حب في الثانوية

chapitre 85

بقيت واقفة في بلاصتي ، بابا رما الورقة من يدو ودخل للشمبرة وماما غيرر تشوف وتبكي ما راهي فاهمة والوا .  هزيت الورقة في يدي ودخلت للشمبرة وانا نرجف غلقت الباب وقعدت في الارض يا  ربي منيش مصدقة آدم طلقني يا ربي وش درت انا وش درت في روحي فتحت الورقة نقرا فيها مكتوبة فيها بلي من المحكمة طلب خلع السبب عدم قدرة الزوج على  أداء  وجباته الزوجية   . انا قريت وش مكتوب  عقل ما بقى في راسي وليت نندب في وجهي وش هدا هزيت التلفون وعيطت للمحامية هزت عليا قتلها انتي مهبولة مريضة وش كتبتي الله يلعنك انا قتلك اكتبي هكدا  . قاتلي اسمعي احترمي روحك انتي حوستي تتطلقي ومعطينيش سبب مقنع وقولتيلي حطي من عندك اي سبب وانا هدا وش جا في مخي ياك انتي المهم عندك يطلقك وانا علابالي بعد وش كتبت في دعوة راح يطلقك مئة بالمئة . وليت نبكي بالصوت قتلها الله يخلص فيك الحق خربتيلي حياتي الله يعطيك مصيبة   .قاتلي شوفي تزيدي كلمة اخرى ما نتفاهموش انتي لي جيتي عندي وانتي لي طلبتي خدمتي دوك تبعتيلي حقي ومنزيدش نسحقك تعيطيلي فهمتي كوبات عليا . بقيت قاعدة في بلاصتي حاسة الارض ما راهيش هازتني وش درت في عمري انا وش درت . نسمع في بابا يهدر مع ماما قالها وين راهي بنتك  لي ناقصة تربية هكدا انا ربيتها يا ريتني متت وما عشتش نهار هدا هكدا بهدلت بيا هكدا ، انا بنتي عادت تروح عند المحاميين وحدها وتبهدل براجلها قدام الناس وتزيد تبعتلوا لابوليس للخدمة . نسمع في صوت تاع المشي عرفتوا راه جاي للشمبرة تاعي وقفت طبطب في الباب قالي اريج اخرجي نهدر معاك . انا كنت غير نسمع ونرجف بكلي وندعي في ربي نكون نحلم ولا راني في كوشمار ، فتحت الباب قابلني بابا عينو حمرة موالفة تصرالوا كي تطلعلوا لاطونسيو ، خفت منو مقدرتش نهدر . قالي علاه درتي هكدا علاه قوليلي برك انا معرفتش نربيك ولا رخفتلك الحبل لدرجة معدتيش دايرتلي حساب ما تخافي مني ما تقادريني رايحة تصرفي من راسك بلا ما تشاوريني لا أنا لا يماك لا خوك  تقول عليك مقطوعة من شجرة ولا معندكش عايلة وفوق هاد الشي كامل تقولي هديك الهدرة لراجلك انتي لمن خرجتي هكدا قليلة تربية قولي يارتني ما دللتك ولا ربيتك على هاد الدلال لي خلاك بلا عقل ، دوك كولي صوابعك ندامة عمرك 19 ومطلقة برد  قلبك هكدا علابالك طحتي من عيني انتي لي كنت وين نروح نقول عندي بنتي عقلها يوزن بلاد تمشي برايي ونهار ماراح تخرج على شورتي مانخافش عليها بصح كنت غالط فيك علاه درتي هكدا مش هاد الراجل لي كنتي كل ليلة تبكي عليه مش هدا لي مرضتي عليه  ودخلتي للسبيطار علجالوا وقت سافر مش هاد الراجل لي كنت راح تموتي غير باه يزوج بيك . كانت كل كلمة يقولهالي تدخل في قلبي كيف السكين تقطعوا .دموعي سبالة على خدي يا ريت روحي خرجت ما سمعتش هاد الهدرة من عند بابا غير هو لي منقدرش نسمع من عندو  هاد الكلام بلاك كون جات ماما نورمال . قتلوا بابا ربي يخليك سامحني والله غلطت كنت متقلقة مكنتش علابالي بلي راح يصرى هكدا . قاالي كنتي تحسابي مراحش يسمح فيك وراح يبقى يجري وراك حتى يبرد غشك وزعافك من بعد ترجعي عندو كشغل ما صرا والوا بصح راكي غالطة راجل وقت توصل لكرامتوا يعفس عليك حتى لوكان روحوا معلقة في روحك ويتنفس بيك انتي راح يجبد قلبوا ويعفس عليه برجلوا فهمتي شوفي راه طلقك صاي خاطر انتي جرحتيلوا  كرامتوا  وكون جيت انا في بلاصتوا بعد هاد الشي ننسا بلي كاينة في الدنيا وحدة اسمها اريج . طحت على ركابيا في الارض وحطيت يديا على وجهي قتلوا بابا منقدرش نعيش بلا بيه منقدرش انا انا نحبوا والله نحبوا الله يخليك متخليهش يطلقني نبوسلك رجلك بابا تعيش والله ما نزيد نعاود روح اهدر معاه  متخليهش يطلقني بابا والله ندمت انا منقدرش بلا بيه . كان نيفي يجري بالدم يديا كامل عادوا دم . بابا هبط عندي قالي بنتي صاي فات الوقت الطلاق وقع خاطر طلقك بالثلاث وصاي انتي محرمة عليه مكانش رجعة انساي كيما هو راح ينساك أصلا انا من لول غلطت كي زوجتك انتي مزلتي صغيرة ودنيا بطولها قدامك كملي حياتك انجحي واخدمي وابني روحك الدنيا مش غير زواج . ياما بنات مزال ما جاهمش مكتوبهم بصح تشوفيهم  تقولي يا ريت كنت كيفهم الشخصية و الاخلاق والتربية عايشين حياتهم هانيين مرتاحين  .
قتلوا بصح انا ماراني حابة والوا تعيش بابا قولوا ميطلقنيش والله ما نزيد نعاود . عيط عليا قالي اريج خلاص انتي لي حبيتي هكدا تحملي نتيجة افعالك آدم انسايه فهمتي انسايه نوضي اغسلي حالتك يالله . قتلوا بابا قالي منزيد نسمع حتى كلمة يا نوضي عليا . وقفت دخلت نجري للدوش قفلت الباب وقعدت في الارض نبكي ونعدد يا ربي وش درت في عمري بقيت شي ساعة وانا في بلاصتي نبكي . حتى سمعت صوت خويا جا من الخدمة قال ماما وش صرى وشبيه آدم نعيطلوا كوبا عليا حتى دنيا عيطلها غير تبكي ما فهمت من هدرتها والوا . حكالوا بابا كلشي . كي كمل قالهم وين راهي اريج . كي سمعتو سقسى عليا خفت علابالي خويا يحبني بصح هاد المرة خفت منوا قلبي عاد يرجف . جا للدوش بقا يطبطب في الباب وانا من خوف بقيت نشوف مع الباب ونبكي . قالي اريج افتحي الباب . محبيتش من بعد عاود قالي اريج يالله افتحي الباب . قدمت فتحتووا وانا نقدم في رجل ونوخر في رجل .غير شافني ديراكت تحضني . المرة لولة توقعتوا راح يضربني كيما دار بابا . قاالي ششش الزينة على حالتك هكدا كلشي يفوت .قتلوا محمد قولي ميطلقنيش تعيش والله نحبو قالوا ربي يخليك والله نموت بلا بيه . بعدني عليه وبقا يمسحلي في وجهي قالي ايه نقولوا انتي متقلقيش روحك من بعد نهدر معاه هيا ارواحي اغسلي وجهك شوفي حالتك كاملة بالدم هيا الفحلة . قتلوا صح تهدر معاه قالي والله نهدر معاه ارواحي اغسلي هيا بقا يغسليلي في وجهي من بعد مسحلي وخرجنا لقينا ماما واقفة في الكلوار حبت تهدر معايا حبسها محمد قالها يما خلاص مكان لاه تبداي . دخلني للشمبرة قالي هيا ارقدي شوي ومتخمميش الشي لي تحبيه يصير متقلقيش روحك صحا خويا قتلوا ربي يخليك ليا راك وعدتني تهدر معاه قالي ايه غير شوي ونروح عندو نحكي معاه . دخلت في السرير وهو خرج نسمع فيه يهدر مع ماما وبابا قالهم متزيدوش عليها انتم ثاني خليوها في حالها قاتلوا ماما غير حبيت نفهم علاه دارت هكدا قالها ماما وش هدرت متهدروش معاها مراكمش تشوفوا في حالتها راهي مريضة ادا نسيتي . قالوا بابا هادا هو الدلال لي خلاها دير رايها ومش دايرتلنا حساب . قالوا محمد بابا وقت انت كنت تروح تخدم وبالعشرين يوم باه تروح للدار  وتقعد غير نهارين انا لي كنت نربي في اريج وانا لي كبرتها ، وانا لي دللتها ونزيد ندللها انا عندي اخت وحدة مش عشرين ونعادي الناس كامل علجالها وراني قلتها  و نزيد نعاودها متزيدوش تضغطوا عليها ولا تقلقوها لي فيها يكفيها والحاجة لي تقول عليها نديرهالها منيش  حابها تمرض وادم دوك نروح نحكي معاه ونتفاهم معاه  . قالوا بابا واش راك تحاسب فيا  ولا كيفاه وليت تعرف خير مني ؟؟؟ قالوا خويا قدرك عالي بابا بصح اريج مريضة وصغيرة وانا نتفاهم معاها بالعقل وإن شاء الله نلقاو حل يرضينا كل .