حب في الثانوية

chapitre 73

دخلت لبست قشي وخرجنا ركبنا في الطونوبيل روحنا طريق كاملة وانا نطيح في الدموع  . وهو كل دقيقة يخزر معايا  حتى نطق  قالي علاه راكي تبكي دوركا فهميني   كي كنت نقولك  روحي اقعدي في داركم تقوليلي لا ودوركا كي جيت نروحك راكي تبكي ، كان يهدر ويعيط  . خزرت معاه وقتلوا صاي يزي من لعياط . مسحت دموعي  دورت وجهي نتفرج من التاقة . حتى هو كمل يسوق ساكت حتى وصلنا . دخلت سلمت عليهم وطلعت للداري لفوق  كنت متحلفة كون يقولي كلمة برك ولا يغلط يقولي وش راكي ديري هنا الدار نقلبها على راسوا . بدلت قشي لبست غوب قصيرة خاطر وليت نلقى راحتي غير في لي غوب  ودخلت للكوزينة قلت خلي نوجد عشا خفيف . غير شفتوا دخل بقيت نستنى فيه يهدر ويقولي اهبطي اقعدي لتحت ، بصح فات للصالة وقعد ساكت ماقال حتى كلمة ، بقى شي ربع ساعة ودخل الكوزينة قالي ماكلاه طيبي لعشا دوك نخرج نشري من برة    . درتلوا براسي ايه وسكتت حتى انا مش قادرة نوقف ونطيب . هو خرج وانا رجعت للشمبرة غطيت راسي ورقدت  علابالي يطول برة  .
فطنت وقت لي دخل بقا ينوض فيا قالي ريجا هيا نوضي تتعشاي . قتلوا خلي برك راني شبعانة.  قالي لا نوضي تتعشاي خير وارجعي ارقدي . نضت مبقيتش نحب ناقشوا  خلاص وش يقولي ندير وفرات منيش حابة نتعاركوا ، خاطر تاع الصح عييت من المشاكل ولعياط ولعراك . دخلت للكوزينة لقيتوا وجد كلش وحط لعشا فوق الطابلة قعدت ناكل بالسكات حتى هو قعد ياكل ساكت . غير كملنا جيت راح نهز لماعن باه نغسلهم قالي خلي برك روحي ارجعي ارقدي دوك نهزهم انا .غير رجعت حطيت راسي على المخدة رقدت خاطر عندي نهارين مرقدتش مليح.  غدوة الصباح نضت لقيتوا يوجد في روحوا باه يروح يخدم . صونا الباب راح فتح لقاها دنيا. كي سمعتها تسقسي عليا .قتلها دنيا ارواحي . دخلت عندي سلمت عليها. قاتلي هيا وجدي روحك باه نروحوا نشروا لي غوب كيما تفاهمنا . قتلها لازم نروحوا ليوم ، قاتلي علاه . قتلها ليوم منيش قادرة خلي غدوة ولا ادا حبيتي روحي برك أصلا انا عندي وش نلبس مش لازم نشري غوب جديدة . قاتلي بصح ياك تفاهمنا تروحي معايا علابالك بيا منعرفش نخير وحدي . قتلها منعرف مشكيتش لكان نقدر ندور بزاف شوفي رجليا ديجا راهم منفخين . قاتلي نورمال مندوروش بزاف غير ليه ليه نشري غوب ونروحوا . قتلها صاي دوك نروح معاك ، بصح روحي سقسي آدم قوليلوا اريج راهي رايحة معايا. راحت سقساتوا جا عندي قالي روحي على روحك بصح راح تقدري تمشي هكدا رجليك منفخين . قتلوا مراحش ندورو بزاف قالي خلاص روحي وكي تعودوا مروحين  عيطولي نروحكم . قتلوا ايه . جبد صوارد من الجيب عطاني قالي هاكي  اشري وش يعجبك . قتلوا خلي برك مراح نشري والوا . قالي احكمي قتلك، حكمتهم عليه ، زاد عطا لدنيا . قالي هيا تلهوا في رواحكم كشما حاجة عيطولي قتلوا ايه . خرجنا دورنا وشرات دنيا غوب وكلش الخطبة انا ما شريت والوا معجبني حتى شئ . غير كملنا قتلها عيطي لآدم يجي يروحنا راني ميتة بالعيا.قاتلي علاه نعيطوالوا هيا نروحوا وين يخدم خير راه قريب من هنا برك . قتلها صح . قعدت تضحك قاتلي اول مرة نشوف وحدة متعرفش راجلها وين يخدم ارواحي نديرولوا سوربريز . وصلنا بقيت نشوف فاتحة فمي الله يبارك كانت شريكة كبيرة كاملة بالزجاج . قتلها هادي تاع آدم . قاتلي ايه علاه راكي حايرة هكدا . قتلها في بالي عندو l'usine برك. قاتلي لا لوزين بعيد شوي بصح هو يخدم كلش من الشريكة هنا . بقيت فاتحة فمي كي البهلولة وانا معلاباليش بلي راجلي عندو هاد الخير كامل ، ضحكت على روحي ، دخلنا ستقبلتنا وحدة تقول عليها باربي ، عرفت دنيا خاطر موالفة تجي هنا . طلعنا في لاسنسور وانا غير نتفرج ونشوف مع الأشكال لي تخدم هنا يبانوا كل خارجين من الفترينة ولا من مجلة تاع الموضة وش من لبسة الميني والحطة والروايح والصبايغ والشعر مطلوق . بقيت نقارن في روحي معاهم وانا لابسة هداك الحجاب وفوقوا المونطو الطويل والبوتس لا طالوا لا مكياج . جسمي كامل مكعبر من الكرش . دخلنا البيرو تاعو لقينا السكرتيرة تاعو بقيت نخزر معاها وانا حاسة بالغيرة راجلي عندو سكرتيرة كيف هادي وانا لا خبر . قالتنا مرحبا بيكم ، وخزرت مع دنيا قالتلها دنيا لاباس . رجعتلها دنيا . وبقات تشوف معايا . انا من الغيرة قتلها راجلي هنا . قاتلي نعم شكون راجلك . قتلها آدم راجلي حبيبتي . حسيتها تصدمت قاتلي اه اسمحيلي ايه راه هنا بصح عندو شكون معاه . قعدنا نستناو في لي معاه يخرج باه ندخلوا عندوا . وهي نشوف فيها كل دقيقة تطلع  راسها تخزر معايا حايرة . بصح عندها الحق تحير باينة راهي تقول وش عجبوا فيها حتى تزوجها . خرج الراجل من عندو . قالتنا تقدروا تدخلوا . دخلنا عندوا   وانا باقية غير نشوف في هداك البيرو وهديك الحطة . غير شافنا وقف حسيتوا فرح وقالنا وش هاد السيربريز الهايلة . قدم باسني على خدي وسلم على الدنيا  . قعدنا في الفوتاي . قالنا كيفاش حتى جيتوا عندي . قاتلوا دنيا كنا فايتين من هنا قلنا خلي نجيوا عندك ونروحوا . قالنا ايه درتوا مليح  ، استناو شوي برك نكمل الخدمة لي في يدي ونخرجوا  . رجع قعد في البيرو وكمل يخدم بالميكرو . انا غير نشوف منيش مصدقة ههههه راجلي عندو الشئ هدا كامل وانا معلاباليش . بقينا شي نص ساعة وكمل . هز حوايج تاعوا وقالنا هيا  نخرجوا راني كملت . قدم حط يدو على كتفي واليد لخرى على كتف دنيا وخرجنا ولي يشوفونا يقعد يخزر معانا وهو يحكي مع دنيا ويضحك  . من بعد كي شافني ساكتة  قالي وشبيها البطة تاعي ساكتة تعبتي؟؟؟ .  ضحكت دنيا قاتلوا اريج  راهي حايرة برك مسكينة معلابلهاش وين راك تخدم . ضحك ولز عليا في حضنو . خرجنا وركبا في الطونوبيل قالنا مدام جيتو عندي ليوم راح نكمل معاكم التحويسة . دخلنا للريسترو تعشينا ومن بعد دانا للبحر تمشينا شوي وروحنا . انا غير وصلت دخلت دوشت وخرجت قعدت قدام الكوافاز نمشط في شعري ونخمم عندو الحق يقولي نطلقك ونعاود الزواج وش نبان انا قدام هدوك لي يخدموا معاه كل يوم وهو يشوف فيهم بالميني والمكياج والطالوا ويروح ليا انا هنا يلقاني كرشي قدامي لا مكياج لا والوا ديما بالبيجامة ولا جبة . وليت جبدت المكياج وبديت نمكيج حتى كملت . من بعد فتحت لخزانة نشوف وش نلبس حتى لقيت شورط تاع دجين قصيرمع تريكو تاعو يجي لنص كرشي ملڨري بسيف ما دخل فيا بصح معليش . وطلقت شعري بعد ما شاح عاد كيرلي كامل . وبقيت نشوف مع روحي ايه جيت شابة بصح فزدت عليا غير الكرش برك سينو راني نجي خير من هدوك لي شفتهم . دخل شافني بقا يخزر قالي راكي نايضة نحساب رقدتي من التعب.  قتلو لا مزلت نايضة مجانيش النعاس . فات للسرير وتكسل وشعل التلفزيون حط فيلم يتفرج . وانا بقيت ندور قداموا زعما باه يشوفني يقولي راكي جيتي شابة ولا أي كلمة بصح هو والوا تقول عليه مشافنيش . رحت قعدت في السرير قداموا وربعت رجليا وقعدت نتفرج معاه وكل دقيقة نشوف معاه اسكوا راهو يخزر معايا ولا لا بصح هو تقول حجرة من لي حط عينيه في التلفزيون مشافش فيا خلاص . قعدنا ساعة وحنا نتفرجوا لا هو نطق لا أنا نطقت حتى نعست مفقتش لقيت روحي غفيت وانا قاعدة ، حسيت بيه كي بقا يعدل فيا باه نرقد . بصح هداك تريكو والشورط خنقوني أصلا لبستهم في الباطل السيد ما شافش حتى فيا . بقيت كل زوج دقايق نتقلب تخنقت ، فاق بيا  بقا يضحك قالي كي راهم صغار عليك ومزيرين عليك علاه تلبسي فيهم . هديك التبهديلة لعبتها مزلت راقدة ، وقف راح للخزانة جابلي غوب قصيرة وعريضة . هز لمقص وجا قعد بجنبي قالي هدا تريكوا امبوسيبل يخرج نورمال . قطعوا بالمقص زاد كمل قطع الشورط ولبسلي الغوب . كمل باسني وقالي ارقدي دوركا .