💕أنت قلبي٢💕

الحلقة ٢٢

#انت_قلبي٢
#بوسي_مصطفى
__________

الحلقة ٢٢

أمام العمارة اللي ساكن فيها إياد
إياد : يا بشمهندس والدتك انا اشيلها فوق دماغي
بس الإنسان مننا له طاقة
وانا بصراحه خلاص طاقتي خلصت
واستحملت كتير
لكن اللي حصل الليلة دا كان صعب اوي.
وليد : انا فاهم كل دا وبقولك
انا اسف هاخد ماما عندي.
إياد : براحتك.
سعاد نازله ومعاها شنطة هدومها
سعاد : انت بتقوله ايه
انا مش هعيش في الزربية بتاعته اللي فوق دي
انا عندي بيتي ميحلمش حتى إنه
يقرب منه ولو حب بس يقرب
هكسرله رجله دي.
وليد : مفيش داعي للكلام دا يا ماما.
سعاد : انت تخرس خالص متتكلمش بتدافع عن مين
دا كان آخره يتجوز بنت الجيران في الحاره اللي كان
عايش فيها
ولا بنت سهير تتعطف وتقبل بيه
قبل ما تاكل بعقل اخوك وتوقعه
ما هو واختك ميحبوش اللي زيهم.
ولاد على بقى هنعمل ايه.
إياد : وليه الغلط دا بقى وتجيبي سيرة ناس معملتلكيش حاجه ليه؟؟
مش دي غيبه ونميمه برضو يا حماتي
ما تقول حاجه يا بشمهندس مش اللي جابت سيرتها
دي تبقي مرات اخوك ولا ايه؟؟
سعاد : و اشمعنه اتحمقت ل سهر
ما انا اتكلمت على الوقعه المهببه اللي وقعتها بنتي
ولا سيرة سهر والكلام عنها بيضايقك اوي كده.
ايه لسه مش عايز تنساها برضو.
وليد : لو سمحتي يا ماما بلاش
نتكلم في مواضيع فاتت
خلينا في اللي احنا فيه دلوقت.
سعاد : هرجع بيتي يا وليد
لا عايشه معاك ولا مع اختك
ريحوا نفسكوا مني بقى.
وليد : طب استني بس رايحه فين؟؟
هوصلك في طريقي اتفضلي اركبي.
طلع إياد شقته لاقي منه بتبكي.
إياد : بتعيطي ليه دلوقت
كنت طردت مامتك من بيتي؟؟
منه : لا يا إياد بس ماما صعبانه عليه
انا عارفه إنها بتتعصب كتير
وكلامها بيضايقك بس مهما كان دي أمي برضو
خايفه اوي يحصلها  زي اللي حصل لمامتك.
إياد : نعم !!
وايه بقى اللى حصل لمامتي؟؟
منه بحرج وهي بتمسح دموعها :
ماتت في الشقة لوحدها ملقتش
حد يسعفها ولا حد يشربها بق مياة.
إياد بحزن : ياااه وبتدوسي اوي على جرحي يا منه.
كأني أنا ظلمت مامتك
وكل اللي فات دا ولا كان له أي قيمه عندك.
منه : لا انت فاهم غلط
جميلك دا فوق دماغي
وانك تستحمل ماما في الظروف
اللي هي فيها وفي الحاله النفسيه اللي وصلت ليها
دي حاجه عمري ما انسهالك ابدا
بس خايفه عليها اوي.
ومش عايزة اعيش عمري كله بتأنيب الضمير
يعني بقول لو حتى شفنا شقة هنا ماما تسكن فيها وهبقي اشقر عليها من وقت للتاني.
إياد : وايه رأيك لما نبيع شقتنا ونروح نشوف في فيلا
جنب مامتك وتبقي قريبه منها.
اهو على الاقل متعيرناش إننا عايشين في زريبه !!
منه : انت بتريق يااياد؟؟!
إياد : ما هو انتي اللي كلامك مش منطقي
نشوف شقة فين والعمارة كلها مفيهاش شقة فاضيه.
ثم مامتك برضو مش هتسيبنا في حالنا
وبصراحه انا تعبت وعايز اعيش في هدوء.
عايزة تروحي لمامتك كل يوم تشوفي طلباتها وتطمني
عليها
معنديش مانع.
عندك العربية لو قضيتي يومك كل هناك برضو معنديش
مانع.
منه : والشغل والبيت والولاد وانت يا إياد؟؟
ولا عايز تريح نفسك مني؟؟!
إياد : انا احترت معاكي بصراحه
اعملي اللي تعمليه يا منه
تصبحي على خير.
_____________