💕أنت قلبي٢💕

الحلقة ٦٧

#انت_قلبي٢
#بوسي_مصطفى
______________
الحلقة ٦٧

نزل محسن تحت...
يخبط على الباب.. تقوم نرمين.
اللي تتفاجئ بمحسن.
نرمين : محسن!
محسن : ايه شوفتي عفريت؟!
نرمين : لا شوفت اخويا.
اتفضل يا محسن.
محسن بيدخل و بيقعد : اقعدي يا نرمين واقفه ليه؟؟
نرمين : اعملك حاجه تشربها.
محسن : أني مش جاي اضايق.
اقعدي خلينا نقول الكلمتين اللي جايلك فيهم.
نرمين : خير!
محسن : الاول كده وقبل كل حاجه هسألك سؤال.
نرمين : اتفضل.
محسن : انتي فاتحه تحقيق ليه ل محمود ابني
ايه دخلك انتي راح فين وجه منين هو انتي مرته؟!
نرمين : لأ مش مراته يا محسن
بس لما يبقى ابن اخوك متعور
بسبب شوية عيال صيع زي ما قال مازن في التحقيق
و ناس تشوف ابنك كان قاعد مع العيال دي قبل ما
ابن اخوك يعدي من هناك ولما اسأل ابنك ينكر ده
يبقى لازم اقلق.
محسن : ابني يقعد مع اللي هو عايزة ويعمل اللي هو عايزة
يا نرمين انتي مش واصيه عليه
والكلام الخايب اللي بتقوليه دا كلام البت هنادي.
نرمين : أولا كده زي ما بدأت كلامك.. هنادي دي تبقي مرات اخوك وعيب اوي تقول عليها بت.
محسن : امال واد.. هي لو مش بت كانت عرفت توقع اخوكي
وبعدين مالك بتحامي عليها كده ليه؟!
دي بنت ستين......
حد يعرف عايشه في مصر منين و ازاي؟؟
ولا يكونش المرتب اللي بتاخده من الجامعه اللي شغاله فيها
دي بيصرف عليها وعلى عيالها
دا انا البت امينه عندي بتاخد درس بس في الشهر ب تلات تلاف جنيه واحنا اهو في ريف كمان مش مدينة يا بنت ابويا!
نرمين : طبعا أنت عايز تثبت ان هنادي أخلاقها وحشه
ب أي طريقة.
عايشة زي ما عايشه يا محسن
كانت جات خبطت على بابك وقالتلك هات جنيه علشان اربي ولادي..
ما تسيبها في حالها يا اخي
وبعدين هي ارجل من رجاله كتير كفايه إنها بتسمع كلامكم ده ولسه واقفه على رجلها مرمتش ولادها ليكم وقالت اشوف نفسي.. اضيع شبابي مع العيال ليه
وفي الاخر برضه محدش بيقول في حقي كلمة حلوة.
اهو يبقى معايا راجل علشان امنع كلام أهل زوجي في حقي.
ما تفتكر إن في يوم حساب
و كلنا هنتحاسب على كل كلمة تخرج من بؤقنا ولا عرض الولايه لبانه في بؤكم يا محسن
محسن : نهاية الكلام يا نرمين ملكيش صالح خالص ب ابني
سامعه ولا مش سامعه.
نرمين : لأ اسمع انت مني الكلمتين دول يا محسن علشان
لسه الكلام مخلصش
أنا هفضل زي الشوكه في زورك ل تخرجها وتستريح لا تبلعها وتخلص الناس من شرك.
محسن : بقى كده يا نرمين؟؟
نرمين : كده و أبو كده كمان
أنا مش هسكت ل أي حد يغلط في مرات طارق ولا يأذي
ولاد اخويا
وإن كان طارق مش بينا دلوقت ف أنا سداده واقدر أقف
في وشكم كلكم.
عارف هنادي لو ب الأخلاق اللي بتقول عليها دي وأنا عارفه إن دا كلام حتى نفسك من جواها بتكدبه وكفاية إنك تبقى عايش بتقول كلام انت عارف إنه كدب
علشان متأكدة إنك مش عارف  تعيش بسببه دا لو كان لسه باقي عنده ذرة ضمير.
مش هتكسرني يا محسن ولا هتقدر تكسر هنادي ولا ولادها
بخصوص موضوع محمود ابنك
فأنا بتمنى إنه ميكونش فعلاً له علاقة ب اللي حصل ل مازن ابن اخويا ما هما الاتنين ولاد اخواتي.
محسن : لا فيكي الخير يا حنينه.
نرمين : ايوه حنينه مع الناس الصح اللي بتمشي دوغري مبتحبش العوج لكن الناس التانية ببقى صعبه قوي
معاهم  علشان مبحبش الغلط.
محسن : طب حاسبي بقى لتعضي نفسك.
نرمين : لا متخافش أنا واخده بالي من نفسي قوي.
خد بالك انت بس من نفسك ومن ولادك.
محسن : ماشي يا دكتورة شكرا على النصيحه.
___________