حب في الثانوية

chapitre 49

بقيت مع عجوزتي ودنيا وجدنا الحالة وطيبنا لعشا وصلت الثلاثة قاتلي روحي وجدي روحك هداك هو قبل ما يبداو يجيو . طلعت لداري دخلت دوشت ودرت لي ماسك لوجهي وشعري ونقيت روحي مليح خرجت نشعل . كملت لبست الڨندورة ودرت مكياج سامبل ما جيت نكمل تعبت  . بقا شعري برك بقيت نخمم كيفاه نديرلوا  ديجا هو طويل ما نجي نخلصو نموت بالتعب بديت نسشور فيه كملتوا بصح قلت لازم نديرو بالبلاك lisser باه  نطلقو . سمعت الباب تفتح .عرفتو آدم رحت نجري عندو تحضنتو .قتلوا جابك ربي يا دومي يا حنوني . ضحك وقالي الدخلة هادي ما تبشرش بالخير ، قولي ديراكت وش تسحقي .قتلوا والوا برك غير حاجة خفيفة . قالي وش هي هادي الحاجة لخفيفة . قتلوا ديرلي شعري بالبلاك lisser. ضحك وقالي يا بنتي وين نعرف انا نديرلك شعرك بيه . قتلوا راه ساهل ارواح نوريلك كيفاه دير بيه . بقيت نوريلوا كيفاه يمشي . قتلوا هاك ديرلي عندك لا تحرقني . جبدلي الكرسي تاع كوافاز قالي اقعدي نبدا ولعمال على ربي . وقف ورايا  وبقا يديرلي فيه بالعقل حتى كملي شعري كامل . وقفت نشوف في شعري قالي وش عجبك ، والله كون تقوليلي معجبنيش نجيب الماء ونكبوا عليك . وليت نضحك قتلوا عجبني يعيطيك الصحة حبيبي ربي يخليك ليا . باسني و قالي خليني دوك نروح نغسل ونبدل قشي . بقيت نعدل في روحي لبست دهبي وصابوا تاع الطالوا وطلقت شعري . وبقيت نستنى في آدم يخرج من الدوش . كي خرج بقا  يخزر معايا وقفت ودرت نوريلوا في روحي قتلوا كيفاه جيت شابة ولا لا  . قالي الله يبارك عليك جيتي تهبلي . قتلوا صح قالي ايه . قالي ارواحي . رحت وقفت قدامو حط يدو على راسي وبقا يقرى في المعوذات والادعية . قالي نخاف يعينوك . بستو على اللحية تاعو قتلوا ربي يخليك ليا.  هبطنا انا وياه لدار عجوزتي لقيتهم مزالوا ما جاوش. .قاتلي عجوزتي انتي لي تستقبليهم . قتلها نحشم وزيد ما نعرفش قاتلي معندك علاه تحشمي ديجا راهي حاجة ساهلة غير سلمي عليهم وقوليلهم مرحبا بيكم تفضلوا برك .
جاو فتحت عليهم الباب ورحبت بيهم دخلوا قعدوا في الصالة .كانو ثلاثة نسا عمامو مع بناتهم. مرت عمو لكبير جابت بنتها متزوجة . ومرت عمو المتوسط زوج بنات وحدة متزوجة ووحدة مخطوبة ومرت عمو الصغير عندها زوج بنات مش متزوجين وحدة في عمرها 17. ووحدة عمرها 23 . غير مرت عمو الكبيرة تبان عاقلة وناس ملاح. بصح زوج اخرين يبانو واعرين حتى من بناتهم كيفهم .سيرتو مرت. عمو الصغير هي وبنتها  من لي دخلوا  وهم  يشنفو  عليا ، مش حابين حتى يشوفو في وجهي بقيت حايرة فيهم ملڨري شفتهم غير في الخطبة والعرس و مهدرتش حتى معاهم .قاتلي عجوزتي روحي جيبي القهوة .رحت الكوزينة لقيت بنت عمو لكبير ودنيا لحقوني قالولي نوجدو معاك زاد لحقوا بنات عمو المتوسط بقينا نوجدو ونحكو ونتعرفو قالولي صح كنتي تقراي عند ادم . ضحكت قلتلهم ايه. .قالولي حكايتكم تبان كيف تاع الافلام.
حطتلهم القهوة والجي والقاطو ورجعت قعدت بحدا عجوزتي وهي من لي قعد تشكر وتمدح فيا فرحتني  حسيتها  تقول عليها ماما . نطقت بنت عمو الصغير لي عمرها 23  اسمها كوثر قالتلنا نروح لتوالات وخرجت . هكا شوي قاتلي عجوزتي جيبيلي الماء نشرب دوايا .وقفت ورحت للكوزينة جيت ندخل نلقا كوثر هادي واقفة مع آدم وحدهم في الكوزينة .انا طلعولي الجنون بصح هديت روحي قلت نورمال بنت عمو ما فيها والوا . رحت لأدم حكمتو على يدو قتلوا حبي راك هنا كشما سحقيت .قالي ما سحقيت والوا حبي جيت نشرب برك .خزرت مع هادي كوثر بانتلي كشغل عينيها مدمعين تبان كانت تبكي . قتلها تولات من جيهة لخرة ادا معرفتيش الطريق . قاتلي علابالي شنفت عليا وخرجت. بقيت نشوف معاها جاية طويلة شوي وشعرها قصاتو كاري ولابسة سروال مزير مع بودي وتمشي وتتزعبل . درت لأدم قالوا علاه كنت واقف معاها وش كنتو  تهدرو .ضحك وقالي وشبيك تحولتي راهي كانت تسلم عليا برك  هدا مكان. قتلوا صحا ، هيا اشرب الماء واخرج من كوزينة .عاد يضحك بالصوت قالي والله راكي تسحتي فيا. قتلوا ايه راح يجيو لبنات باه يعاونوني نحطوا لعشا. قالي راني خارج . مشا شوي ومن بعد قالي ديري خمارك ومتبقايش دوري جيهة الصالة دوزيام ولاد عمي هنا . قتلوا ايه علابالي .
بقيت نوجد في لعشا مع بنت عمو لكبير هادي ملڨري كبيرة عليا بصح ليه ليه تفاهمت معاها عجبتيني عقليتها . قلتلها وشبيها هديك بنت عمك  لي اسمها كوثر جابدة روحها ومن لي جات وهي تشنف .قاتلي هديك دورجين ديما مشنفة حاطة روحها فور علينا. ضحكت . قاتلي بصح نقولك الصح ومنخبيش عليك كانت تخرج مع آدم بكري وحد 6شهر وحبسو بصح كانت دايرة في بالها بلي مرت عمي راح تخطبها ليه .ونهار لي عرفت بلي آدم خطبك انتي دارت حالة .انا بقيت مشوكية قتلها تحكي صح .قاتلي والله كيما نحكيلك وزيد المرة لي فاتت قدامنا بقات تحلف قتلنا كون منخليهش يطلقها منسماش كوثر . غير عسي راجلك منها يا المخلوقة هديك والله واعرة كي هي كي امها .انا بقيت غير نسمع من خرجتلي هاد الحكاية ثاني من تحت الارض . قاتلي اريج نوكل عليك ربي لتقولي  لآدم بلي أنا لي قتلك ، بصح حبيت نقلك باه ديري احطياتك خير مديريش فيهم لامان  .قتلها يكثر خيرك كي قولتيلي سينو راني معلابالي بوالوا .قاتلي الحق الحق هي لي كانت لاصقة فيه هو خاطيه.
تعشينا وكملنا انا بقيت نخمم غير في لحكاية تاع هادي كوثر والله كون تجرب برك تقرب من آدم نباصي عليها نورمال . قاتلي عجوزتي روحي جيبيلي السجادة من الشمبرة تاعي نصلي لعشا قبل ما يفوت وقتوا ..رحت للشمبرة لقيت الضو طافي وخيال تاع عبد بحدا لابريز . انا في بالي آدم نسيت أصلا بلي ولاد عمو الرجال هنا ، دخلت وانا نهدر قتلوا آدم وش قاعد تعمل على الضلمة وشعلت الضو.  دارلي لقيتو جان يعود في عمرو 27يشبه لآدم تقول عليه التوأم تاعو بصح آدم جاي طويل وخشين عليه . تبسملي قالي انتي هي اريج . انا بقيت جامدة في بلاصتي ، متفكرتش حتى بلي. راني بلا خمار . قدم ومدلي  يدو باه نخمس معاه  قالي انا ولد عم آدم اسمي كريم .
حنا هكداك ويدخل علينا آدم قلبي قريب حبس خزر معايا خزرة تاع موت قالي وش قاعدة ديري لهنا . مستنانيش حتى نجاوبوا قالي  امشي للكوزينة ازربي . خرجت نجري نسمع في ولد عمو قالوا كنت نشرجي في التلفون دخلت ، كانت تحساب فيا انت . دخلت الكوزينة وانا ننهج ليوم تخلى عليا ليوم يقتلني وش ندير يا ربي  . شفتو دخل للكوزينة  متت قفل الباب وجاني قرصني على جنبي فحمت قالي واقفة بلا خمار ليوم  نشويك ليوم واحد ما يخلصك من يدي . وليت نبكي قتلوا والله نحساب فيه انت .قالي متهدريش مع ز** من بعد نتفاهموا . قتلوا بصح . عاود قرصني على جنبي .حطيت يدي فوق يدو  نبكي قتلوا وجعتني . قالي اششششش امشي روحي اقعدي في الصالة متتحركيش من بلاصتك امشي . مسحت دموعي ورحت قعدت في الصالة بحدا عجوزتي ، عڨبتها سهرة كاملة وانا نخمم وحاكمة البكية بالسيف . قاتلي عجوزتي وشبيك اريج . قتلها من بعد نحكيلك . على 12تاع الليل باه روحوا . غير شفتهم خرجوا.  رحت نجري عند عجوزتي قتلها يما تعيشي خبيني عندك ليوم آدم يقتلني .قالتلي علاه وش صرا . قتلها دخل لقاني واقفة مع ولد عمو هداك لي إسموا كريم .قاتلي يا نندب عليك وش واقفة ديري معاه . قتلها والله كنت  نحساب فيه آدم غلطت . نسمع فيه يعيط اريج .  وليت نبكي قتلها يما راهو جا والله ليوم يقتلني . بقيت متخبية وراها . جا شافني متخبية مسح وجهو بيديه وقالي ارواحي اخرجي من وراها . قاتلوا عجوزتي صلي على محمد وتفاهموا بالعقل . قالها عليه الصلاة والسلام .وخزر معايا قالي ارواحي ماراح نديرلك والوا نهدر معاك برك . قتلوا لا ما نجيش  دوك تضربني . قالي اريج متقلقنيش راني حاكم روحي بسيف . عيط عليا وقالي  اخرجي قتلك . خرجت من ورا عجوزتي ورحتلوا ديراكت حكمني من شعري .قالي وش وصيتك انا قبيل على الخمار اه اهدري.بقيت ساكتة ونبكي. بقا يحركلي في راسي من شعري قالي اهدري وش وصيتك .قتلوا والله غير نسيتوا غلطت . قالي صحا نسيتي ، وعلاه كي  شفتيه في الشمبرة مخرجتيش علاه بقيتي واقفة معاه. . بقيت ساكتة ونبكي. هز يدو وضربني بكف دورلي وجهي وبقا حاكملي راسي. .جات عجوزتي تبعد فيه عليا قاتلو اطلق الطفلة والله تزيد تمسها ما بقيت نهدر معاك .قالها يما متدخليش بيناتنا بعدي . انا غير نبكي منطقت حتى كلمة علابالي كون نهدر نزيد نخربط الحالة اكثر . بقا يجبدلي في شعري  حسيتوا راح يكسرلي رقبتي.  قالي شوفي المرة هادي فوتتها خاطر علابالي بيك غلطتي بصح  والله تعاوديها ونشوفك قدام واحد بلا خيمار  راسك  هدا نقصهولك سمعتي . درتلوا براسي ايه طلقلي شعري وهز المفتاح تاع الطونوبيل وخرج .
طلعت لداري وقعدت في السرير نستنى فيه نعست غفيت فطنت على 2تاع الصباح شفت جنبي مالقيتوش . وقفت ورحت طليت في الصالة لقيتو راقد لثم فوق البونكات . روحتلوا بقيت نوض  قتلوا دومي نوض . فتح عينيه قالي ريجا وشبيك علاه نضتي من فراشك . قتلوا نرقد عندك . فتحلي دراعوا وقالي هيا نرقد حبيبي عندي .دخلت في حضنو ،بقا يبوس فيا على شعري ويمسحلي على ضهري . قتلوا قبيل ضربتني . بقا يبوسلي في وجهي قالي ياعمري انتيا .قتلوا وقرصتني . حط يدو على جنبي وقالي وجعتك بزاف . قتلوا ايه وجعتني حتى درك مزالت توجع فيا. . قالي تتكسر اليد لي ضربت المدللة تاعي . قتلوا بعيد الشر عليك .  قالي تحبيني ڨاع هكدا .  قتلوا نعشق فيك .