💕أنت قلبي٢💕

الحلقة ٦٩

#انت_قلبي٢
#بوسي_مصطفى
_____________
الحلقة ٦٩

في التليفون 📞
نرمين : اهدي بس يا هنادي و أنا لو مجبتش حقك يبقى
ليكي الكلام.
هنادي : حق ايه يا نرمين؟
أنا مش عايزة غير إن اخوكي يحل عني.
مش فاهمه عملت ليه ايه هو و ابنه؟!
قعد يقول كلام كده مفهمتش منه حاجه.
و قالي إنه مش هيسيبني في حالي وكلام من ده.
قوليله يحل عني، بصي كلمي سعيد اخوكي هو يعني ماشي معاه اليومين دول بس اهون منه شوية، بيتفاهم عنه، قوليله كلم محسن وقوله يبعد عن سكة هنادي هي وولادها أنا سيبتلهم البلد خالص وهما مش عايزين يسيبوني في حالي ليه؟!
نرمين : سعيد مع محسن يا هنادي متحاوليش هما بقوا واحد ومصلحتهم مع بعض، متنتظريش إنه يقوله حاجه.
هنادي : هدى أخبارها ايه؟
نرمين : هدى و أهلها مصممين على الطلاق.
هنادي : ايه؟!
نرمين : ما هو اللي حصل صعب يتنسي ولا حد يعديه
يا هنادي.
هنادي : عندك حق، بس اللي خلاها تستحمل السنين دي كلها...
وسكتت هنادي..
نرمين : فاهمه انتي عايزة تقولي ايه، بس صدقيني الواحده بتقعد تستحمل لحد ما يجي عليها وقت بتبقى خلاص مش قادرة تكمل، سعيد من كتر ما هدى استحملت وعديت حاجات كتير
بقى فاهم إنه ضامنها في ايده، مهما يعمل هي خلاص مبقاش عندها شخصيه ولا كرامة دا بالنسباله، بس معملش حساب إنها طول السنين دي كانت مستحمله علشان خاطر ولادها، لكن لما تتهان وتضرب قدامهم بالشكل دا يبقى مفضلش ليها أي كرامة علشان تقعد وسط ولادها هناك، يمكن لما تعمل لنفسها شخصية ولو لمرة واحدة في حياتها، ولادها على الاقل يحترموها.
هنادي : عندك حق، هدى كانت شايله البيت كله، وأمه الحاجه كانت بتحبها قوي، وكان لما يجي أي حد الدار تقوم هي بالواجب كله، كانت تشيل الصغير والكبير
عمري ما هنسى وقفتها معايا، وخايفه ابقى أنا السبب في خراب بيتها.
نرمين : البيت اللي بالشكل دا كان مسيرة تبقى دي نهايته
يا هنادي.. خلي سعيد يفوق بقى.
هنادي : روحتي شوفتيها؟
نرمين : ايوه روحت هي طلعت من المستشفى امبارح على بيت ابوها قعدت معاها شوية ورجعت البيت اجهز شنطتي علشان مسافره بكره .
هنادي : انتي لسه قاعدة عندك؟؟
نرمين : هخاف يعني يا هنادي ولا ايه؟
هنادي : لا بس الاحتياط واجب، وائل مش جاي؟
نرمين : أنا اللي قولتله ميجيش علشان ميحتكش مع حد
من اخواتي وخصوصاً محسن انتي بس اهدي كده و متقلقيش هتسمعي اخبار كويسه قريب.
هنادي : يعني انتي متأكدة إن العيال دي هي اللي كانت هناك عند الكوبري وقت ما مازن ابني كان معدي من هناك؟
نرمين : اللي شافهم متأكد وعايزة اقولك إنه قال إن محمود ابن محسن اخويا كان معاهم
بس لسه هنتأكد مين فيهم اللي ضرب مازن ومين اللي مشى قبل التاني علشان يحددوا اللي ضربه بالظبط لإنه واحد بس اللي عمل كده.
هنادي : بتقولي إن محمود ابن اخوكي كان معاهم؟!
علشان كده متصل بيه وبيهددني.
نرمين : على فكرة علشان تعملي حسابك بقى هو هيستدعوا مازن مرة تانية علشان يتعرف عليهم.
هنادي : يتعرف على مين، ماهو بيقول الدنيا كانت ضلمه وشافهم طشاش كده.
نرمين : معلش هو برضه لو وصفهم على حسب ما قدر يتحقق من ملامحهم وجات مطابقه لكلام الولد اللي شافهم ويعرفهم يبقى هما العيال دي فعلاً.
هنادي : طيب مش عايزة أعطلك تصبحي على خير.
نرمين : وانتي من أهل الخير.
____________.