زوجة الكولونيل / 𝐂𝐎𝐋𝐎𝐍𝐄𝐋'𝐒 𝐖𝐈𝐅𝐄

PART 23

من زهرها المسݣد ما طاحت ديك الهضرة لي قالتها غير فودنين فاروق لي شاف بلي خداو الوقت باش يدويو فيه وفبلاصة ماتبان بلي جاوبات باش تبرد العافية لي شعلها فيها عِز بانت بحالا هي لي باغا تشعل ديك العافية بلسانها ... هضرتها لي من ديما كاتقولها والنفور ديالها من هاد الزواج لي من دييما كاتوريه لهم ماخلاهش يفكر بلي كان سبب حتى قالت للسيد ديك الهضرة

فاروق : فيروز خرجي شوفي مك اش خصها

شافت فعِز بنظرات غاضبة وخرجات من تما كاتزرب فخطاويها ماقاداش تزيد دقيقة معاه فنفس البلاصة

فاروق : ماتديش على هضرتها ، ولفات والدار وجدي وفشوشو وخايفة نهار تتزوج ماتلقاش العيشة لي عايشاها هنا

مد يدو جهة الطبلة وهز ديك البواطة رجع خشاها فجيبو
عِز : مع الوقت غاتوالف

فاروق : وا دوز تتغدا ا بن عمي الغدا غايتحط

عِز : الخبار فراسك ا بّا فاروق الوقت عندي تزيرات ، جيت هاد النهار نرصي معاكم اش كاين بلا مانزيدو نخليو هادشي يطول

فاروق : وا شنو غانݣول لك ، طريق السلامة وبيناتنا التيليفون حتى نديرو انا وياك شي قهيوة وندويو من بعد

عِز : ان شاء الله

خرجو من تم ومشا ودعهم وخرج في حين عائلتو كانت باقا غاتبقا تما باش يرصيو كتر الامور ، خرج ركب فالطوموبيل وجبد ديك البواطة حل المجر ديال الطوموبيل ولاحها فيه عاد تحرك من تم شاد الطريق للحسيمة اما هي فهاد الأثناء غير خرجات من بيت الجلاس مشات طلعات دييريكت للبيت ديالها وسدات عليها الباب ومشات ديريكت تلاحت فوق ناموسيتها دافنة راسها فمخدتها

طلقات الحرية لدموع الغضب والحݣرة لي حاسة بيها باش يهبطو وبداو كايضورو شلا حوارات فراسها ... اليوم زادت توضحات لها الصورة على العيشة لي غاتعيش معاه .. كاتشوف راسها ببساطة غاتعيش مع واحد لي الهضرة ايلا قالتها خاصها تعرف اش قالت فيها حيت طال الزمان ولا قصار غايجبدها غايجبدها لها ، واحد الراجل لي واقيلا حتى الضحك والتقشاب ماكايقشبش ، قشابتو مضيقة وماكايعرفش يهضر هضرة 2 كايمد يدو .. ومن الفوق واحد السفالي منو ما كان

هي الهضرة معاه هي اللخرة ماكاتقدش تهضر بقا غير تعيش معاه وتخليه يقيسها كل ليلة؟؟ بقا غير تعطيه راسها وتقبل يتسد عليها وعليه فدار وحدة؟؟

كيفاش من الاساس غاتقدر تعيش مع واحد لي موحال حتى واش غايجي شي نهار يشاورها ويتشاور معاها فشي حاجة؟ كايعرف يا يأمر يا يدير لي قال ليه راسو ... الفاتحة تهزات عليها وماقالش مع راسو خليهم يشاوروها واخا غير بلعاني كاع

كيفاش قال لها شهر ونص وغاتمشي لعندو؟ معامن قرر نهار العرس؟ وفين الخطوبة؟ وفين الصداق لي خاصو يتفاهم معاها عليه؟ وفين شروطها؟ واش هو غايتزوج بيها هي ولا غايتزوج بجدها وباها وخوتها؟