အခန်း (၅၄၂) : ဆေးပညာပြိုင်ပွဲ၏ နေရာ
“ ခင်ဗျားက စီနီယာအစ်မဝမ် မလား ” မိုဝူကျီက အံ့အားသင့်သွားပြီး ပျော်ရွင်သွားကာ တစ်ဖက်မှ ခုံကို ပြလိုက်ရင်း
“ စီနီယာအစ်မဝမ်ရော ဒီယုံရင်အင်မော်တယ်မြို့ ရောက်လာလားဆိုပြီး မေးနေတာ ”
ဝမ်လျန်ရှီး၏ စိတ်လှုပ်ရှားမှုမှာ အနည်မထိုင်သေးသော်လည်း မိုဝူကျီအပေါ် သူမ ပြုမူဆက်ဆံခဲ့သည့် အကြောင်းကို အမှတ်ရလိုက်သည့်အခါ မျက်နှာမှာ နီရဲကာ ရှက်သွေးဖြာလာမိသည်။ သူမက မြန်မြန် နှုတ်ဆက်ကာ
“ ဆေးလုံးဆရာမို .... ကျမကို စီနီယာအစ်မလို့ မခေါ်ပါနဲ့ ။ တကယ်လို့ ကျမကို လေးစားတယ်ဆိုရင် လျန်ရှီးလို့ပဲ တိုက်ရိုက်ခေါ်လို့ ရပါတယ် ”
“ ဟုတ်ပါပြီ .... လျန်ရှီး ထိုင်ပါဦး ”
မိုဝူကျီက ကျင့်ကြံခြင်း ဝါစဉ်အခေါ်အဝေါ်များကို စိတ်ထဲ မထားပေ။ သူက ဝမ်လျန်ရှီးထက်ပင် အဆင့်အတန်း မြင့်နေသေး၏။ အခေါ်အဝေါ်အရ သူက သူမကို လျန်ရှီးဟု ခေါ်၍ သင့်တော်ပေသည်။
ထိုအရာကို ကြားပြီးမှ ဝမ်လျန်ရှီးကထိုင်ကာ
“ ဆေးလုံးဆရာမို ... အဲဒီအချိန်တုန်းက ရှင့်ကို လူလိမ်တစ်ယောက်လို ထင်ခဲ့မိတာ ကျမ ကန်းနေခဲ့လို့ပါ ”
မိုဝူကျီက ခဏတာ တွေဝေနေပြီးနောက်
“ တကယ်တော့ ခင်ဗျား မမှားပါဘူး။ ကျုပ်ကလည်း လိမ်ညာမိခဲ့တာကိုး ”
“ အာ ...” ဝမ်လျန်ရှီးက မိုဝူကျီကို တအံ့တဩ ကြည့်လိုက်သည်။
မိုဝူကျီက ရှင်းပြလိုက်သည်
“ အရင်တုန်းက ကျုပ်က ထိပ်ဆုံး အဆင့် ၃ ဆေးလုံးအကြီးအမှူး ဖြစ်နေလို့ အဆင့်နိမ့် ဆေးလုံးဘုရင်လို့တောင် ယူဆလို့ ရတယ်။ ဒါပေမဲ့လည်း ကျုပ်က အဆင့် ၉ ကောင်းကင်ဆေးလုံးဆရာဆိုပြီး ညာခဲ့မိတယ် ”
မိုဝူကျီက ယခု သူ့စကားမှာ အလိမ်အညာဖြစ်ပြီး ယခင်ပြောခဲ့သည့် စကားမှာ အမှန်တရားနှင့် ပိုနီးစပ်ကြောင်း ကောင်းကောင်း သိထားသော်လည်း လိမ်ညာရုံမှ အပ တခြားရွေးချယ်စရာ မရှိတော့ပေ။ အကယ်၍ သူ မလိမ်ညာလျှင် ယုံရင်အင်မော်တယ်နယ်မြေ၏ ဆေးပညာပြိုင်ပွဲ၌ အရည်အချင်း ထုတ်ပြသည့်အခါ ပြဿနာ ဖြစ်လာလိမ့်မည်။
![လူသားသစ္စာ [BOOK 5 ( 501-700) ]](https://img.wattpad.com/cover/243165571-64-k190213.jpg)