكيناش فالاوطيل احبيبة ..
- سرور .." باستغراب" ..مافهمتش!؟
- المى .." ابتسمات ليها " .. جالسة فدار مول الشي .. شخصيا .. ه ه ه..
-سرور ..."بصدمه" اوووها .. لهاد الدرجة ..!!
-المى .. وي بيبي .." شيرات ليها للكرافان" .. خصني نمشي .. سمحي لي ..
- سرور ... اه وي .." شافت جهة الكارافان" .. اه شكون هاديك واش معاك؟؟
- المى ..ام .. ختي الصغيرة هاديك ..
- سرور.. " دورات راسها و عضات على شفتها" .. امم شفتها قبيلة واقفة مع علي .. ردي البال معاه ..
- المى .." ربعات يديها " .. علاش!! علاش نرد معاه البال انا ..
- سرور .." ضحكات بميوعة " .. هههههههه غير بغيت نقول ليك عووش معروف فالوسط .. فينما تبان ليه شي كتكونة كاطير عليها ..امم .." غمزاتها" .. راك فاهماني طبعا ..
- المى .. ههههههههههه لالا احبيبة ماتخافيش على ختي .. حاضية راسها براسها .. لا علي و لا غيرو غايلأثر فيها .. بحال ختها. .." غمزاتها" ..يالله باي بيبي ...
-سرور .." خلاتها تا مشات" .. بطبيعة الحال غاتكون كي ختها .. جنات التقحبين و وارثينهم .. ها غانشوفو تاليتك..." خذات تيليفونها و انحشرات فزاوية بعيدة كاتسخن يديها و تتسنا يجاوب الطرف الثاني على اتصالها .." .. وي مدام .. عندي ليك خبيرة فميكتها .. سخوونة ..
- اشنو الجديد اسرورو ..؟؟
- سرور .. الممثلة ديالنا عرفتي فين جالسة ملي وصلات للندن ..!!
- ماتقوولشي ليا عند جلال ..!!
- سرور .. تمامااا ههه عند سي جلال .. و غاتبقى هنا فوق العشر ايام .. حتى يساليو هاد المشاهد اللخرة .. اه .. و هضرة كثيرة تدور عليهم .. يعني ..الفريق كيقول بلي بينهم شي حاجة .. حيت اهتمامو بيها كثير .. تصوري دابا جا فهاد البرد باش يشوفها .. اووه .. شي حاجة قوية هادي .. عمرو دارها ..
- قطعي نتي قطعي تتجيبي ليا اخبار كي وجهك ..
- سرور .." سدات التيلي و نفخات شعرها" .. يخ تفو الله ينعل بو الزهر لي جابني بين يديك ..
سمعات جلال كيعيط عليها و مشات عندو تتجري دات ليه قهوتو لي بردات فيديها ... اما المى دخلت عند خولة لقاتها مزالة مزنگة ..
- خولة... " خزرات فيها" ... كنتي غاتمتلي هادشي . بلا حشمه بلا حيا. .؟؟
- المى .." ربعات يديها" .. هذاك سميتو الفن احبي ..
- خولة .." حمرات فيها" .. هذاااك سميتو العفن اعمري ..من نيتك .. كون ما جلال لي جاب كومبارص كنتي غاتمثلي هادشي!! و فين الهضرة ديال قبيلة لي غرقتيني بيها ... و فين الهضرة لي قطرتي اعلي فودنيه ...
- المى .. اولا .. داكشي غا تمثيل وهمي .. مكيناش علاقة جنسية كاملة تما ..
- خولة .." قاطعاتها .." ..ولو .. كنتي غاتعراااي .. هادشي ماكايناااسبناااش .. على الاقل حنا مسلمين .. مكانديرووش هادشي !
-المى ..انا لو كنت عارفة اكيد ماغانديرهاش .. غير هني بالك ..
- خولة.. تصدمت انا من المشهد .. مقدرتش نكملو حتى ..
- المى ..داك سيهم علي .. مانعاودش نشوفك معاه .. عاد حذراتني منو وحدة خدامة مع جلال ..
- خولة ..المى .. حتى واحد ماعندو ااحق يتدخل فيا .. و ديك السيدة لي قالت ليك هادشي ماشي سوقها نتي عارفاني مزيان كانعاود ليك و نستشر معاك ولكن كندير لي فبالي .. لو كان كنت باغاه انا لي غانجري وراه ولكن انا مداخليش راسي .. داكشي علاش .." ابسمات ليها.." .. غير تهناي ..
بادلاتها المى الابتسامة و بقاو جالسين فالكارافان حتى جا علي دق عليهم و قال لها تلبس حوايجها حيت غايرجعو للدار و داكشي لي كان لبسات حوايجها و اتجهات هي و خولة للسيارة لي كانت من نوع Jeep كان هو لي سايقها و موراه وحدة اخرى فيها لي گارد ديالو .. لي فتحو لألمى الباب القدامي و خولة اللوراني .. اما علي مشا ديريكت للاوطو ديال و جات عندو سرور كتجري يالله غاتفتح الباب و هو ينطلق سبقهم كاملين خلاها غا تتشوف .. مشات تتجري توقفلي كارد ركبات معاهم حيت حتى سيارة جلال تحركات .
دازو عشر ايام كاملة كمل التورناج و بااقة خدمة جلال ماكملاتش باش يرجعو .. هاد الايام دوزاتهم المى كاع فالتورناج .. و اي حاجة سمعاتها من جلال كاتوصلها لمرتضى .. اي كلمة تتصل بيه او تصيفط ليه واخة فميساج .. كانت ديما شادة التيليفون و هادي حاجة لفتات انتباه جلال لي حط عليها العين .. لكن انشغالو بالصفقات المتثالية لي جاوه خلاوه ينشغل عليها واخة داير معاها العين ولكن هي كي الثعلب المكار مكتخلي حتى دليل وراها و فمرة سولها مع من شاداها فالفون جاوباتو بملامح عادية خالية من اي ارتباك انها كادوي مع الام ديالها حيت بقات بوحدها و توحشاتهم .. كانت علاقتهم عادية كيف عادتو كيبغي يبوس و فينما يشوفها وبما انهم مكانوش تيتلاقاو بزاف سهل عليها الامر لأنها كاتميل ليه بلا هواها .. هادشي كان حتال نهار كانت جالسة فالجردة .. النهار لي مكانش عندها التورناج .. خولة كانت جالسة فالبيا ديالها .. و هي فالجردة كيف عادتها مقابلة الانستغرام ...حتى دخلات عليها شابة فنفس عمرها .. لابسة فستان قصير أسود و طالون برونزي باينة عليهم ماركة غالية هذا غير الصاك و المجوهرات و الميك اب لي حاطة فوجهها ..هازة فيدها مونطو و دايرة نضارات ديال الشمس على عينيها و طل ما كاتقرب لألمى كل ما حواجبها تيتعقدو ..
- مادلين .." حيدات النضاضر و شيرات بيدها باستغراب" ..هاي ..
- المى .." طلعات فيها حاجبها بلا ماتجاوب" ..
- مادلين ..شكون نتي؟؟؟
- المى .. "طفات التيليفون" عفوا !! شكون انا ولا شكون نتي؟؟؟
- مادلين .. " ضحكات بميوعة" .. هاهااي .. شكون انا .. مادلين احبيبة .. ملي ماعرفتينيش .. سووو ماعندكش علاقة بالسوشل ميديا و الفاشن ..
- المى .." ابتسمات بالجنب" .. ههه لا احبيبة عندي مع الفاشن و السوشل ميديا .. مي مانشول غير الناس المهمين .. " طلعات و نزلات فيها" .. اووه سمحي لي .. ماكانعرفكش ..
- مادلين .." تنرفزات و شعلات فيها المار " .. فين جلال؟؟
- المى .."طلعات فيها حاجبها" ..و شكون نتي لي كاتسولي عليه؟؟
- مادلين .." تتشوف فضفارها باستمتاع" .. هههه انا حبيبتو .. و روووحو و قلبووو و عويييناتو .. و نتي يا حلوة ..شكووون؟؟
- المى .." فحال لا تخوا عليها سطل ديال الما مكانتش متوقعاها نهائيا يكون جلال عندو علاقة مع شي وحده.." .. انا ..! انا المى .. الممثلة الجديدة ديال الفيلم لي كيخدم عليه جلال ..
- مادلين .. اهه .. ههه كاتقصدي مستر جلال .. كنقول ليه ديماا كيضسر الممثلين عليه .. اووف .. كل مرة كانسافر على ود الخدمة كانجي كانلقاه مسكن عندو قشلة ديال الممثلين .. اووه ماي گاد ..
- المى .." شافت فيها باحتقار .. وشافت وراها كان جلال جاي" هاهو حبيبك جاا .. بالهنا عليكم ..
دخل جلال عاقد حواجبو و يديه فجيبو ..
- جلال .. مادلين ..!! اش كديري هنا؟؟
ضارت عندو مادلين و مشات تتجري تلاحت عليه عنقاتو و باستو فمو دور عينيه شاف جهة المى حانت هاضة على شفتها كي شافت عينه و هي تبتسم بسخرية و دخلات للداخل .. قدام المى خلاها ديك ما بغات و تبوسو فشفايفو .. لكن غير دخلات و هو يدفعها حتى طاحت للأرض ناضت دغيا كاتسوس حوايجها...
- مادلين .. حبيبي مالك .. شتك مغير .. مالك واش مافرحتيش بشووفتي ..
- جلال .. " جرها من دراعها" .. شحال من مرة قلت لملتك ماتعاوديش تجي عندي بلا اذن؟؟ هااا شحال من مرة !!
- مادلين .. " كاتصنع الحزن" .. ولكن انا راني حبيبتك علاش تدير فيا فحال ما هكا ... توحشتك بزااف ماتخايلش قدااش .." قربات ليه و حلات الصدفة دالشوميز" .. توحشت عنفك .. و لمستك .. علااش ماقلتيليش رجعتي .. حتى نعرف من الأغرااب ماشي حشومه ..؟
- جلال .." بعدها عليه و دفعها بقرف" .. كملتي .. يالله قودي عليا من هنا ...
- مادلين.." جا يدخل و هي توقفو" .. اهاااه .. لقيتي البدييل ياك .. ههه ديك العاهرة لي كانت هنا شكووون هي .. جبتيها معاك من المغرب ولا شنو !! ااا .. ههههه بدلتيني .. قاالوها لي .. قاالو لب ماتيقييش فيه و انا تقت فيك و راهنت على الحصاان الغلط .. كان كيصحابلي غاتبدل.. غانقدر نخليك تبغيني بكل الطرق جربت معاك .. ولكن نتاا ماكاتقنعش .. شنو لي فيهم كاااع دوك العاهرات لي تتجيب لدارك و انا مافياااش .. هااااا شنوووووو جاوبني جلال...
- جلال .. مادلين .. عارفاني .. عاشرتيني .. مدة عام .. و عرفتيني اش كندير للي كيعارضني ولا كيعلي صوتو عليا .." بدا كيقرب ليها و هي تتبعد" .. شنو .. بغيتي تجربي ولا كيفاش!!
- مادلين .." كاتحاول تهديه" .. جلال .. جلااال كاالم .. عافاك .. انا غانمشي .. صافي غانمشي كيف ما بغيتي غاندير .. من بعد ندويو واخة ..؛!
-جلال .. " ابتسم بالجنب" .. مانعاودش نشووف كماارتك .. سمعتي .. قلبي عليا ..
غمزها و دخل خلاها تتغدد بوحدها ..هزات صاكها و خرجات تتجري ركبات فالاوطو ديالها و مشات .. اما جلال طلع ديريكت لبيتو .. بدل عليه و تم نازل .. بانت ليه المى جالسة فالصالون تتشرب الما و تتفكر ..قرب ليها و حيد العر على عنقها و باسها فيه
- جلال... كراميلا !! نو واخد عقلك
- المى .." دفعات ليه يديه وناضت" .. عمرك كاتفهم عمرك تحط عليا يديك ..
- جلال .." ابتسم بالجنب" .. اش طرا!!
- المى .. دير فبالك ماغانكونش عشيقة من بين عشيقاتك .. انا مكانبغيش الحاجة المشروكه بلا ماتبقى تقرب ليا .. الخدمة لي بيني و بينك سالات و الكتبة طلعات .. نقبط مستحقاتي و تشاااو ..انااا مكانبغيش الحاجة المشروكة ..
-جلال .." ناض و قرب ليها خذا يديه فجيب الشورط ديالو و رجع راسو للور مصغر فيها عويناتو الناعسين" .. و انا لست رجلا لإمرأة واحدة ..." خزرات فيه و حطات الكاس بزعافة و طلعات تتجري فالدروج ماباغياش تخصر مهمتها لي جاية على ودها و مقربة ليه ...اما هو بقى تيشوف فيها تا طلعات ...
- جلال .. " مبتسم بالجنب" .. حتى رجعتي ليا كراميلا .. حتى رجعتي خليتيني نكرههم كاملين ..
دوز يديو على شعرو و تلاح على الكانابي بتعب ....
دوز يديو على شعرو و تلاح على الكانابي بتعب .. اما المى .. طلعات ديريكت لبيتها و ردخات عليها الباب كانت تتحس بشي كاجة ماشي هي هاديك و كااع لي تتخطط ليه انها طيح جلال فالشبكلة و تخرج بجيابها عامرين لقات داكشي كيتلاشى قدامها و هو ماهاموش من هادي لهادي و عااادي عندو .. كانت باغية يكون تأثير سحرها عليه قوي .. ولكن دابا حسات بطعم الهزيمه فاش شافت ديك الصفريطة تتبوس فيه و هو منسجم معانها .. خذات تيليفونها و اتصلات على مرتضى .. لانها كانت شافت ملفات حطهم جلال فالمكتب ديالو ...
- المى .. وي .. شوف .. جلال حط ملفات فالمكتب ديالو .. و الليلة الحد عطى للي كارد عطلة .. بقاو غير زوج .
- مرتضى .. اممم مزياان .. ماعندنا مانديرو بلي كارد حنا .. نتي غادخلي للمكتب و تهزي الملفات تصوريهم ليما و ترضيهم لمكانهم فقط ..
- المى .. نونو ماتحلمش واش هبلتي .. هو دابا فالدار .. و الى مشى حتى حصلني قبري ماغاديش تلقاوه .. واش من نيتك نتا داوي ..
- مرتضى ..المى المى .. انا عاارفك تقدري ديري اكثر .. بليز ماتمرضيييش ديلمي .. نفذي .. و زمي فمك ..
- المى .. واااش تصطيتي .. انا خدمتي معاااك نوصل ليك الاخباار و صاافي .. هنا حدنا ..
- مرتضى ..و هادو تا هوما اخبار .. ديري كي قلت ليك ولا مغايعجبك حال الزوينه ..
قطعات الاتصال و نعلات سلسفل ابوه و اانهار لي لاقاه معاها لا هو لا جلال .. فهاد الوقت كان جالس فالبلاصتو فين خلاتو خذا تيليفونو و شعل الكاميرا لي دار ليها فبيتها فاش خرجات فيوم من الأيام للتورناج .. كانت دايما حريصة انها متهضرش فالغرفة .. لكن تليوم بغلطة منها كشفات حالها ليه .. وعرفها علاش ناوية .. لكن ماعرفش مع من متآمرة .. حس بالدم كيغلي فذاتو و عينيه بغاو يطرطقو عروقهم كيفاش انجل تخونو و تآمر عليه كراميلا الصغورة لي كان تيهزها بين يديه تخونو وعلاش تغذر بيه اصلا على قبل شنو .. الفلوس!! ناض ديك الساعة بدل الملفات لي كان حاط فالمكتب ديالو بملفات ثانية ديال صفقة قديمة بعامين و رجع لبلاصتو في ساع .. كان باغي يمشي ليها و يهرس راسها على هاد الفعايل .. لكن فلحضة قدر يمسك اعصاابو و ميتهورش و يسايرها فاللعبة لي كاتلعب معاه و يشوف لفين غاتوصل و شكون هذا لي تجرأ يدخل جاسوسة لدارو هذا كان هذفو فداك اللحظة خصوصا ان اعدائو كثار ...
خرجات المى من بيتها بلى صمدالة تتسحب على أطراف رجليها حتى وصلات للمكتب ديال جلال .. حلات البواني بشوية باش ميديرش الصوت و دخلات بالزربة سدات وراها الباب .. مشات ديريكت للملفات لي كانو محطوطين فوق المكتب يالله بغات تجبد تيليفونها تصورهم و هو يتفتح عليها الباب وسعات عينيها بصدمة و شفايفها ولاو تيترعدو بالخوف .. فيساع طلقاتهم و بعدات على المكتب ديالو ...
- جلال .." عاقد حواجبو و خاشي قبضة يدو فجيب سروالو" .. اش كديري ننا!!
- المى .. ج...جلال .. انا جيت نقلب عليك ..؛
- جلال .." ميل شفتو" .. اوه تقلبي عليا الفوق و نتي خليتيني التحت ..!!
- المى .. دابا ..انا سمعت صوت رجلين يصحابلي نتا لي طلعتي. .
- جلال .. أهاه .. " قرب لعندهاو ملي ملقيتينش علاش بقيتي هنا .. مالك ماخرجتي!! وا كاتسناينس تا نجي!!
- المى .. ااا .. لا لا عاد دخلت و كنت خارجة نيت !!
- جلال .." قرب لعندها حتى لسق هليها .. دوز خصلة من شعرها لجنب ودنها ..." .. اممم متأكدة هادشي لي كين ..
- المى .." حركات راسها بالايجاب بدون تردد " .. هادشي لي طرا ..." كان تيدوي فحال لا عندو امل تقول ليه كولشي الحقيقة .."
- حط يدو على خصرها كيتحسسو " .. علاش تتقلبي عليا الغزالة !!
- المى ..." عينيها كان البؤبؤ ديالهم تيترعد و كيبين انها كاتكذب و متوثرة و خايفة .. " .. كنت .. كنت بغيت نسولك .. ايمتا غانلجعو للمغرب .. قبيلة دوات معايا ماما و استعجلاتنا. .
- جلال .." شد ودتها بصباعو تيتحسسها هاد الحركة خلاتها ترخىىىىىىى بين يديه .." .. غانمشيو غدا .. " نزل راسو لعنقها و هو كيردد فبالو خساارة .. خساارة .. باسها فعنقها و عضها بخفة خلات ليها البلاصة فعنقها" ..
- المى .. بعدات عليه و رجعات لور" .. ملي غاديين غدا .. انا غانعلم خولة و نجمعو حوايجنا واخة ..!
هربات من بين يديه و خرجات سدات موراها الباب كان حابس عليها راسو بزز و نفسو تطلع و تنزل بالجهد .. حس بأنفاسو غايخنقوه من كثرة الأعصاب .. بان ليه واحد الديكور ديال البديع فالأسود هزو رماه بأعلى جهدو للباب لي خرجات منو و نطق بعصبية ...(كلبة فلووووس .. طماااعة ) غمض عينيه حتى عصرهم و خذا كارو كيكمي فيه بشراهة .. اما المى كي خرجات من عندو طااارت لبيتها و على فمها جملة وحدة ...( منك لله يا مرتضى الكلب غاتخرج عليا منك لله 😭)...
#يتبع. ..
( مزااال المى غاتغني أنا لي جنيييت على حااالي و بقيت وحيد ايه والله هادي غير بدااية مشوارها الحقيقي مع مرتضى اما فالاول كان تيطلب منها غير أخبار عادية ... و اول مهمة جدية وصاها عليها فشلات فيها اش غايكون رد فعلو فنضركم .. و جلال علاش ناااوي حتى هو بهاد البرود دالأعصاب!؟)