حب في الثانوية

chapitre 22

غدوة الصباح نضت عينية منفخين من البكا . شفت روحي في لمراية تقول عليا عندي جنازة لبست قشي وخرجت من الشمبرة لقيت ماما توجد في الفطور مهدرتش معاها راح نخرج قاتلي ارواحي تفطري قتلها لا راني رايحة قاتلي ارواحي علابالي بيك متغششة كي ضربتك لبارح بصح راني في مصلحتك قتلها تهدري على مصلحتي وانتي même pas سمعتيني قاتلي صح عندك الحق ارواحي اقعدي واحكيلي دك نسمعك قتلها دوك راح لحال راني رايحة نقرى . خرجت من الدار طريق كامل وانا نبكي على خاطر غاضتني تاع الصح انو ماما تضربني وتصدق الناس وانا متصدقنيش . وصلت وين الليسي لقيت جلال وشروق سلمت عليهم قالولي وشبيها حالتك هك قتلهم ماما ضربتني قالولي وعلاه حتى ضرباتك قتلهم بسبت شهرة حكيتلهم وش صرا من اول الاخر . جلال ناض يعيط ويدابز فيا قالي يخي قتلك اخطيك منو راح تجيك غير المشاكل من تحت راسو ،قالي قوليلي دوك وش راح ديري شهرة امبوسيبل تنسى وش صرا لبارح ومش راح تخليك في حالك قتلوا دوك نجبد روحي ومبقيتش ندور بيها أصلا هي المشكل تاعها الكل هو آدم ادا مبقيتش نحكي معاه دوك تخطيني قاتلي شروق جلال عندو الحق اخطيك منهم وركزي مع قرايتك ديجا مش راح تقدريلها هديك العقرب المسمومة تاع شهرة قادر ديرلك مشكل تحصلي فيه قتلهم عندكم الحق مع دخلنا لقيناهم واقفين مع بعض ، شفتو كيفاه خزر معايا ودور وجهو بقيت واقفة في بلاصتي حسيت روحي راح نبكي هي لي حڨرتني وزيد من فوق جا في صفها هي قالي جلال هيا حكمني من يدي ومشينا .
فات شهر وادم ميهدرش معايا كل ما يشوفني يدور وجهو عليا ، أصعب فترة فاتت عليا كرهت كلش حتى القراية كرهتها كنت نهار نروح ونهار منروحش . كانت الحاجة لي مصبرتني هي جلال وشروق كانوا نعم الاصحاب كنا نعديو نهار كامل وحنا مع بعض حتى في الدار نقعدو نهدرو مع بعض . ليوم يخرجو المعدلات هبط لليسي مع جلال وشروق ، لقيت روحي ديت 16 تحضنتني شروق قاتلي مبروك عليك قتلها يبارك فيك . مي مقدرتش نفرح تفكرت نهار لي قالي لازم انتي لي تجي لولة ، جيت انا لولة بصح هو ميهدرش معايا بقات الدمعة في عيني ، شافني جلال بلي راح نبكي حكملي يدي قالي مش راح تنساي انتي تعدبي في روحك على واحد عايش حياتو ومش سامع بيك . قالي دوري شوفي لي تبكي عليه . درت لقيتو مع شهرة ومعلم واحد اخر يحكي ويضحكو وشهرة مرة على مرة تحكم في يدو مرة تحط يدها على كتفو . في اللحظة هادي كرهتوا على قد حبي ليه كرهتوا
قاتلي شروق انساي صاي ، ان شاء الله تلقاي واحد يحبك ويموت عليك خير منو. قتلها أنشاء الله . قالنا جلال ملا هيا ليوم نديرو خرجة على حسابي لازم نديرو journée inoubliableقتلهم نعيط لماما نسقسيها . عيط لماما قتلها راني رايحة مع شروق لسونر فيل نحوسو ونتغداو قاتلي روحي بصح مطوليش قتلها ok , رحنا حوسنا وتغدينا رحنا للبارك وسينما وصلت الربعة قتلهم انا نروح قالولي زيدي شوي وروحي قتلهم ok كملنا حتى وصلت الخمسة ونص جبدت  التلفون باه نشوف الساعة لقيت ماما حرقت التلفون بالعياط ، انا راح نعاود نعيطلها طفى التلفون بيسك طاحت الباتري  . قلت ما نعيط ما والوا ديجا راني مروحة . شروق وجلال روحو مع بعض بيسك يسكنو في نفس البلاصة مي انا قعدت نستنى في البيس يجي كان  واقف مقابلني واحد الجان من وصلت و هو يخزر معايا مقيمتوش ، شاف الحالة شوي فرغت قدم عندي قالي وش الزين متقيميش انا متت بالخوف ، بعدت عليه محكيتش معاه زيد قدم عندي قالي يا سمرة يا زين القمرة اعطيني النميرو . قتلوا منمدش واحشم على روحك يزي ما تتبلى في بنات الناس . ضحك وقالي واعرة بصح حتى انا تعجبني الواعرة ،انا نشف الدم في عروقي من الخوف . شافو واحد الراجل من لبعيد جاء عندو قالوا واش كاين هنا قالوا هداك الجان وش دخلك انت قالوا كفاه وش داخلني من بقيل وانا نشوف فيك تتبلى في الطفلة . بقاو من كلمة الكلمة حتى نشوف في هداك الجان جبد موس في اللحظة هديك كبرة العركة بيناتهم وناس تفك فيهم  انا من الخلعة جمدت في بلاصتي بيسك العركة الكل صرات في جرتي انا .بقات الناس تفك بيناتهم حتى جاو لابوليس قالولهم وعلاه حتى تعاركتو نطق الراجل قالوا لقيتو يتبلى في الطفلة جبد عليا الموس . خزر معايا البوليسي قالي صح وش قال الراجل قتلوا ايه صح قالي وش قاعدة ديري وحدك في الوقت هدا قتلوا مروحة قالي قداه في عمرك باينة فيك صغيرة  قتلوا 16قالي ايه  mineur ومع من كنتي قتلوا مع صحاباتي قالي هيا معايا  قتلوا وين نروح قالي تجي معايا للقسم حتى يجي ولي امرك قتلوا تعيش خليني نروح برك قالي هيا معايا لازم نهدر مع ولي امرك . طريق كامل وانا نبكي شوي من الخلعة شوي من الخوف . وصلنا للقسم قالي اعطيني نيمرو تاع واحد من الاهل تاعك نعيطلو . عطيتو نميرو تاع خويا محمد  . بقينا نستناو فيه انا نبكي قلبي راح يخرج من الخوف وهداك البوليسي محبش يسكت بقا يلوم فيا على كيفاه نبقى وحدي لبرة للوقت هدا حتى نشوف في محمد خويا دخل هو ومن وراه آدم .انا شفتو وانا تمنيت ندخل تحت الأرض .