جمعات و طوات الهضرة مع راجلها وهو ناض خرج يشوف شي شغال عندو اما هي لبسات عليها و شدات الشيفور ديرييكت لعند بنتها
× عـنـد أفـنـان ×
جالسة فالمعمل ديال الزرابي التقليدية و تحت يديها 30 مرا و شابّة كايخدمو الزرابي .. عادةً ماكانتش موالفة كاتجي بزاف وحتى فاش كاتجي ضروري ماكايوصلها يا باها يا واحد فخوتها يا مها فاش كاتجي مع الشيفور واخا ماكانش بعيد بزااف على الدار و حتى ايلا جات غيير باش تطل عليهم و على الخدمة ولا فاش كاتكون شي زربية سالات و خاصها توقف عليها حتى يشدوها ماليها .. كان شرط محمود وااضح ياش يخليها تخدم ببساااطة تتعامل غير مع العيالات باش يتفااادى ديك الهضرة لي تقدر تجي عليها ولا الباطل لي يتلاح عليها اما فاش كايكون شي راجل كايتعامل معاه هو نييت و يجمع و يطوي.
تمّات خاارجة من المعمل من مور ما عرفات رقية جات لعندها بالشيفور تديها وهي عااارفاااها علاش جات هاد النهار .. هاد المشي و المجي من نهااار عرفو ولد المرتضى غايخطبها و هو كاااين .. من دااابا بدات توججد ليها فشنو غاتلبس فالخطبة شنو غاتلبس فليلة الحنة شنو غاتلبس فالعرس باااغا تطللع بنتها أمييرة لي يشووفها يقول وا معذرووو مايبغي يزيدها على ديك اللولة لي عندو
رقية : اجي ا بنيتي اجي
أفنان : هانا عاد ساليت [ مشاو عينيها لشي تواب اللور ] باقي ماهداكش الله ا يمّا تحبسي هادشي؟ كل سيمانة تفاصل جداد؟
رقية : عندي جوج عويينات نتي وختك الصغيرة ايلا مافرحت بيكم بيمن غانفرح انا ا دوي؟
أفنان : [ ركبات الصمطة ونطقات بنبرة هادئة ] تسناي غير يوصلنا شي خبار نعرفو غير علاياش باقيين ناويين و يكون خير إن شاء الله
رقية : ا بنت كرشي ولي حملت بيهااا 9 شهوور وسبوعها مادار بحالو حد فالمدينة واش ناوية تباني فخطبتك صفرة حالتك؟؟ تماا فين خاصك ضربي الدقّة العين ذواااقة والراجل فالشوفة اللولة غايشوف زينك ولي عندك هانا معاك و حناك حتى هي معااك
قلبات وجهها للشرجم كاضحك فخاطرها على اخر هضرة قالتها رقيّة .. حناها ها هي معاها فِعلًا و لكن ديك الطريق لي ناوية لها علييها و باغا تمشييها فيها ماشي هي لي غاتشد .. ماغاتشدش طريق حناها لي كانت كاتجري باش تكسب حب جدها حتى نسات حياتها و راسها و إنما ببساطة غاتشد الطريق لي باغا هي معاه ولي غاتسلكهاا هي معاه حتى توصل لداكشي لي ماقداتش توصل ليه حناها فدوك السنين .. كي كايقولو لي جرب المجرب عقلو مخرب و ها هي بداات تشق فطريقها دقّة دقّة إبتداءً من مرات شريك عِز لي راها على تواصل معاها فالتيليفون من ديك الليلة
أفنان : [ ضارت لعند مها وبتاسمات لها بهدوء ] ان شاء الله ا يمّا
° فـفـيـرمـة الأنـصـاري °
أنت تقرأ
زوجة الكولونيل / 𝐂𝐎𝐋𝐎𝐍𝐄𝐋'𝐒 𝐖𝐈𝐅𝐄
Romanceهو : تَبْتَغين من غضبي الخمود ... وتأملين أن أضع أصفاد لأسد غيرتي بينما أرى حولك من الرجال حشود ... تستقصي من زئيري الجُمود ... ومن ردود أفعالي الخمود ... بينما تجوبين دروب الفجور بأنوثتك الفاتنة ا ولا تعلمين أن الفتنة أشد من القتل وأن حكم الفتنة هو...
