💕أنت قلبي٢💕

الحلقة ١٣١

#أنت_قلبي٢
#بوسي_مصطفى
______________
الحلقة ١٣١

عمار : امال مبترديش عليا ليه؟
ملك : أنا معاك اهو كنت بتقول ايه؟
عمار : بقولك معرفتش اكلمك و احنا عندكم الجو مساعدنيش ملك أنا عايز اقولك كلام كتير مش عارف هتفهميني و لا لأ
بس اتفاجئت بقرارك ده و اتفاجئت أكتر لما لاقيت خالي جاي و بينهي كل حاجه كده بكل سهولة أنا عملت ايه لكل دا؟
ملك : المشكلة إنك معملتش حاجه تأكدلي إنك متمسك بيه.
عمار : ملك الموقف محرج ليه و ليكي كنتي عايزانى اقولك ايه؟  أنا فكرت إنك هتتفهمي موقفي و هتديني فرصة أعيد حساباتي.
ملك : تعيد حساباتك و أنت مفكر بعد الجملة دي حتى لو كنت بفكر يعني... ممكن اكمل كده!
عمار : مقصدش اللي فهمتيه أنا ممكن أكون مبعرفش أعبر كويس و بتفهم غلط بس صدقيني إننا نفركش دي قرار كان بعيد جداً على تفكيري ليه فهمتي إني لما اخد جنب بعد اللي سمعته إني ممكن أفكر في حاجه زي دي؟
ملك : اللي سمعته!
عمار : ملك ما هو أنا مش عارف بصراحه أتكلم معاكي بكل وضوح اللي حصل دا لازم يوجعني و يتعبني نفسياً قدري موقفي علشان خاطري أنا مبقولش نفركش بس حطي نفسك مكاني و شوفي هتفكري في ايه وقتها.
ملك : أنا مابلومكش بالعكس مقدره موقفك كويس قوي و مش زعلانه يا عمار أنت معاك حق و علشان كده حبيت اعفيك من الحرج و بابي راح نهى الموضوع مع عمتو.
عمار : يبقى مفهمتيش كلامي.
ملك : عايزني اقولك ايه أنا مش زعلانه يا بنت عمتي و عارفه إن كل شيء قسمة و نصيب بعد اذنك هقفل علشان عندي مذاكرة.
عمار : انتي ليه مش مدياني فرصة أتكلم و لا اقولك على اللي جوايا؟!
ملك : حاضر هديك فرصة اتفضل أتكلم.
عمار : ممكن بس تديني كام يوم افوق و اقدر افكر كويس لإني متلخبط بس أنا بحبك صدقيني بس عايزك تستحمليني و تعرفي اني صادق معاكي.
ملك : اديك فرصة كام يوم تفكر
علشان اعرف هتتمسك بيه و لا تصرف نظر عن الموضوع هو دا اللي تقصده؟
عمار : مش بالظبط كده يعني متخلهاش بالصيغة دي يا ملك.
ملك : أنت مدرك الاحساس اللي وصلتهولي؟!
عمار أنا مبشحتش علشان تقولي الكلمتين دول لو احساسك صادق زي ما بتقول هتبقى واضح في كلامك و صدقني أي قرار هتاخده في اللحظه دي هتقبله من غير أي زعل لكن حوار إني انتظرك علشان اديك فرصة تفكر تكمل و لا لأ دي غريبه شوية و لازم تخليني اخاف و افكر اصلا لو كنا هنستمر إن دي تكون طريقة تفكيرك في أي قرار في حياتنا مين اللي تقبل على نفسها كده قولي؟
عمار : ملك أنا....
تقطع ملك المكالمة و تقفل التليفون و هي بتبكي.
____________

مرات اخو مها : يا أم وليد بلاش تعملي في نفسك كده.
مها : الواد يروح يكتب لها البيت كله دا يساوي فوق الخمسه مليون!
ليه علشان ايه من جمالها و لا مفيش غيرها في الدنيا!
مرات اخوها : يا اختي الواحد بيبقى قايد صوابعه العشرة شمع للراجل من دول و لا بيطمر فيهم و لا حتى بيفتكرونا بـ ورده.
مها نظرت لمرات اخوها : تقصدي ايه هو انتي مبتشبعبش كل الدهب اللي في إيدك دا و مش عاجبك.
مرات اخوها : نصه يا اختي جايباه من بيت ابويا و أنا جايه و بعدين اخوكي ما اخد ورثي و بعدين ضحك عليه بالغوشتين دول و قال يقولي المحل مبيشتغلش و أنا شايفاه بيشغي زباين قد كده كل دا علشان اسكت و مفتحش بؤي و اقوله رجعلي فلوسي.
مها : تصدقي انتي اللي مبيطمرش فيكي حاجه من نفس عينة مرات ابني تاكل من خيره و بعدين تنكر إنها أكلت و تقول مجوعني.
مرات اخوها : انتي جايه تشتميني في بيتي يا أم وليد؟!
مها : ما هو انتي اللي قليلة الأصل بقى بعد العز اللي شوفتيه عند اخويا بتنكري الخير اللي معيشك فيه و بعدين ورث ايه يا أم ورث الدهب اللي معاكي ضعف الورث بتاعك و روحي سعري الدهب دلوقت وصل كام.
مرات اخوها : معلش بقى الضيف يجي باحترامه ميجيش يقل أدبه على أصحاب البيت و إن كنت بحترمك فدا علشان جوزي و ولادي ما انتي في النهاية عمتهم لكن هتيجي تقلي أدبك يبقى تتفضلي توريني عرض اكتافك.
مها : وقعتك مهببه انتي بتطرديني من شقة اخويا؟!
مرات اخوها : اخوكي نفسه لو جه و سمع الكلمتين اللي ملهمش لازمه بتوعك دول كان طردك بنفسه اتفضلي بقى علشان مش فاضيه عايزة أعمل غدا الراجل زمانه جاي.
مها : بقى كده!
مرات اخوها : ايوه كده و اكتر من كده كمان و بعدين بطلي تطلعي للراجل فوق الراجل محترم و قافل على نفسه بعد وفاة مراته و عايش على ذكراها و مش ناوي يتجوز خلي بالك من صحتك بقى.
مها : انتي بتقولي الكلام دا لمين يا ست انتي؟!
مرات اخوها : بقوله ليكي و لا تكونيش فاكراني مش عارفه و لا فاهمه انتي بتفكري في ايه
الست نادين صحيح ماتت بس سايبه ذكرى كويسه كل اللي عارفها و اتعامل معاها يشهد بده
و كلامك عنها مش هيغير الحقيقة اللي كلنا عارفينها الراجل بيحب مراته و عمره ما بص لواحدة غيرها لإنها الصراحه تستاهل كل خير و بناتها اللي بتقعدي تشتمي فيهم و تعيبي على اخلاقهم دول عمرنا ما شوفنا منهم حاجه وحشه و إن كان ابوهم مش عاجبك فهما ملهمش ذنب خليكي في حالك يا أم وليد و سيبي الناس في حالها.
مها اخدت بعضها و خرجت من شقة اخوها اللي في الدور التاني في نفس العمارة.
مرات اخوها : عجايب! عايزة تقعد تغلط في الناس و نسكتلها و لما نيجي نقول الحقيقة تقعد تشتم و تغلط فينا احنا
بس ممكن تروح تقول لـ اخوها!
طب ما تقوله هو أنا كنت كدبت ما كل دا عيشناه و شوفناه بنفسنا و جوزي نفسه عارف اخته على ايه تروح تقوله و أنا كمان هقوله على الكلام اللي سمت بدني بيه.
___________