اما الذهب والنقرا كانو حدث ولا حرج ... المضام والسراتل والخواتم والحوالق والسلاسل .. لي بغاوها ولي عجباتهم كانت كاتحضر من هاد الناحية و ماكايجلسو فشي مجمع حتى كايكون باين عليهم النسا ديال عائلة الانصاري سوا من ذهبهم لي مزينهم سوا من حوايجهم لي كانو غير الفريع ديال الفريع ما عدا فيروز لي ماكانش عندها مع الذهب ولكن كانت كاتلبس النقرا المزينة بأحجار الفيروز والياقوت.
دخلات عندهم للصالون واحد المرا هازا معاها شلا شواكش كبار عاونوها فيهم جواد وطارق ... حطو داكشي وخرجو من تم مخليينهم يختارو فداكشي لي جابت المرا معاها من غير واحد 2 شواكش ماقاسوهمش حيت هادوك كانو خصيصا لزبيبة باش تختار منهم وهي مبعدة على الزحام ديال بنات العائلة بحكم هي العروس لي غاتخرج من دار الحاج قاسم الانصاري فهاد الايام
اما فيروز غير شافت المرا جات وجابت الشواكش ديالها مامشاتش للصيكان كاتتزاحم معاهم و انما مشات عنقات المرا لي كانت عزييزة عليها وهي لي عارفة علاش عزيزة عليها
شافت فيها وبادلاتها حتى المرا الشوفات كانو كايهضرو غير بالعينين وهي كاتنعت لها بجناب عينيها لواحد الشاكوش صغير اللور .. شافتو ومشات بزربة ليه وعلى شفايفها الكرزية واحد الضحكة خفيفة
مشات للشاكوش حلاتو ولقات التواب لي دييما كاتوصيها عليهم ... تواب فيهم الكاروات سوا كحل بيض سوا حمر و كحل ... تواب بويض ومنقطين بالكحل ... تواب لي كايليقو للستايل لي كايعجبها
جلسات كاتختار وتتختر وهي بعييدة عليهم .. ختارت داكشي لي بغات وتشهات ومشات طلعات لبيتها جبدات كاع تصاور لي قطعاتهم من شي مجلات وخشاتهم وسط التواب وزادت جبدات الفلوس نيييت داكشي ديال السخاا والسخاوة وحتى هما خشاتهم وسط الحوايج وهبطات لعند المرا .. عطاتها التواب وتبسمات ليها وحتى المرا بادلاتها الابتسامة وخشات دوك التواب فبلاصة بعيدة على لاخرين باش من بعد تفصلهم لها وتخيطهم
بقاو كايتخاطفو على التواب و شي كايقول انا بغيت هدا وشي كايقول انا بغيت لاخر وشي كايتخاصم على شكون لي ختار التوب اللول اما فيروز ماكانش غرضها فداكشي حيت ماشي بزاف باش زارتهم وختارت التواب ديال القفاطن وتكاشط لي بغات .. دابا بقات كاتشوف غير فالشرابل لي جابت
ختارو وجمعو وطواو كيما جمعات السيدة الوقفة وجمعات شواكشها وخرجات لبرا تخلصات من الحاج و زادت فحالها مخلية النسا وراها شي مجمع وشي فالكوزينة وشي ضاير بزبيبة اما لالة فخيتة كانت كاتلبس عليها باش تخرج هي وواحد من ولادها ويمشيو يجيبو الحوايج لي بقاو لزبيبة ولكن ماجات فين تخرج حتى كانت فيروز تلقات لها فالباب
فيروز : [ بنبرة ترجي ] ا مّا خليتي نخرج معاك غا هاد لمرة يرحم يمااك ا مّا ضاروري
لالة فَخيتة : [ جمعات حواجبها فبنتها ونطقات ] و علاش خصك دخرج؟
أنت تقرأ
زوجة الكولونيل / 𝐂𝐎𝐋𝐎𝐍𝐄𝐋'𝐒 𝐖𝐈𝐅𝐄
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
