عاشقة الثراء💸مكتملة💸

💸الجزء 20💸

" عاشقة الثراء "
"البارت 20"

-ألمى-
بعد ما فات شهر ديال التصور .. بين مراكش و ورزازات لي تصورو فيها اغلب المشاهد نضرا لأنها اكثر الأماكن السنمائية فالمغرب .. من لي مشات ليها المى ولات علاقتها مع ناجي غير فالتيليفون تا هو كانت عندو خدمة خارج المغرب حتى اتصالاتها قلت من غير مرة أخرى صيفط ليها الفلوس و كيف العادة ديريكت حطاتهم فالكونط ديالها ..كانت مرتاحة فالخدمة مع الطاقم كامل علاقتها بسرور كاتحسن ولكن دائما كاتخلي الحدود بيناتهم باش مايجيش النهار لي تندم حيت فاتتهم معاها .. هاد المدة كاملة كان جلال من هادي لهادي مكيساليش نهائيا تال الليل فاش كانت فمراكش كان كل ليلة يفتح الكاميرا كيلقاها ناعسة .. اما ملي مشات لوارزازات ولا كيدوي مع سرور و تا هي مكاتعطيه تا خبار لا كاتخرج لا كادخل كاتقول ليك غير كولشي اوكي ...و تا هو مع مشطون ماكانش قادر يفكر فشحال من حاجة فنفس الوقت.. داكشي علاش خلا ليها راحتها هاد المدة و بقى تا هو مقابل شغالو ..
- جلال .." جالس متكي على كرسي مور المكتب ديالو تاع الاجتماعات و فيدو السيگار .. لابس لباس كلاس بلا كرافاط و قدامو كاع أعضاء مجلس الادارة ديال الشركة تاعو .. كايناقشو فآخر مشروع ديالهم ..و لي كان مشغول فيه حيت هاديك معتبرها اكبر صفقة غادي يدوز من نهار دخل لسوق الشغل لي كانت نيت فالمجال ديال الخدمة ديال العائلة ديالهم و لي هي بواخر مع انهم خدامين فالعقار و الفلاحة و صناعة قطع غيار السيارات ولكن البواخر هي خدمتهم الاصلية من بكري و شركتهم معروفة على مر السنين .." .. هاد الصفقة دخلت ليها بعد جهد تا حد فيكم مايتخايلو .. مكانش ساهل عليا نطيح أقوى خصم .. الى حشمتوني ولا اي غلط ولو كان صغير دار فهاد ااخدمة كنقسم ليكم غاطيرو واحد بالواحد ..
-موضف... مفهوم الشاف .. ولكن عندنا اشكال .. كينة واحد الشركة ديال الصيد قصداتنا حنا باش نخدمو ليها ولكن الاشكال انهم شركة صغيرة و ماعندهمش بزاف ديال الطلبيات ..و طاللين المدة قصيرة للتصنيع ..
- جلال .." ضرب على الطابلة". . واش انا عندي هنا كوري ..؟؟ واش غانخلي مجموعة دولة باغية تخدم معايا و نمشي نخدم لشركات صغار !!؟ اش هاد التخوار هي نسدو هاد المرض كامل و نوليو نصايبو الفلايك دالخشب .." خزر فيه و وجه ليه صبعو ".. هاد المرة الصفقة كبية و اهم صفقة بالنسبة ليا .. بواخر كبار لنقل البضائع و السلع..و زييد و زيد .. عارفك نتا بعض المرات تتصرف من كرك .. و خصوصا فاش كينغزك ضميرك .. جمع معايا راسك و تمشى گود هاد الخطرة ولا غانولي معاك مامزيانش .. مفهوووم .." ضرب فالطبلة تا تزعزعو شي يشوف فشي " ..نفعها ماغايرجعش عليا غير انا .. كلكم غاتاخدو مكافآت ..يالله جمعو معايا روسكم ..
- محسن .." دخل عليهم للبيرو و مشا ديريكت عند جلال تحنى ليه على ودنو" ..وصلوني خبار مهمة من المغرب ..
- جلال .." شير ليه بيديه .." ..من بعد ..
- محسن ... هادشي مافيهش من بعد ..
- جلال .."خزر فيه و شاف فالموضفين" .. تقدرو تمشيو لخدمتكم.."شاف فالموضف لي دوا معاه من قبل " .. نتا .. عطي الخدمة ديال الشركة لي قلتي للفرع الصغير و وصيهم على الوقت ..
- الموضف .. ضحك ليه" .. واخة .. ههه شكرا ..
ناض. كاملين كل واحد مشا لخدمتو و ناض جلال تا هو مشا للبيرو ديالو جلس فوقو و شاف فمحسن مطلع حاجبو..
- جلال .. مالك مصدع لاي كري !! ياك لباس !!
-محسن .." جبد التيليفون و قابلو ليه مع وجهو" .. شوف براسك ..