حب في الثانوية

chapitre 46

فقت من نوم  حليت عينيا لقيت  دنيا مزالت ظلمة و آدم راقد بحدايا حاطلي راسي على دراعو ورجلوا فوق رجليا . خزرت مع الساعة لقيتها الثلاثة تاع الصباح . رجعت  ، خزرت مع آدم كي يعود راقد شحال يبان كيوت. وعاقل كيف دراري الصغار ،  .قدمت بستو على فموا  .قتلوا آدم ، قالي اممم ورجع رقد . عاودت بستوا على دراعوا قتلوا آدم حبي نوض . فتح عينيه قالي ريجا علاه نايضة درك كشما بيك . قتلوا ما بيا والوا جعت برك . قالي روحي كولي راني خليتلك لعشا في الكوزينة . قتلوا نخاف  نروح وحدي هيا تجي معايا. كان يهدر بالنوم  قالي حبيبي  روحي برك من واش تخافي . قتلوا وانا وين نعرف قادر يخرجلي غول من الفريجيدار . ضحك قالي والله ضحكتيني وش من غول يهديك ربي . قتلوا هيا برك تجي معايا راني نخاف . قالي هيا يا سيدي  . رحنا الكوزينة هو قعد فوق الطابلة ونعاس طايح عليه وانا بقيت نسخن في الماكلة . حطيت وقعدت ناكل نشوف فيه قريب راح يرقد قتلوا وشبيك نعسان . قالي نعسان ميت   حاب غير نرقد  . كملت كليت شبعت هزيت الماعن . رجعنا للشمبرة هو دخل ديراكت الفراش رجع رقد . وانا قعدت نبدل في قشي لبست بستي وشورط . ورحت دخلت في الفراش قعدت نتقلب   طار عليا نعاس على خاطر رقدت بزاف لعشية. شفت مع آدم وقدمت عندو بستوا  قتلوا آدم قالي اممم .قتلوا طار عليا النعاس . جبدني لحضنو ، قالي ارواحي برك في حضني دوك ترقدي . دارني في حضنو ورجع رقد . قتلوا آدم  حبي نوض اقعد معايا . قالي اريج راني نعسان خليني نرقد قتلوا لا نوض اقعد معايا حتى نرقد نخاف نقعد وحدي . مرجعليش عرفتوا رجع رقد بقيت نبوس في وجهوا ونوض فيه . قالي ريجا خليني نرقد . قتلوا لا نوض اقعد معايا هيا حبي تعيش نوض . قالي والله كون نوض ليك تندمي . رجعت نبوس في صدرو . قتلوا نورمال المهم نوض قلقت وحدي . مفقتش حتى كيفاه قلبني تحتو وهو فوقي قالي ما تلومينيش على وش راح ندير فيك انتي لي نوضتني . قتلوا وش راح دير ، قالي دوك نقولك وش راح ندير . بقا يبوس فيا حتى دخلنا في عالمنا الخاص جبناها حتى الخمسة تاع الصباح . كي كملنا جبدني لحضنو قالي نحبك . قتلوا وانا نموت عليك .
كملنا شهر كامل هكدا في الليل نباتوا نايضين مع بعضانا  وفي النهار يخرجني يحوس بيا ويدللني  ملڨري مرحتش voyage de noces بصح كان احلى شهر في حياتي .

في الليل كنا مع بعضانا غير كملنا جبدني لحضنو وبقا يحكي معايا  بصح انا منيش معاه حاسة روحي مش نورمال قلبي يخبط فوق العادة وجسمي كامل يوجع فيا حتى من رجليا ويديا نحس فيهم مخدرين عليا  ، هيا صح موالفة تصرالي من نكون معاه ونخلصوا نبقى فشلانة  وتعبانة  ، بصح ليوم حسيتها زادت عليا  . فاق بيا بلي مانيش معاه . قالي وشبيها حبيبي . خزرت معاه كنت راح نقولوا من بعد قلت خلي نقول لماما خير بلاك تكون حاجة نورمال . وليت  قتلوا والوا تعبانة برك . قالي هيا نرقد حبيبي عندي . حطلي راسي على صدرو وبقا يمسحلي على شعري . حتى رقدت . غدوة الصباح فطنت لقيتوا مقابل لمراية  لابس قشوا  ويعدل في شعرو . شافني فقت جاني  قعد بحدايا فوق السرير و باسني  قالي نضتي حبي ، صباح الخير . قتلوا صباح النور . قالي هيا ازربي نوضي وجدي روحك باه نروحو نشريو حوايج لدخلة تاع الجامعة كيما تفاهمنا لبارح . قتلوا خلي برك ما نيش قادرة ليوم.  قالي علاه وشبيك مريضة . وحط يدو على جبهتي يقيسلي في السخانة.  قتلوا تعبانة برك خلي غدوة نروحوا . قالي كيما تحبي ملا انا نروح للخدمة وانتي ارجعي ارقدي معندك علاه تنوضي دوك نقول لدنيا تجيبلك لغدا . قتلوا ايه . قالي هيا حبي تهلاي في روحك ، كشما كاين عيطيلي ولا عيطي لدنيا . قتلوا اوك . قالي هيا ارجعي ارقدي باسني ووقف راح طفى الضو وقفل الباب وخرج .
انا قعدت في بلاصتي مقدرتش نرجع نرقد ، قلت خلي نروح ندوش كشما تتنحى عليا الفشلة . انا وقفت نحس في الدنيا الدور بيا ، رجعت قعدت حتى تنحات عليا  شوي زيد عاودت وقفت مشيت رجليا ثقال عليا بسيف باه وصلت لدوش ، بديت نحي في قشي باه ندوش ، انا نحيت قشي وليت نشوف في كلش مضبب  ويدور وقلبي يوجع فيا . حكمت في الحيط وخرجت هكداك عريانة   .  نمشي بالسيف  حاطة يدي على قلبي لوجاعة باقية وتزيد حاسة روحي راح تخرج  مني . كنت حابة غير نوصل وين محطوط التلفون فوق تابل دو نوي  باه نعيط للآدم . انا وصلت وين السرير طحت في لرض رجليا مقدروش يهزوني وليت نبكي خفت  حسيت روحي تعوقت  وليت نزحف في لرض و نبكي حابة غير نعيط لآدم ، وصلت للتلفون بالسيف هزيتوا ويديا يرجفوا درت نميرو تاع أدم بقيت نعيط المرة لولة مهزش زيد عاودت المرة ثانية ، انا غير شفتوا هز  وليت نبكي بالصوت نسمع فيه يعيط اريج وشبيك علاه تبكي اهدري . انا بقيت غير نبكي خفت لنكون تعوقت صح رجليا ما نيش حاسة بيهم  تقول عليهم مقصوصين . نسمع فيه يعيط  قالي اريج اهدري متهبلينيش وشبيك .قتلوا آدم اجريلي ورجعت نبكي . نسمع فيه يقولي اريج حبي بالعقل فهميني وشبيك راني جاني في الطريق قولي وشبيك . قتلوا وانا نبكي رجليا ما نيش حاسة بيهم . قالي تهدني بالعقل حبي راني جاي ماتخافيش راني ركبت صاي  دوك نقول لدنيا تجيك ما بين ما وصلت سمعتو دار دوزيام ابال عيط لدنيا . قالها دنيا ازربي اطلعي عند اريج شوفيها وش بيها. قاتلوا غير الخير وش بيها اريج . قالها معلاباليش ازربي اطلعي شوفيها راني جاي قريب نوصل . كوبا معاها وقالي ماتخافيش عمري دوك تجيك دنيا ، ديجا  راني قريب نوصل خمس دقايق تلقايني عندك . قتلوا ايه . سمعت الباب يطبطب ودنيا تعيط عليا باه نفتح عليها الباب . قالي آدم افتحي  عليها الباب . قتلوا وانا نبكي مانيش قادرة نوقف رجليا مش حاسة بيهم . بقيت نحاول نحرك في رجليا والوا مقدرتش طيشت التلفون من يدي و دخلت في هستيريا تاع البكا خفت صح نكون تعوقت . نسمع في أدم يعيط من التلفون ودنيا تعيط من ورا الباب. نفس راحلي من لبكا بديت ندوخ ، سمعت صوت آدم ورا الباب عرفتوا وصل فتح الباب ودخل يجري ويعيط اريج وينك ، انا عينيا راح يتغمضوا . شفتوا فتح الباب تاع الشمبرة ودخل هو ودنيا  شافوني  طايحة في الارض عريانة تخلعوا دنيا شهقت وحطت يديها على فمها  ،و هو هز ديراكت الغطا تاع السرير لاحوا فوقي وطابس عندي بقا يضربلي في وجهي قالي اريج وشبيك  ، وشبيها حالتك هكا وش صرالك . نطقت بالسيف قتلوا رجليا . مسحلي دموعي قالي خلاص ما تخافيش مصرا والوا دوك ندي عمري للطبيب . قال لدنيا ازربي   جيبيلي حاجة نلبسهالها.  جبدتلي عباية تاع الصلاة باها  بالخمار تاعها مدتهالوا قالها جيبي حاجة لبسهالها من تحت ، راحت تجري جابتلي ملابس داخلية مدتهملوا وخرجت  . نحا عليا لغطا ولبسهالي وانا غير نبكي . وهو يهدن فيا كي كمل لبسهالي هزني بين يديه وهبط يجري بيا في الدروج انا حاسة روحي في عالم وحدوخر  ماني جايبة خبر لحتى شي . شافتنا  عجوزتي  بالحالة هديك قاتلوا استنا نجي معاك . قالها يما راني مزروب ، عيطي ليماها والحقي معاها. قاتلوا ايه .خرجني ركبني في الطموبيل من قدام وركب يسوق فيتاس ، حاكملي يدي ويهدي فيا ويقولي دوك يتنحى على حبي اصبري شوي برك دوك نوصلوا .انا مغمضة عينيا حاسة روحي دايخة ونايضة في نفس الوقت جامي صراتلي حاجة كيف هادي  . فتحت عينيا خزرت معاه شفتوا صح خايف عليا ، رصيتلوا على يدوا قتلوا وانا نبكي  آدم نحبك . خزر معايا عينيه مدمعين هو يدي باسها قالي وانا نعشق فيك متبكيش حبي دوك نوصلوا . وصلنا السبيطار في 5 دقايق . هبط وجا هزني دخل بيا يجري لداخل جاوه زوج فراملة معاهم سرير قالولوا حطها هنا . حطني فوق السرير ، انا بقيت حاكمة في يدو قتلوا آدم متخلينيش . قالوا منخليكش عمري ما تخافيش . سقساتوا الفرملية قاتلوا وش بيها . قالها  منعرف قاتلي رجليا قاتلوا عندها مرض مزمن قالها ايه عندها تضخم في القلب . ديراكت وجدت أبرا وضربتهالي في دراعي هك  شوي ودخت ما فقت بوالوا   .
بعد ساعتين فطنت نسمع في الهدرة ميزت صوت آدم فتحت عينيا لقيتوا واقف مع الطبيبة تاعي لموالفة نسويفي عندها. . سمعتها قاتلوا هادو الاعراض الجانبية تاع المرض تاعها. راني قلت ليماها بلي المرض راح يأثر على حياتها الزوجية . قالها آدم ايه علابالي  بصح من تزوجنا جامي صراتلها هاد الحالة . قاتلوا لالا راني متأكدة بلي صراتلها محبتش تقلكم على خاطر المرحلة لي جاتنا بيها تأكد بلي كانوا يصراولها اعراض بعد اي علاقة بيناتكم . قالها والحل . قاتلوا حاليا لازملها الراحة حتى العلاقة بيناتكم لازم تكون في الحدود . قاتلوا من بعد عديلي البيرو . زيد نشرحلك حالتها مليح . قالها. اوك يعطيك الصحة دكتورة. 
شفتوا جا لعبتها درك وين  فقت فتحت عينيا . قدم باسلي راسي قالي حمدالله على سلامتك حبيبتي قتلوا يسلمك . قالي وش تحسي في روحك درك لباس قتلوا ايه ، تفكرت رجليا . قتلوا رجليا وبقيت نحرك فيهم . هي صح حركتهم بصح مزالوا ثقال عليا . قتلوا رجليا ثقال عليا . قالي نورمال حبيبي ماتخافيش راهي قاتلي الطبيبة نهارين وترجعي عادي .قتلوا الحمد لله يا ربي حسبت روحي تعوقت. .باسلي يدي قالي بعيد الشر على الزينة تاعي . ملڨري سمعت وش قاتلوا الطبيبة بصح سقسيتوا قتلوا وش قاتلك الطبيبة . قالي متخافيش مش حاجة ڨراف غير من تعب برك . عرفتو مش حاب يقولي .